DEUTERONOMY 10 - Edisana ñwed Abasi Ibom

Abasi Ɔtɔŋɔ Ntak Ɔnɔ Moses Itiat Mbet Ɔyɔhɔ Ikaba

¹ KE ini oro Jehovah ɔdɔhɔ mi, ete, Sɔi itiat-ŋwed iba ke idem fo ebiet eke akpa, ndien dɔk tiene mi ke obot, nyuŋ nam ekebe obukpɔk ke idem fo.

² Ndien nyeda itiat-ŋwed oro, ŋwet ikɔ ekedude ke akpa itiat-ŋwed oko afo okobomde; ndien men mmɔ sin ke ekebe.

³ Ndien nnam ekebe obukpɔk shittim, nnyuŋ nsɔi itiat-ŋwed iba ebiet eke akpa, ndien ndɔk ke obot ye itiat-ŋwed mbiba ke ubɔk mi.

⁴ Ndien enye ada itiat-ŋwed oro ewet kpasuk akpa ŋwed, ikɔ duop oro Jehovah eketiede ke obot ke ufɔt ikaŋ ɔdɔhɔ mbufo ke usen esop: ndien Jehovah emen mmɔ ɔnɔ mi.

⁵ Ndien ŋkabare nto ke obot nsuhɔre, nnyuŋ nda itiat-ŋwed nsin ke ekebe oro ŋkanamde; mmɔ emenyuŋ esine do, kpa nte Jehovah eketemede mi.

⁶ Ekem nditɔ edaŋa ke Beeroth Bene-jaakan, eka ke Moserah: do ke Aaron akpa, do ŋko ke enye ɔbuhɔ; ndien Eleazar eyen esie ada oku ke ibuot esie.

⁷ Mmɔ eto do edaŋa eka ke Gudgodah; ndien ekpɔŋ Gudgodah ekesim ke Jotbathah, isɔŋ idim mmɔŋ.

⁸ Ke ini oro Jehovah adianare esien Levi, ete ebiom ekebe ediomi Jehovah, enyuŋ eda ke iso Jehovah, ndinam ŋkpɔ esie, nnyuŋ nda enyiŋ esie ndiɔŋ, tutu osim mfin emi.

⁹ Mmɔdo Levi minyeneke ubak ye udeme ke otu nditɔ ete esie; Jehovah edi udeme esie, kpa nte Jehovah Abasi fo ɔkɔdɔhɔde enye.

¹⁰ Ndien ami ntie ke obot ke uwemeyo aba, ye ke okoneyo aba, kpa nte eke akpa ini; Jehovah onyuŋ okop uyo mi ke ini oro ŋko, Jehovah inyuŋ inyimeke ndisobo fi.

¹¹ Ndien Jehovah ɔdɔhɔ mi, ete, Daha ke enyɔŋ, bem mmɔ emi iso ke usuŋ, man eduk eka ekenyene isɔŋ emi ŋkɔŋwɔŋɔde nnɔ mme ete mmɔ nte nda nnɔ mmɔ.

¹² Nso ŋkpɔ ndien, O Israel, ke Jehovah Abasi fo oyom ye afo, ke mibɔhɔke eribak Jehovah Abasi fo, nnyuŋ nsaŋa ke kpukpru usuŋ esie, nnyuŋ mma enye, nnyuŋ nnam ŋkpɔ Jehovah Abasi fo, ke ofuri esit fo, ye ke ofuri ukpɔŋ fo,

¹³ nnyuŋ nnim mbet Jehovah, ye mme ewuhɔ esie, emi ami ŋwukde fi mfin emi, man ɔfɔn fi?

¹⁴ Sese, enyɔŋ, ye ata enyɔŋ, ye isɔŋ, ye kpukpru se idude ke esit, edi eke Jehovah Abasi fo.

¹⁵ Edi mme usɔ ema enem Jehovah esit, enye onyuŋ ama mmɔ, ama onyuŋ emek mbufo ubon mmɔ emi etienede mmɔ edem, ke otu kpukpru obio, kpa nte edide mfin emi.

¹⁶ Mbufo enim ndien esit mbufo mbobi, ekunyuŋ etun aba itun.

¹⁷ Koro Jehovah mbufo edide Abasi mme abasi, ye ɔbɔŋ mme mbɔŋ, Abasi emi edide ata akwa, ye ɔkpɔsɔŋ, ye akpakop, emi miteŋeke owo baba kiet enyin, minyuŋ ibɔhɔ enɔ:

¹⁸ emi ekpede edinen ikpe ɔnɔ eyen-akpa ye ebe-akpa, onyuŋ amade esen owo, ɔnɔ enye udia ye edisine-ŋkpɔ.

¹⁹ Mbufo ema ndien esen owo: koro mbufo ekedide isen ke isɔŋ Egypt.

²⁰ Bak Jehovah Abasi fo; nam ŋkpɔ esie, nyuŋ yire ye enye, nyuŋ tomo enyiŋ esie.

²¹ Enye edi itoro fo, onyuŋ edi Abasi fo, emi akanamde ikpɔ ŋkpɔ ye ŋkpɔ ndik emi ye afo, nte enyin fo ema ekekut.

²² Mme usɔ, owo ata ye duop esuhɔde ke Egypt; ndien ke emi Jehovah Abasi fo ama anam fi awak nte ntantafiɔŋ enyɔŋ.