DANIEL 5 - Edisana ñwed Abasi Ibom

Nnuenubɔk Ɔwɔrɔ Ewet Ŋkpɔ ke Ibibene

¹ BELSHAZZAR edidem akanam akwa udia ɔnɔ tɔsin ikpɔ owo esie, onyuŋ ɔŋwɔŋ wine ke iso tɔsin oro.

² Adaŋemi Belshazzar atabide wine oro enye ɔnɔ uyo, ete eda ŋkpɔ gold ye ŋkpɔ silver oro Nebuchadnezzar ete esie akataŋde ke temple emi okodude ke Jerusalem efep, eda edi; man edidem, ye ikpɔ owo esie, ye iban esie, ye iban-esa esie eŋwɔŋ ke esit.

³ Ndien mmɔ eda ŋkpɔ gold oro eketaŋde ke temple ufɔk Abasi emi odude ke Jerusalem, eda edi; ndien edidem ye ikpɔ owo esie, ye iban esie, ye iban-esa esie eŋwɔŋ ke esit.

⁴ Mmɔ eŋwɔŋ wine, enyuŋ ekɔm mme abasi gold, ye eke silver ye eke okpoho, ye eke ukwak, ye eke eto, ye eke itiat.

⁵ Ke ndo-ndo oro nnuenubɔk owo ewɔrɔ ediwet ke ndom ibibene akwa ufɔk edidem ekem ye utuenikaŋ; ndien edidem okut ubak ubɔk oro ewetde ntre.

⁶ Ndien iso edidem akabare kpai, ekikere esie enyuŋ etimere enye, ŋkek isin esie enyuŋ emem: edɔŋ esie kiet onyuŋ atuak eken.

⁷ Edidem ofiori ɔkpɔsɔŋ, ete eda mbia-idiɔŋ ye mme Chaldean ye mbia-mfa eduk. Edidem ɔbɔrɔ onyuŋ ɔdɔhɔ mme ɔfiɔkŋkpɔ owo Babylon, ete, Owo ekededi ama okot ŋwed emi, onyuŋ asiak enye ɔnɔ mi, eyesine purple ke idem, onyuŋ ɔkɔŋɔ ŋkpɔkɔbi gold ke itɔŋ, onyuŋ ada ɔyɔhɔ itie ubɔŋ ita ke obio.

⁸ Ndien kpukpru mme ɔfiɔkŋkpɔ owo edidem eduk edi: edi mmɔ ikwe nte ekotde ŋwed oro, inyuŋ ikwe nte esiakde enye enɔ edidem.

⁹ Belshazzar oyomo nsia idige ŋkpɔ, iso onyuŋ akabare enye kpai ke idem, idem onyuŋ akpa ikpɔ owo esie ŋko-ŋko.

¹⁰ Uyo edidem ye eke ikpɔ owo esie esin ɔbɔŋ-aŋwan oduk ke ufɔk udia: ɔbɔŋ-aŋwan oro ɔbɔrɔ onyuŋ ɔdɔhɔ edidem, ete, Itɔŋ uwem akpakam ɔsɔŋ edidem ke nsinsi; kuyak ekikere etimere fi, kunyuŋ uyak iso akabare fi akpai:

¹¹ owo kiet odu ke obio fo emi spirit edisana Abasi odude enye ke idem; ndien ke eyo usɔ ke ekekut ete ke ɔniɔŋ ye eti ibuot ye ifiɔk emi ebietde ifiɔk Abasi, edu enye ke idem: ndien edidem Nebuchadnezzar usɔ, kpa usɔ edidem okonim ndien enye ke etubom mbon-ŋwed, ye mbia-idiɔŋ, ye mme Chaldean, ye mbia-mfa:

¹² koro ekutde ete ke ata eti spirit, ye eti ibuot ke eriyarare ndap, ye ke erisiak ŋke, ye ke eritat mkpɔsɔŋ ikɔ, edu enye ke idem, kpa ke Daniel emi edidem okosiode enye enyiŋ Belteshazzar. Yak ekot Daniel edi, ndien enye eyesiak nte ŋwed emi asaŋade.

¹³ Ndien eda Daniel edi ke iso edidem. Edidem ɔbɔrɔ onyuŋ ɔdɔhɔ Daniel, ete, Ndi afo edi Daniel emi otode ke otu nditɔ Judah emi eketaŋde edi, emi edidem ete mi akadade ke Judea edi?

¹⁴ Mmokop ebaŋa fi ŋko, ete ke spirit Abasi odu fi ke idem, ete ke enyuŋ ekut ete ke ɔniɔŋ, ye eti ibuot, ye eti ifiɔk edu fi ke idem.

¹⁵ Ndien ema eda mbon ifiɔk, kpa mbia-idiɔŋ, eduk ke iso mi, ete ekot ŋwed emi, enyuŋ esian mi nte enye asaŋade; edi mmɔ ikwe nte esiakde nte ikɔ emi asaŋade.

¹⁶ Ndien mmokop ebaŋa fi ete ke afo emekeme ndisiak nte ikɔ asaŋade, nnyuŋ ntat mkpɔsɔŋ ikɔ: edieke afo edikemede ndien ŋwed emi ndikot, nnyuŋ nsian mi nte enye asaŋade, eyesine fi purple ke idem, enyuŋ ekɔŋɔ fi ŋkpɔkɔbi gold ke itɔŋ, afo eyenyuŋ ada ɔyɔhɔ itie ubɔŋ ita ke obio.

¹⁷ Ndien Daniel ɔbɔrɔ onyuŋ ɔdɔhɔ ke iso edidem, ete, Nim enɔ fo ke idem fo, nyuŋ da utip fo nɔ owo eŋwen: edi nyekot ŋwed emi nnɔ edidem, nnyuŋ nsian enye nte ŋkpɔ emi asaŋade.

¹⁸ Afo, O edidem, Abasi Ibom ama ɔnɔ Nebuchadnezzar usɔ ubɔŋ ye ubom ye ukpono ye uyai:

¹⁹ ndien ubom oro Enye ɔkɔnɔde enye esin kpukpru mme idut ye obio ye usem edikhe enye, enyuŋ enyek ke iso esie; enye owot owo eke enye amade, onyuŋ ada owo eke enye amade onim ke uwem; ofori mmɔ eke enye amade, onyuŋ ɔsuhɔre mmɔ eke enye amade.

²⁰ Ndien ke ini enye emenerede esit esie ke enyɔŋ, spirit esie onyuŋ akabarede ɔsɔŋ, onyuŋ eseride iseri, esio enye ke ebekpo ubɔŋ esie esuhɔre, enyuŋ ebɔ enye ukpono esie efep:

²¹ enyuŋ ebin enye ke ɔtɔ nditɔ owo efep, enyuŋ enam esit esie akabare ebiet eke mme unam ikɔt, iduŋ esie onyuŋ odu ye mme ass ikɔt: enɔ enye mbiet ata nte enaŋ, mbara emi otode ke enyɔŋ onyuŋ ebit enye idem, tutu enye edifiɔk ete ke Edikoŋ Abasi akara ubɔŋ ererimbot, onyuŋ emenere owo ekededi eke enye amade odori ke esit.

²² Ndien afo, O Belshazzar, eyen esie ukɔsuhɔkede esit fo unim, koro afo ɔfiɔkde kpukpru ŋkpɔ emi.

²³ Edi afo ememenere idem fo ke enyɔŋ aŋwana ye Ɔbɔŋ heaven: mmɔ emenyuŋ eda mkpoduoho ufɔk esie edi ke iso fo, ndien afo ye ikpɔ owo fo ye iban fo ye iban-esa fo emeŋwɔŋ wine ke esit, afo omonyuŋ ɔkɔm mme abasi silver, ye eke gold, ye eke okpoho, ye eke ukwak, ye eke eto, ye eke itiat, emi mikwe ŋkpɔ, minyuŋ ikopke, minyuŋ ifiɔkke: ndien ama edi Abasi emi ibifik fo odude enye ke ubɔk, emi kpukpru usuŋ fo enyuŋ enyenede enye, afo ukponoke enye.

²⁴ Ndien enye ɔdɔŋ ubak ubɔk emi, ete oto imɔ ke iso edi; emenyuŋ ewet ŋwed emi.

²⁵ Ndien ŋwed emi ewetde edi emi: MENE, MENE, TEKEL, UPHARSIN.

²⁶ Ikɔ emi onyuŋ asaŋa ntem: MENE: Abasi amabat ubɔŋ fo, omonyuŋ anam enye okure.

²⁷ TEKEL: emedomo fi ke balance; enyuŋ ekut ete ke afo ukemke.

²⁸ PERES: emebahare ubɔŋ fo, enyuŋ emen enye enɔ Media ye Persia.

²⁹ Ndien Belshazzar ɔnɔ uyo, ete esine Daniel purple ke idem, enyuŋ ekɔŋɔ enye ŋkpɔkɔbi gold ke itɔŋ, enyuŋ ekwɔrɔ ebaŋa enye, ete ke enye edi ɔbɔŋ ke ɔyɔhɔ itie ita ke obio.

³⁰ Ke okoneyo oro ewot Belshazzar edidem mme Chaldean.

³¹ Ndien Darius eyen Media emi osimde isua ata ye iba, ada ubɔŋ.