DANIEL 12 - Edisana ñwed Abasi Ibom

Ukperedem Ini Emi Mme Mmɔ Emi Ekpaŋade Edisetde ke Ŋkpa

¹ NDIEN ke ini oro Michael akwa ɔbɔŋ emi adade abaŋa nditɔ oruk fo, eyedaha ada: ndien ini oro eyedi ini ukut emi oruk esie akanam miduhe toto nte idut okodu, tutu osim ini oro: ndien ke ini oro oruk fo eyebɔhɔ, kpukpru mmɔ emi ewetde esin ke ŋwed oro.

² Ndien ediwak mmɔ emi edede idap ke ntan isɔŋ eyedemere: usuk eyedemere eduk ke nsinsi uwem, usuk ke but ye nsinsi esuene.

³ Ndien mmɔ eke enyenede eti ibuot, eyeyama nte ikpa-enyɔŋ ayamade: mmɔ eke enamde ediwak owo ekabare edi edinen, eyenyuŋ ebiet ntanta-ɔfiɔŋ ke nsinsi-nsinsi.

⁴ Ndien afo, Daniel, dip ikɔ emi, nyuŋ nim seal ke ŋwed, tutu osim ke utit ini. Ediwak owo eyeyɔrɔ edi, eyɔrɔ eka, ndien ifiɔk eyekpon aka iso.

⁵ Ndien ami Daniel nse, ndien, sese, owo iba eŋwen ke eda, kiet ke mben akpa ke edem emi, kiet ke mben akpa ke edem oko.

⁶ Ndien owo kiet obup owo oro esinede linen, emi edade ke enyɔŋ mmɔŋ akpa, ete, Adaŋa ini didie ke utit mme utibe ŋkpɔ emi edidi?

⁷ Ndien ŋkop uyo owo oro esinede linen, emi adade ke enyɔŋ mmɔŋ akpa, ndien enye emenere ubɔk nnasia esie ye ubɔk ufien esie ke enyɔŋ, onyuŋ otomo enye emi odude uwem ke nsinsi, ete ke edidi ini, ye ini iba, ye ubak ini; ndien adaŋemi enye edisuande odudu edisana mbio ama, eyema kpukpru ŋkpɔ emi.

⁸ Ndien ami ŋkop, edi ntimke mfiɔk. Ndien ndɔhɔ nte, Ɔbɔŋ mi, utit ŋkpɔ emi edidi didie? Ndien enye ɔdɔhɔ, ete,

⁹ Ka okuomɔ, Daniel: koro edipde ikɔ emi, enyuŋ enim mmɔ seal ke esit tutu osim ke utit ini.

¹⁰ Eyesioŋo ediwak owo ndek ke idem efep, enyuŋ enam mmɔ edi edisana, enyuŋ edomo mmɔ; edi mme idiɔk owo eyenam idiɔk; baba idiɔk owo kiet idinyuŋ idige asian, edi mmɔ eke enyenede eti ibuot eyedi asian.

¹¹ Ndien toto ke ini emi edisiode nsinsi uwa efep enyuŋ ediɔkde ŋkpɔ mbubiam nsobo, edi tɔsin usen ye usen ikie iba ye anaŋ ye duop.

¹² Ɔfɔfɔn ɔnɔ owo eke ebetde, onyuŋ osimde tɔsin usen ye usen ikie ita ye edip ye efut.

¹³ Edi afo ka okuo tutu osim ke utit: ndien afo eyeduɔk odudu, onyuŋ ada ke udeme fo ke utit mme usen.