AMOS 9 - Edisana ñwed Abasi Ibom

Nsobo Emi Edisimde Ubon Israel

¹ ŊKOKUT Ɔbɔŋ adade ke edem itie-uwa: ndien enye ɔdɔhɔ mi, ete, Yibi mbuot adaha man mme asaŋ-udɔk enyek, nyuŋ nuak mmɔ duɔk kpukpru ke ibuot; ndien nyewot mme ekpere-edem mmɔ ke ofut: baba owo mmɔ kiet eke otibede itɔk idifeheke: baba owo mmɔ kiet eke eyomde ndibɔhɔ idinyuŋ ibɔhɔke.

² Mmɔ ekpetibi eduk ke hell, ubɔk mi okposio mmɔ do; ekpenyuŋ edɔk ke enyɔŋ, ŋkpanam mmɔ eto do esuhɔre.

³ Ekpenyuŋ edibe ke ibuot Carmel, nyeyom mmɔ, nnyuŋ nsio mmɔ do; ekpedibe mi ke enyin ke idem isɔŋ akamba mmɔŋ, ŋkpowuk urukikɔt mi, nte oto aka okodom mmɔ do:

⁴ ndien edieke edisaŋade ke otu mbon ntaŋ mfep ke iso mme asua mmɔ, nyeteme ofut mi, nte oto aka okowot mmɔ do: nyenyuŋ ŋwuk enyin mi nse mmɔ ke idiɔk, nsehe ke mfɔn.

⁵ Onyuŋ edi Ɔbɔŋ Jehovah mme udim otuk isɔŋ, ndien enye atara; ndien kpukpru mme andiduŋ ke esit etuaŋa: enye onyuŋ ɔyɔhɔ ofuri ebiet nte akpa mmɔŋ, onyuŋ ɔsuhɔre nte akpa Egypt.

⁶ Edi enye ɔkɔŋ mme ubet enyɔŋ esie ke heaven, onyuŋ odori mme ubet isɔŋ esie ke ererimbot; emi okotde mmɔŋ inyaŋ edi, onyuŋ aŋwaŋade enye ke iso isɔŋ: Jehovah edi enyiŋ esie.

⁷ Jehovah ɔdɔhɔ, ete, Nte mbatke mbufo, nditɔ Israel, nte nditɔ Ethiopia? Nte ŋkadaha Israel ke isɔŋ Egypt ndɔk? ye mme Philistine ke Caphtor? ye Syria ke Kir?

⁸ Sese, Ɔbɔŋ Jehovah etiŋ enyin ke idiɔk idut emi, nyenyuŋ nsobo enye ke iso ererimbot mfep; edi ndisoboke ufɔk Jacob kpukpru;

⁹ Jehovah ɔdɔhɔ. Koro, sese, ami nyewuk, nyenyuŋ nsak ufɔk Israel nsin ke otu kpukpru mme idut, kpa nte emi esakde (ŋkpɔ) ke usak-ŋkpɔ, ndien baba ŋkeŋe kiet ididuɔhɔ ke isɔŋ.

¹⁰ Kpukpru mme anam-idiɔk ke otu ikɔt mi eyekpaŋa ke ofut, mme mmɔ emi edɔhɔde, ete, Idiɔk-ŋkpɔ emi idisimke nnyin, idinyuŋ isoboke ye nnyin.

¹¹ Ke usen oro nyediɔŋ ataya David emi ɔduɔde, nnyuŋ nsiri ŋwure esie; nnyuŋ ndiɔŋ ufɔk esie emi ebiarade, nnyuŋ mbɔp enye, kpa nte ke eyo oko:

¹² man mmɔ eda ubak Edom emi esuhɔde, ye kpukpru mme idut emi ekerede enyiŋ mmɔ enyene; Jehovah emi anamde ŋkpɔ emi ɔdɔhɔ.

¹³ Jehovah ɔdɔhɔ, ete, Sese, mme usen ke edi, ndien owo eke ofuŋde isɔŋ eyesim owo eke ekpeŋede ibokpot: owo eke anuakde wine eyenyuŋ osim andiwari mkpasip; ikpɔ obot eyenyuŋ etɔi obufa wine, kpukpru ŋkpri obot eyenyuŋ etara.

¹⁴ Ndien nyeda ikɔt mi Israel emi eketaŋde efep nnyɔŋ ndi: ndien mmɔ eyebɔp mme obio emi enade ikpikpu, ndien eduŋ (ke esit); mmɔ eyenyuŋ etɔ iŋwaŋ-vine, enyuŋ eŋwɔŋ wine mmɔ: enyuŋ enam iŋwaŋ, ndien edia mfri mmɔ.

¹⁵ Ndien nyetɔ mmɔ ke isɔŋ mmɔ, ndien ididibekede aba mmɔ ifep ke isɔŋ mmɔ emi ŋkɔnɔde mmɔ. Jehovah Abasi fo ɔdɔhɔ.