AMOS 3 - Edisana ñwed Abasi Ibom

Ubiomikpe ye Ufen Idiɔk Ido Nditɔ Israel

¹ NDITƆ Israel, mbufo ekop uyo emi Jehovah ɔdɔhɔde abaŋa mbufo, abaŋa ofuri oruk owo oro ami ŋkosiode ke isɔŋ Egypt ndɔk, nte,

² Ŋkɔfiɔk mbufo ikpɔŋ-ikpɔŋ ke otu kpukpru oruk ererimbot: mmɔdo nyenɔ mbufo ufen kpukpru mme idiɔk ido mbufo.

³ Nte iba eyesaŋa kiet ye kiet ke mmɔ midige esit kiet?

⁴ Nte lion okuni ke akai ke ini enye mikwe unam eke awaide? Nte akparawa lion ana ke nna esie osioro uyo, ke ini enye mimumke ŋkpɔ?

⁵ Nte ntarusuŋ omomum ke afia ke isɔŋ, ke owo mikɔkke afia inɔ enye? Nte mfine adadaha ke isɔŋ, ndien imumke baba ŋkpɔ kiet?

⁶ Nte efuri ukorowo ke obio, ndien mbio-obio inyekke idem? Nte idiɔk-ŋkpɔ odudu ke obio, ke Jehovah minamke?

⁷ Koro Ɔbɔŋ Jehovah midinamke baba ŋkpɔ kiet, ke mibɔhɔke ini enye ayarade uduak esie ɔnɔ ikɔt esie mme prophet.

⁸ Lion okuni, anie mididikheke? Ɔbɔŋ Jehovah ɔdɔhɔ, anie miditiŋke prophecy?

⁹ Mbufo ekwɔrɔ ke ikpɔ ufɔk Ashdod, ye ke ikpɔ ufɔk isɔŋ Egypt, enyuŋ edɔhɔ, ete, Mbufo esop idem ke enyɔŋ ikpɔ obot Samaria, enyuŋ ese ikpɔ ndutime ke ufɔt esie, ye nnama emi odude ke esit.

¹⁰ Jehovah ɔdɔhɔ, ete, Mmɔ ifiɔkke ndinam se inende, mmɔ ekɔ afai ye mbume ebon ke ikpɔ ufɔk mmɔ.

¹¹ Mmɔdo ntem ke Ɔbɔŋ Jehovah ɔdɔhɔ, ete, Mbon-usua eyekan idem isɔŋ ekuk: eyenyuŋ esuhɔre fi odudu fo: ndien eyebume ikpɔ ufɔk fo.

¹² Ntem ke Jehovah ɔdɔhɔ ete, Kpa nte ekpemerɔŋ osiode lion ukot iba ye ubak utɔŋ ke inua efep; kpasuk ntre ke edisioŋo nditɔ Israel emi eduŋde ke Samaria ke inuk e-bed, ye ke Damascus ke mkpana.

¹³ Ɔbɔŋ Jehovah, Abasi mme udim, ɔdɔhɔ ete, Mbufo ekop, enyuŋ etiŋ ke ufɔk Jacob, ete,

¹⁴ Ke usen eke ndidade ufen idiɔk ido Israel nnɔ enye, ke ndinyuŋ nnɔ mme itie-uwa Bethel ufen: ndien eyesibe nduk itie-uwa efep, ndien mmɔ eyeduɔŋɔ ke isɔŋ.

¹⁵ Ndien nyewuri ufɔk ukwɔ ŋkɔrɔ ye ufɔk nda-eyo; mme ufɔk oduk-enin eyenyuŋ etak, ikpɔ ufɔk eyenyuŋ ebiara. Uyo Jehovah edi emi.