AMOS 2 - Edisana ñwed Abasi Ibom

Abasi Eyenɔ Mbon Moab ye Judah ye Israel Ufen ke Idiɔk Ido Mmɔ

¹ NTEM ke Jehovah ɔdɔhɔ, ete, Idiɔk ido Moab ita ye inaŋ iyakke mi ŋkabare enye (ufen) mfep: koro mmɔ ekefɔpde mme ɔkpɔ ndidem Edom enam ndom.

² Ndien nyekim ikaŋ ke Moab, eke editade ikpɔ ufɔk Kerioth: ndien Moab eyekpa ke ndutime ye ke mkpo, ye ke uyo ukorowo.

³ Ndien nyesibe enye ebierikpe ke ufɔt mfep, nnyuŋ ŋwot kpukpru mbɔŋ esie ŋko. Uyo Jehovah edi emi.

⁴ Ntem ke Jehovah ɔdɔhɔ ete, Idiɔk ido Judah ita ye inaŋ iyakke mi ŋkabare enye (ufen) mfep: koro mmɔ esinde mbet Jehovah ke ndek, ndien minimke mme ewuhɔ esie; nsu mmɔ eke mme ete mmɔ eketienede esin mmɔ ediyo.

⁵ Ndien nyekim ikaŋ ke Judah, eke editade ikpɔ ufɔk Jerusalem.

⁶ Ntem ke Jehovah ɔdɔhɔ, ete, Idiɔk ido Israel ita ye inaŋ iyakke mi ŋkabare enye (ufen) mfep: koro mmɔ ekenyamde nti owo ke silver, enyam eyen ubuene ke ikpa-ukot iba;

⁷ itɔŋ ntanisɔŋ ke ibuot mbon-unana ɔdɔŋ mmɔ, mmɔ enyuŋ efimede usuŋ mbon ukut efep; ndien owo ye ete esie etiene eyen-aŋwan kiet, man esabare edisana enyiŋ mi.

⁸ Mmɔ enyuŋ enyanare ena ke edisine-ŋkpɔ ubiɔŋ ke ŋkaŋ kpukpru itie-uwa; enyuŋ eŋwɔŋ wine mbon isop ke ufɔk mme abasi mmɔ.

⁹ Ndien ami ŋkebin mme Amorite ke iso mmɔ mfep, emi idaha mmɔ okoŋde nte cedar, mmɔ enyuŋ esɔŋ nte ofriyo; ndien ŋkosobo mfri esie ke enyɔŋ, ye oruŋ ke idak.

¹⁰ Ami ŋkonyuŋ nda mbufo ke isɔŋ Egypt ndɔk, nnyuŋ nda mbufo ke usuŋ wilderness ke isua aba, man eda isɔŋ mme Amorite enyene.

¹¹ Ndien nda ndusuk nditɔ-iren mbufo nnim ke prophet, nda ndusuk mkparawa mbufo nnim ke Nazirite. Nte idighe kpa ntre, mbufo nditɔ Israel? Emi edi uyo Jehovah.

¹² Ndien mbufo ekenɔ mme Nazirite wine eŋwɔŋ, enyuŋ ewuk mme prophet, ete, “Mbufo ekutiŋ prophecy.”

¹³ Sese, ami mmɔŋ mmiŋ mbufo nsin ke idak, kpa nte ukpat-ŋkpɔ eke ebek eyɔhɔde ke esit emiŋde.

¹⁴ Ndien ubɔhɔ mbon nsɔp-itɔk atak: ɔkpɔsɔŋ owo idinyuŋ isɔŋɔke odudu, owo uko idinyuŋ ikemeke ndinyaŋa idem esie:

¹⁵ Ndien owo eke akamade utiga ididaha: ɔsɔp ukot idinyuŋ ibɔhɔke; owo eke odorode ke horse idinyuŋ inyaŋake uwem esie.

¹⁶ Jehovah onyuŋ ɔdɔhɔ, ete, Owo eke ɔsɔŋde esit ke otu mbon-uko eyefehe iferi ke usen oro.