AMOS 1 - Edisana ñwed Abasi Ibom

Abasi Eyenɔ Kpukpru Mbɔhɔiduŋ Israel Ufen ke Idiɔk Ido Mmɔ

¹ IKƆ Amos emi okodude ke otu mme ekpemerɔŋ Tekoa, emi enye okokutde abaŋa Israel, ke eyo Uzziah edidem Judah, ye ke eyo Jeroboam eyen Joash, edidem Israel, ebem unyek-isɔŋ isua iba.

² Ndien enye ɔdɔhɔ ete, Jehovah etie ke Zion ofiori, onyuŋ etie ke Jerusalem okuni: ndien mbiet mme ekpeme-ufene etuaŋa, ibuot Carmel onyuŋ asat.

³ Ndien Jehovah ɔdɔhɔ, ete, Idiɔk ido Damascus ita ye inaŋ iyakke mi ŋkabare enye (ufen) mfep; koro mmɔ enuakde Gilead ke ŋkpɔ ubek-ibokpot emi enamde ke ukwak.

⁴ Ndien nyekim ikaŋ ke ufɔk Hazael, ndien enye eyeta ikpɔ ufɔk Benhadad.

⁵ Jehovah ɔdɔhɔ, ete, Ndien nyebuŋ eto usin-usuŋ Damascus, nnyuŋ nsibe mme andiduŋ itihere Aven, ye andikama mmɔnyɔ ke Beth-eden mfep: ndien eyetaŋ nditɔ Syria eka ke Kir.

⁶ Ntem ke Jehovah ɔdɔhɔ, ete, Idiɔk ido Gaza ita ye inaŋ iyakke mi ŋkabare enye (ufen) mfep: koro mmɔ eketaŋde ata ediwak owo efep, eka ekeyak enɔ Edom.

⁷ Ndien nyekim ikaŋ ke ibibene Gaza, ndien enye eyeta ikpɔ ufɔk esie.

⁸ Nyenyuŋ nsibe andiduŋ Ashdod, ye andikama mmɔnyɔ ke Ashkelon mfep, nnyuŋ ndori ubɔk mi ke Ekron: ndien mme Philistine emi esuhɔde eyetak. Ntem ke Ɔbɔŋ Jehovah ɔdɔhɔ.

⁹ Ntem ke Jehovah ɔdɔhɔ, ete, Idiɔk ido Tyre ita ye inaŋ iyakke mi ŋkabare enye (ufen) mfep: koro mmɔ ekemende ofuri mbon ntaŋ-mfep eyak enɔ Edom, ndien mitihi ediomi nditɔ-ete.

¹⁰ Ndien nyekim ikaŋ ke ibibene Tyre, eke editade ikpɔ ufɔk esie.

¹¹ Ntem ke Jehovah ɔdɔhɔ, ete, Idiɔk ido Edom ita ye inaŋ iyakke mi ŋkabare enye (ufen) mfep; koro enye akadade ofut ebine eyen-ete esie, onyuŋ ɔduɔk mbɔm, iyaresit esie onyuŋ osuk awai ke nsinsi, enye onyuŋ ɔkɔhɔde ifuresit esie ke nsinsi.

¹² Ndien nyekim ikaŋ ke Teman, eke editade ikpɔ ufɔk Bozrah.

¹³ Ntem ke Jehovah ɔdɔhɔ, ete, Idiɔk ido nditɔ Ammon ita ye inan iyakke mi ŋkabare enye (ufen) mfep; koro mmɔ esiakde iban idibi ke Gilead, man esehere adaŋa mmɔ.

¹⁴ Ndien ami nyebara ikaŋ ke ibibene Rabbah, eke editade ikpɔ ufɔk mmɔ ke mkpo ke usen ekɔŋ, ye ke idio ke usen oyobio:

¹⁵ ndien eyetaŋ edidem mmɔ enyɔŋ, kpa enye ye mbɔŋ esie ini kiet. Uyo Jehovah edi emi.