2 SAMUEL 4 - Edisana ñwed Abasi Ibom

Recab ye Baanah Ewot Ishbosheth

¹ EKEM adaŋemi eyen Saul okopde ete ke Abner ama akpa ke Hebron, ubɔk emem enye, nsia onyuŋ oyomo ofuri Israel.

² Ndien owo iba emi edide mme etubom udim-ekɔŋ edu ye eyen Saul; enyiŋ kiet ekere Baanah, enyiŋ kiet eken onyuŋ ekere Rechab, nditɔ Rimmon Beerothite emi etode nditɔ Benjamin: koro ebatde Beeroth ke eke Benjamin ŋko-ŋko:

³ koro mme Beerothite ekefehede eka Gittaim, enyuŋ edi oduduŋ do tutu osim mfin emi.

⁴ Jonathan, eyen Saul, okonyuŋ obon eyen mbuŋɔ ke ukot esie. Enye edi eyen isua ition ke ini etop Saul ye Jonathan otode ke Jezreel, ndien edep esie emen enye efehe; ndien edikem ke ini enye efehede ke nnyekidem, eyen ɔduɔ, obuŋ ukot. Ndien enyiŋ esie ekere Mephibosheth.

⁵ Ekem nditɔ Rimmon Beerothite, Rechab ye Baanah, esaŋa ke ufɔt uwemeyo eka ke ufɔk Ish-bosheth, emi anade ke mkpana ke ufɔt uwemeyo.

⁶ Ndien mmɔ ebiom wheat ebe eduk do ke ufɔt ufɔk, ekekim enye ke idibi: ndien Rechab ye Baanah eyeneka esie efehe.

⁷ Ntre ke mmɔ ekeduk ke ufɔt ufɔk, ke ini enye anade ke bed esie ke ubet nna esie, enyuŋ ekim enye ewot, enyuŋ ebigi enye ibuot, emen ibuot esie esaŋa ke usuŋ itihere Jordan ke ofuri okoneyo.

⁸ Ndien mmɔ eda ibuot Ish-bosheth edisɔk David ke Hebron, enyuŋ edɔhɔ edidem, ete, Se ibuot Ish-bosheth, eyen Saul, owo usua fo oro okoyomde uwem fo; ntem ke Jehovah ama osio usiene ye Saul, ye ubon esie, ɔnɔ ɔbɔŋ mi edidem mfin emi.

⁹ Ndien David ɔbɔrɔ Rechab ye Baanah eyenete esie, nditɔ Rimmon Beerothite, onyuŋ ɔdɔhɔ mmɔ, ete, Ma uwem Jehovah, emi akafakde uwem mi osio ke kpukpru nnanenyiŋ,

¹⁰ Adaŋemi owo kiet eketiŋde ɔnɔ mi, ete ke Saul ama akpa, enye onyuŋ abat idem esie ke andibuk eti mbuk, mma mmum enye ŋwot ke Ziklag, emi ami ŋkɔnɔde enye ke ŋkpɔ eti mbuk esie:

¹¹ ŋwaŋawa edi nso ke adaŋemi mme idiɔk owo ewotde edinen owo ke ufɔk esie, ye ke bed esie, ke nnyene ndiyom iyip esie ke ubɔk mbufo, nyuŋ nsɔhi mbufo ke isɔŋ mfep?

¹² Ndien David ɔdɔhɔ mkparawa esie, ndien mmɔ ewot mmɔ, enyuŋ ekpok mmɔ ubɔk ye ukot, enyuŋ eyiri mmɔ ke mben mkpɔdiɔhɔ-mmɔŋ ke Hebron. Edi mmɔ emen ibuot Ish-bosheth ekebuk ke udi Abner ke Hebron.