2 SAMUEL 17 - Edisana ñwed Abasi Ibom

Item Ahithophel ye Hushai Ekenɔde Absolom

¹ AHITHOPHEL onyuŋ ɔdɔhɔ Absalom, ete, Mbɔk, yak ŋkam nsat tɔsin owo duopeba, man ndaha ke enyɔŋ mbine David ke okoneyo emi:

² ndien nyesim enye ke ini enye akpade mba, ubɔk onyuŋ ememde enye; nnyuŋ nsin enye ndik: ndien kpukpru owo emi edude ye enye eyefeŋe; ndien nyewot edidem ikpɔŋ-ikpɔŋ:

³ nyenyuŋ nda kpukpru owo mfiak nsɔk fi: adaŋemi kpukpru owo emi afo oyomde efiakde edi, ofuri obio eyetie ke emem.

⁴ Ndien ikɔ oro enem Absalom ye kpukpru mbiowo Israel.

⁵ Ndien Absalom ɔdɔhɔ ete, Kam kot Hushai Arkite kaŋa, man nnyin ikop se enye edinyuŋ ɔdɔhɔde.

⁶ Edikem adaŋemi Hushai edide ke ɔtɔ Absalom, Absalom ɔdɔhɔ enye, ete, Ahithophel ɔdɔhɔ ikɔ ntem: nte nnyin inam ke uyo esie, mme ikunam? Dɔhɔ okuo.

⁷ Ndien Hushai ɔdɔhɔ Absalom, ete, Item emi Ahithophel etemede ifɔnke ke idahemi.

⁸ Ndien Hushai ɔdɔhɔ ete, Afo ɔmɔfiɔk usɔ ye ikɔt esie, ete ke mmɔ edi mbon uko, esit onyuŋ ayat mmɔ, nte bear eke ewotde nditɔ esie ke ikɔt; usɔ onyuŋ edi owo ekɔŋ, idinyuŋ idaŋke ke otu mmɔ eken ke okoneyo.

⁹ Sese, enye ke odibe ke emi ke obube kiet, mme ke ebiet efen: ndien, ama ekem, adaŋemi ndusuk mmɔ eduɔŋɔde ke eritɔŋɔ, owo eke edikopde eyedɔhɔ ete, Emewot ndusuk mmɔ eke etienede Absalom ke edem.

¹⁰ Ndien nsia eyeyomo kpa owo eke adade uko, eke esit esie ebietde esit lion: koro ofuri Israel emefiɔk ete ke usɔ edi owo uko, mme mmɔ emi edude ye enye enyuŋ edi mbon uko nde.

¹¹ Edi ami nteme, nte, Yak ofuri Israel, ɔtɔŋɔde ke Dan tutu osim ke Beersheba, ebono ke ɔtɔ fo, nte ntan emi odude ke mben inyaŋ ke uwak; afo ke idemfo nyuŋ ka ekɔŋ.

¹² Ndien nnyin iyesim enye ke ebiet kiet eke enye odude do, iyenyuŋ ifuk enye nte mbara ekeŋede ke isɔŋ: ndien enye ye baba owo kiet ke otu mmɔ emi edude ye enye idinyuŋ ibɔhɔke.

¹³ Ndien edieke mmɔ esopde ke obio, ofuri Israel eyetebe idut ke obio oro, nnyin iyenyuŋ idudi enye isin ke akpa, ndien baba ekpri itiat kiet idi suhɔke do.

¹⁴ Ndien Absalom, ye kpukpru owo Israel edɔhɔ ete, Item Hushai Arkite ɔfɔn akan item Ahithophel. Koro Jehovah okonimde ete edi ntre, man enye asuan eti item Ahithophel, kpaŋ Jehovah akpanam idiɔk-ŋkpɔ osim Absalom.

¹⁵ Ekem Hushai ɔdɔhɔ Zadok ye Abiathar mme oku, ete, Ntem-ntem ke Ahithophel eketeme Absalom, ye mbiowo Israel; ntem-ntem ke ami ŋkonyuŋ nteme.

¹⁶ Mbufo ewara ndien edɔŋ ekedɔhɔ David, ete, Kudaŋ ke okoneyo emi ke wilderness ke ebiet-ube-inyaŋ, edi bebe; mbak edimen edidem ye kpukpru mmɔ emi edude ye enye emen.

¹⁷ Ndien Jonathan ye Ahimaaz etie ekpere En-rogel; ndien eyenaŋwan kiet aka eketiŋ ɔnɔ mmɔ; ndien mmɔ eka eketiŋ enɔ edidem David: koro mmɔ mikekemeke ndiduk ke obio, mbak edikut mmɔ.

¹⁸ Edi eyenɔwɔŋ kiet okut mmɔ, ndien aka eketiŋ ɔnɔ Absalom: edi mmɔ mbiba esɔp itɔk eka, ekeduk ke ufɔk owo kiet ke Bahurim emi enyenede obube mmɔŋ ke okure esie: ndien mmɔ esuhɔre eduk do.

¹⁹ Ndien ŋwan esie ada ufuhɔ-ŋkpɔ ebri ke inua obube mmɔŋ oro, onyuŋ asuan edikɔk ibokpot ke esit; ndien baba owo kiet ifiɔkke ŋkpɔ oro.

²⁰ Ekem ikɔt Absalom eto edisim ŋwan oro ke ufɔk, enyuŋ ebup ete, Enye Ahimaaz ye Jonathan? Ndien ŋwan oro ɔdɔhɔ mmɔ, ete, Mmɔ ema ebe ekpri idim mmɔŋ. Ndien adaŋemi mmɔ eyomde mmɔ, ndien mikwe, mmɔ efiak ke Jerusalem.

²¹ Edikem adaŋemi mmɔ oro enyɔŋde, mmɔ eto ke obube edɔk, enyuŋ eka eketiŋ enɔ edidem David, enyuŋ edɔhɔ David, ete, Mbufo edaha ke enyɔŋ ewara ebe inyaŋ: koro ntem ke Ahithophel ɔkɔnɔ item abaŋa mbufo.

²² Ndien David ye kpukpru mmɔ eke edude ye enye edaha ke enyɔŋ esaŋa ebe Jordan: ke ini eyo esierede baba owo kiet eke mibehe Jordan isuhɔke.

²³ Ekem, adaŋemi Ahithophel okutde ete ke itieneke item imɔ, enye ɔdiɔŋ ass esie, adaha ke enyɔŋ, aka ke ufɔk esie, ke obio esie, okotim ŋkpɔ ufɔk esie, ndien eyire akpa, onyuŋ ɔbuhɔ ke udi ete esie.

²⁴ Ekem David osim ke Mahanaim. Absalom onyuŋ asaŋa ebe Jordan, ye kpukpru mbio Israel ŋko.

²⁵ Ndien Absalom onim Amasa ke etubom mbon-ekɔŋ ke ibuot Joab: ndien Amasa edi eyen owo ekere Ithra, Israelite kiet, emi okokotde Abigail, eyen Nahash aŋwan, eyeneka Zuruiah eka Joab aŋwan.

²⁶ Ntre ke Israel ye Absalom enam nna-ekɔŋ ke isɔŋ Gilead.

²⁷ Edikem adaŋemi David osimde Mahanaim, Shobi eyen Nahash, emi okotode ke Rabbah nditɔ Amnon, ye Machir eyen Ammiel ke Lo-debar, ye Brazillai Gileadite ke Rogelim,

²⁸ eda mbri, ye basin, ye eso, ye wheat, ye barley, ye ndom-uyo, ye edifɔp ibokpot, ye ɔkɔti ye lentil,

²⁹ ye se efɔpde, ye aran-ɔkwɔk, ye edibari mmɔŋ-eba, ye ŋkpri ufene, ye cheese enaŋ, edisɔk David, ye mmɔ eke edude ye enye, ete mmɔ edia ŋkpɔ: koro edɔhɔde ete, Mmɔ oro emekpa biɔŋ, enyuŋ ekpɔt, enyuŋ esat itɔŋ ke wilderness.