2 SAMUEL 15 - Edisana ñwed Abasi Ibom

Absolom Odiomi Ndidorode David ke Ebekpo

¹ EDIKEM adaŋemi ŋkpɔ emi ema ekebe, Absalom otim chariot ye horse ke idemesie ye owo aba ye duop eke efeŋede enye ke iso.

² Absalom onyuŋ abak edemere, aka akada ke mben usuŋ ke inua-otop; ndien edikem ama edi owo ekededi eke enyenede ikɔ eke enye adade aka ke iso edidem, ete enye ekpe, Absalom ofiori okot enye, onyuŋ ɔdɔhɔ ete, Afo oto ke ewe obio? Ndien enye ɔdɔhɔ ete, Owo fo oto ke esien Israel kiet.

³ Ndien Absalom ɔdɔhɔ enye, ete, Sese, ikɔ fo ɔfɔn, onyuŋ enen; edi edidem inimke baba owo kiet eke okpokopde, inɔ fi.

⁴ Absalom onyuŋ ɔdɔhɔ ete, Akpakam enim mi ke ebierikpe ke idut emi, man kpukpru owo eke enyenede ikɔ, mme ikpe eda etiene mi, ndien ŋkpekpe ikɔ esie nte enende.

⁵ Ndien edikem, adaŋemi owo asaŋade ekpere ndituak ibuot nnɔ enye, enye anyan ubɔk esie omum enye, onyuŋ otim enye inua.

⁶ Absalom onyuŋ anam ntre-ntre ye ofuri Israel eke edide ikpe ke ɔtɔ edidem; ntem ke Absalom onyuŋ oyip esit nditɔ Israel.

⁷ Edikem ke utit isua aba, Absalom ɔdɔhɔ edidem, ete, mbɔk, yak ŋka ke Hebron ŋkanam akaŋa mi emi ŋkakaŋake nnɔ Jehovah.

⁸ Koro owo fo akakaŋade akaŋa ke ini oro ŋkoduŋde ke Geshur ke Syria, nte, Edieke Jehovah edidade mi afiak ke Jerusalem, nyenam ŋkpɔ Jehovah.

⁹ Ndien edidem ɔdɔhɔ enye, ete, Saŋa suŋ. Ndien enye adaha ke enyɔŋ aka ke Hebron.

¹⁰ Ekem Absalom ɔdɔŋ mbon-uyep, ete esaŋa ke kpukpru esien Israel, edɔhɔ ete, Ke ini mbufo edikopde uyo ukorowo, mbufo edɔhɔ ndien, ete, Absalom amada ubɔŋ ke Hebron.

¹¹ Ndien owo ikie iba emi ekekotde, emi enyuŋ ekade ke eti esit, minyuŋ ifiɔkke baba ŋkpɔ kiet, enyuŋ eto ke Jerusalem esaŋa ye Absalom.

¹² Absalom onyuŋ ɔdɔŋ ekekot Ahithophel Gilonite, owo item David, ke Giloh obio esie, ke ini enye awade uwa. Odu oro onyuŋ ɔsɔŋ; koro mmɔ emi edude ye Absalom ediɔŋde diɔŋ ewak eka iso.

¹³ Ekem owo edi editiŋ ɔnɔ David, ete, Esit nditɔ Israel amakabare etiene Absalom.

¹⁴ Ndien David ɔdɔhɔ kpukpru ikɔt esie emi edude ke Jerusalem ye enye, ete, Mbufo edaha ke enyɔŋ, nnyin ifeŋe; koro minyeneke nte nnyin idibɔhɔde ke iso Absalom: mbufo, emen idem edaŋa, mbak enye edide edibuat nnyin, onyuŋ ada idiɔk-ŋkpɔ oro anam nnyin, onyuŋ osobo obio ke iso ofut.

¹⁵ Ndien ikɔt edidem edɔhɔ edidem, ete, Sese, ikɔt fo ke eda ke ndinam kpukpru se ɔbɔŋ mi edidem oyomde.

¹⁶ Ekem edidem ɔwɔrɔ, ofuri ufɔk esie enyuŋ etiene enye. Edidem onyuŋ ɔkpɔŋ iban-esa duop, ete, ekpeme ufɔk.

¹⁷ Ntre ke edidem ɔwɔrɔ, kpukpru owo enyuŋ etiene enye, Ndien mmɔ etuak eda ke Beth-merhak.

¹⁸ Kpukpru ikɔt esie enyuŋ esaŋa enye ke ŋkaŋ, kpukpru mme Cherethite, ye kpukpru mme Pelethite, ye kpukpru mme Gittite, owo ikie itiokiet emi ekekotde ke Gath etiene enye,enyuŋ ebe edidem iso.

¹⁹ Ndien edidem ɔdɔhɔ Ittai eyen Gath, ete, Ke didie ke afo ŋko oyom nditiene nnyin ŋka? Fiak ka ketie ye edidem: koro afo edide esen owo, omonyuŋ ɔkpɔŋ edem mbufo oyom ebiet iduŋ fo.

²⁰ Afo ekedi mkpɔŋ; nte ɔfɔn mi ndiyak fi asaŋa ediyo ye nnyin mfin? Ndien ami ŋka ke ebiet eke ŋkade; fiak, nyuŋ da nditɔ-usɔ fiak ŋko: yak ima ye akpanikɔ esuk edu ye afo.

²¹ Edi Ittai ɔbɔrɔ edidem, ete, Ma uwem, Jehovah ye uwem ɔbɔŋ mi edidem ke ebiet eke ɔbɔŋ mi edidem, edidude, edide ke mkpa, onyuŋ edide ke uwem, ke owo fo edidu ŋko.

²² Ndien David ɔdɔhɔ Ittai, ete, Saŋa be. Ndien Ittai asaŋa ebe, ye kpukpru ikɔt esie, ye kpukpru nditɔwɔŋ emi edude ye enye.

²³ Ofuri obio enyuŋ etua ke ɔkpɔsɔŋ uyo; kpukpru owo enyuŋ esaŋa ebe edidem ŋko ebe ebedeŋ Kidron, kpukpru owo enyuŋ ebe, eka edem wilderness.

²⁴ Ndien, sese, Zadok ŋko, ye kpukpru mme Levite ŋko-ŋko, ke ebiom ekebe ediomi Abasi: ndien mmɔ ediɔk ekebe Abasi, Abiathar onyuŋ ɔdɔk, tutu kpukpru owo eto ke obio edibe ema.

²⁵ Ndien edidem ɔdɔhɔ Zadok, ete, Men ekebe Abasi fiak ke obio: edieke Jehovah edimade mi, enye eyenam mi mfiak ndi, eyenyuŋ owut mi idem esie ye iduŋ esie:

²⁶ edi edieke enye ɔdɔhɔde ntem, ete, Mmaŋa fi: se mi mi, yak enye anam mi nte enye amade.

²⁷ Edidem onyuŋ ɔdɔhɔ Zadok, oku ete, O owo ŋkukut! fiak ke obio ke ifure, ye nditɔ-iren mbufo mbiba ŋko, Ahimaaz eyen fo, ye Jonathan eyen Abiathar,

²⁸ Sese, ami nyetie ke wilderness ke ebiet ube inyaŋ, tutu mbufo enɔ ikɔ edisian mi.

²⁹ Ndien Zadok ye Abiathar emen ekebe Abasi efiak ke Jerusalem, ekeduŋ do.

³⁰ Ekem David ɔdɔk ke obot Olive, ɔdɔk, atuak eyet, onyuŋ ɔfuhɔ ŋkpɔ ke ibuot esie, onyuŋ asaŋa ɔfiɔn ikpat; ndien kpukpru owo eke edude ye enye enyuŋ efuhɔ ibuot mmɔ; mmɔ enyuŋ edɔk, etua eyet ŋko.

³¹ Ekem owo etiŋ ɔnɔ David, ete ke Ahithophel odu ke otu mbon-odu ye Absalom. Ndien David ɔdɔhɔ ete, O Jehovah, mbɔk, nam item Ahithophel akabare edi ndisime.

³² Ekem adaŋemi David osimde ke ibuot obot, emi enye atuakde ibuot do ɔnɔ Abasi, sese, Hushai Archite edisobo ye enye, edisine-ŋkpɔ esie ewaha, ntan onyuŋ odoro enye ke ibuot.

³³ Ndien David ɔdɔhɔ enye, ete, Afo ama asaŋa ye ami ebe, afo eyedobi mi mbiomo:

³⁴ edi ama afiak aka obio, onyuŋ ɔdɔhɔ Absalom, ete, Nyedi owo fo, O edidem; mma ndi owo usɔ totoko, edi ke emi ami ndi owo fo: ndien afo eyesuan item Ahithophel ɔnɔ mi.

³⁵ Nte Zadok ye Abiathar mme oku inyuŋ iduhe ye afo do? Ndien ama ekem, men kpukpru ikɔ eke afo edikopde ke ufɔk edidem, tiŋ nɔ Zadok ye Abiathar mme oku.

³⁶ Sese, nditɔ mmɔ mbiba edu ye mmɔ do, Ahimaaz, eyen Zadok, ye Jonathan, eyen Abiathar; mbufo emen ndien kpukpru ikɔ eke edikopde edɔŋ mmɔ edidɔhɔ mi.

³⁷ Ntre ke Hushai ufan David oduk ke obio. Ndien Absalom osim Jerusalem.