2 SAMUEL 14 - Edisana ñwed Abasi Ibom

Absolom Ɔtɔŋɔ Ntak Ɔnyɔŋ Edi Jerusalem

¹ EKEM Joab eyen Zeruiah ɔfiɔk ete ke esit edidem asua Absalom.

² Ndien Joab ɔdɔŋ eka ke Tekoa, ekeda ɔfiɔkŋkpɔ ŋwan do edi, onyuŋ ɔdɔhɔ enye, ete, Mbɔk nim idemfo nte ŋwan eke etiede ikpo, nyuŋ sine ɔfɔŋ-idem ikpo, kunyuŋ uyere aran, edi nim idemfo nte ŋwan eke etiede ikpo anyan ini abaŋa akpa mkpa:

³ nyuŋ ka ke ebiet edidem ketiŋ ikɔ emi nɔ enye. Joab onyuŋ esin enye ikɔ ke inua.

⁴ Ekem ke ini ŋwan a Tekoa oro ɔdɔhɔde ye edidem, ŋwan ɔduɔ ke isɔŋ okubi iso esie, onyuŋ atuak ibuot, ete, Nyaŋa, O edidem!

⁵ Ndien edidem obup enye, ete, Nsinam fi? Ndien ŋwan ɔbɔrɔ ete, Ŋkɔm ami ndi ŋwan emi ebe mi akpade.

⁶ Ofin aŋwan fo okonyuŋ enyene nditɔ-iren iba, ndien mmɔ mbiba eŋwana eŋwan ke iŋwaŋ, baba owo kiet eke adianarede mmɔ efep inyuŋ iduhe ndien kiet ɔtɔ kiet owot.

⁷ Ndien, sese, ofuri oruk nnyin emedaha ke enyɔŋ enam ikɔ ye ofun aŋwan fo, enyuŋ edɔhɔ ete, Nɔ anditɔ eyeneka esie, man nnyin inyuŋ iwot enye ibaŋa uwem eyeneka esie emi enye okowotde; ndien nnyin iyenyuŋ isobo adia-akpa ŋko: ndien ntre ke mmɔ edinime ebok ikaŋ mi emi ɔsuhɔde, idinyuŋ isuhɔke enyiŋ ye nsuhɔ inɔ ebe mi ke iso isɔŋ.

⁸ Ndien edidem ɔdɔhɔ ŋwan oro, ete, Nyɔŋ ufɔk fo, ndien ami nyewuk ewuhɔ mbaŋa fi.

⁹ Ndien ŋwan a Tekoa oro ɔdɔhɔ edidem, ete, O ɔbɔŋ mi, edidem, yak idiɔk-ŋkpɔ emi obiomo mi ye ufɔk ete mi: edi edidem ye ebekpo esie ekudue isop.

¹⁰ Ndien edidem ɔdɔhɔ ete, Owo ɔdɔhɔ fi ikɔ, da enye sɔk mi, ndien enye iditɔŋɔke aba ntak ituk fi.

¹¹ Ndien ŋwan oro ɔdɔhɔ ete, Mbɔk, yak edidem eti Jehovah Abasi fo, man osio-usiene iyip okusobo aka iso, mbak mmɔ edisobo eyen mi. Ndien enye ɔdɔhɔ ete, Ma uwem Jehovah, idet eyen fo ndomo kiet ididuɔhɔ ke isɔŋ.

¹² Ndien ŋwan oro ɔdɔhɔ ete, Mbɔk, yak ofin aŋwan fo etiŋ ikɔ kiet ɔnɔ ɔbɔŋ mi, edidem. Ndien enye ete, Dɔhɔ.

¹³ Ndien ŋwan oro ɔdɔhɔ ete, Nsinam afo ekerede ntre abaŋa ikɔt Abasi? Ndien emi edidem ɔdɔhɔde ikɔ emi, enye etie nte owo eke eduede, koro edidem miyakke eyen esie emi ebinde efep, afiak edi.

¹⁴ Koro nnyin inyenede ndikpa, inyuŋ ibiet mmɔŋ eke eduɔkde ke isɔŋ eke midikohi; Abasi inyuŋ imenke ukpɔŋ ifep: edi ekere ekikere ete ikubin owo esie eke ekebinde, ifep.

¹⁵ Ndien ke emi eke ndide ndidɔhɔ ikɔ emi nnɔ edidem ɔbɔŋ mi, edi koro mbio-obio ekenamde mi ndikhe: ofin aŋwan fo ɔkɔdɔhɔ ete, Yak ŋkam nneme ye edidem; mme edidem eyenam ke uyo ofin aŋwan esie.

¹⁶ Koro edidem eyekop, onyuŋ osio ofin aŋwan esie ke ubɔk owo emi oyomde ndisobo mi ye eyen mi ke udeme Abasi mfep ini kiet.

¹⁷ Ndien ofin aŋwan fo ɔdɔhɔ ete, Yak uyo ɔbɔŋ mi edidem akam edi eke nduɔk-odudu: koro ɔbɔŋ mi edidem etiede kpa nte angel Abasi ndikop eti ye idiɔk: Jehovah Abasi fo onyuŋ odu ye afo.

¹⁸ Ndien edidem ɔbɔrɔ, onyuŋ ɔdɔhɔ ŋwan oro, ete, Mbɔk, kudip mi ikɔ emi ami ndibupde fi. Ndien ŋwan ete, Yak ɔbɔŋ mi edidem ɔdɔhɔ, ndien.

¹⁹ Ndien edidem obup ete, Nte ubɔk Joab odu ye afo ke ofuri ikɔ emi? Ndien ŋwan ɔbɔrɔ ete, Ma uwem fo, ɔbɔŋ mi, O edidem, ŋkpɔ baba kiet iduhe se ɔbɔŋ mi edidem ɔdɔhɔde ke ufien ye ke nnasia: koro edi owo fo Joab eketeme mi, onyuŋ esin ofin aŋwan fo kpukpru ikɔ emi ke inua:

²⁰ Joab owo fo anam ŋkpɔ emi, man esin idem ŋkpɔ emi akabare: edi ɔbɔŋ mi ɔfiɔk ŋkpɔ, kpa nte ifiɔk angel Abasi, ke ɔfiɔk kpukpru se idude ke isɔŋ.

²¹ Ndien edidem ɔdɔhɔ Joab ete, Sese, mbɔk, mmanam ŋkpɔ emi: ka ndien, kada eyen oro kpa Absalom fiak di.

²² Ndien Joab ɔduɔ ke isɔŋ okubi iso esie, onyuŋ atuak ibuot, onyuŋ ɔkɔm edidem: ndien Joab ɔdɔhɔ ete, Mfin emi ke owo fo ɔfiɔk ete ke afo amama mi, ɔbɔŋ mi, O edidem, koro edidem amanam ke uyo owo esie.

²³ Ekem, Joab adaha ke enyɔŋ aka Geshur, akada Absalom edi ke Jerusalem.

²⁴ Ndien edidem ɔdɔhɔ ete, Yak enye ɔwɔŋɔre aka ke ufɔk esie, okunyuŋ okut mi iso. Ntre ke Absalom ɔwɔŋɔre aka ke ufɔk esiemɔ: inyuŋ ikwe edidem iso.

²⁵ Baba owo kiet eke eyede nte Absalom inyuŋ iduhe ke ofuri Israel, emi etorode eti-eti: ɔtɔŋɔde ke ikpat ukot esie tutu osim ke etiŋe ibuot enye inyeneke baba ndo kiet.

²⁶ Ndien adaŋemi enye afatde ibuot esie, (ndien ke utit kpukpru isua ke enye afat idet, koro odobide enye, mmɔdo afatde enye); ndien edomo idet ibuot esie, shekel ikie iba, nte itiat idomo edidem asaŋade.

²⁷ Ndien nditɔ-iren ita emana enɔ Absalom, ye eyen-aŋwan kiet ekere Tamar: enye ekedi ŋwan uyai idem.

²⁸ Ntre ke Absalom oduŋ ke Jerusalem ke ofuri isua iba, inyuŋ ikwe iso edidem.

²⁹ Ekem Absalom ɔdɔŋ owo utom ke ɔtɔ Joab, ete edida imɔ ɔsɔk edidem; edi enye inyimeke ndika ke ebiet esie: ndien enye ɔtɔŋɔ ntak ɔdɔŋ, edi enye inyimeke ndidi.

³⁰ Ndien enye ɔdɔhɔ ikɔt esie, ete, Sese, iŋwaŋ Joab emekpere okim, enye onyuŋ enyene barley do; mbufo eka ekefɔp enye ke ikaŋ. Ndien ikɔt Absalom efɔp iŋwaŋ oro ke ikaŋ.

³¹ Ndien Joab adaha ke enyɔŋ, etiene Absalom ke ufɔk esie, okobup enye, ete, Nsinam ikɔt fo efɔpde iŋwaŋ mi ke ikaŋ?

³² Ndien Absalom ɔdɔhɔ Joab, ete, Sese, ŋkɔdɔŋ ekedɔhɔ fi ete, Di ken, man ndɔŋ fi utom ke ɔtɔ edidem, ɔkɔdɔhɔ ete, Ŋkanam didie nto ke Geshur ndi? Ɔkpɔfɔn mi ndikam ndu do ke emi: kam yak ŋkut edidem iso; ndien edieke idiɔk ŋkpɔ odude mi ke ubɔk, yak enye owot mi.

³³ Ekem Joab aka ke ebiet edidem eketiŋ ye enye; ndien enye (edidem) okot Absalom edi, ndien enye etiene edidem, edinuhɔ ɔnɔ enye okubiso esie ke isɔŋ ke iso edidem; ndien edidem otim Absalom inua.