2 SAMUEL 10 - Edisana ñwed Abasi Ibom

David Akan Nditɔ Ammon ye Mbon Syria ke Ekɔŋ

¹ EDIKEM ke ŋkpɔ emi ebede, edidem nditɔ Ammon akpa, Hanun eyen esie onyuŋ osuk enye ke ibuot ke edidem.

² Ndien David ɔdɔhɔ ete, Nyenam mfɔn-ido ye Hanun eyen Nahash, kpa nte ete esie akanamde mfɔn-ido ye ami. Ndien David ɔdɔŋ ikɔt esie, ete eka ekedɔŋ enye esit ebaŋa ete esie.

³ Ndien ikɔt Daivd eka ke isɔŋ nditɔ Ammon. Ndien mbɔŋ nditɔ Ammon edɔhɔ ɔbɔŋ mmɔ, ete, Nte etie fi nte David okpokpono usɔ, ke eridɔŋ mbon ndɔŋesit utom ke ɔtɔ fo? Nte David idɔŋ ke ikɔt esie utom ke ɔtɔ fo, man eduŋɔde obio, enyuŋ eyep enye, kpaŋ okposobo enye?

⁴ Ndien Hanun omum ikɔt David, okporo mmɔ ubak ntaŋebek, onyuŋ osibe ɔfɔŋ-idem mmɔ ibio, kpa ke mbommbom, ndien asana mmɔ ayak.

⁵ Ekem etiŋ enɔ David, ndien enye ɔdɔŋ ekesobo ye mmɔ; koro ekenamde mbon oro ata ŋkpɔ but: ndien edidem ɔdɔhɔ, ete, Mbufo etie ke Jericho tutu ntaŋebek mbufo otibe, ndien efiak edi.

⁶ Ekem adaŋemi nditɔ Ammon ekutde, ete imaŋwaha ke iso David, nditɔ Ammon edɔŋ ekekpe Syria Beth-rehob, ye Syria Zobah, ekɔŋ, ebɔ tɔsin mbon-ekɔŋ edip emi esaŋade ke ikpat, enyuŋ ebɔ edidem Maacah tɔsin owo, ye Ish - Tob tɔsin owo duopeba.

⁷ Ekem adaŋemi David okopde, enye ɔdɔŋ Joab, ye ofuri udim mbon uko.

⁸ Ndien nditɔ Ammon ewɔŋɔ eketim udim ekɔŋ ke inua-otop obio: ndien Syria Zobah, ye eke Rehob, ye Ish-Top, ye Maacah, enyuŋ edu ke idemmɔ ke itie ekɔŋ.

⁹ Ndien ke ini Joab okutde ete ke ekɔŋ ada imɔ ke iso ye ke edem, enye asat kpukpru akpan owo ke Israel, onyuŋ otim udim-ekɔŋ, ete ikebiɔŋɔ Syria.

¹⁰ Enye onyuŋ ada mmɔ eke esuhɔde esin Abishai eyen-eka esie ke ubɔk, onyuŋ otim udim-ekɔŋ, ete ikebiɔŋɔ nditɔ Ammon.

¹¹ Ndien enye ɔdɔhɔ ete, Syria ama ɔsɔŋ akan mi, di nyaŋa mi: ndien, nditɔ Ammon ema esɔŋ ekan fi,

¹² ami nyedi ndinyaŋa fi. Sɔŋ esit, yak nnyin inyuŋ inam nte iren-owo inɔ oruk nnyin, ye mme obio Abasi nnyin: yak Jehovah onyuŋ anam nte enye amade.

¹³ Ntre ke Joab ye mmɔ oro edude ye enye, esaŋa ekpere eduk ndiŋwana ye Syria: ndien mmɔ efeŋe ke iso esie.

¹⁴ Ndien adaŋemi nditɔ Ammon ekutde ete ke Syria emefeŋe, mmɔ enyuŋ efeŋe ke iso Abishai, ekeduk ke obio. Ekem Joab ɔkpɔŋ nditɔ Ammon, ɔnyɔŋ ke Jerusalem.

¹⁵ Ekem adaŋemi Syria ekutde ete ke imesuana ke iso Israel, mmɔ esop idem ɔtɔ kiet.

¹⁶ Ndien Hadarezer ɔdɔŋ ekesioŋo Syria eke edude ke edem akpa oko: ndien mmɔ edi ke Helam; Shobach etubom mbon-ekɔŋ Hadarezer onyuŋ ebem mmɔ iso.

¹⁷ Ndien adaŋemi etiŋde enɔ David, enye obon ofuri Israel, onyuŋ ebe Jordan aka ke Helam. Ekem Syria etim udim ekɔŋ, ebiɔŋɔ David, enyuŋ eŋwana ye enye.

¹⁸ Ndien Syria efeŋe ke iso Israel; David onyuŋ owot mbio chariot Syria ikie itiaba, ye tɔsin mbon horse aba, onyuŋ ɔnɔ Shobach etubom mbon-ekɔŋ esie unan owot do.

¹⁹ Ekem adaŋemi kpukpru ndidem oro edide ikɔt Hadarezer ekutde ete ke imesuana ke iso Israel, mmɔ ekɔŋɔ mfaŋ enɔ Israel, enyuŋ enam ŋkpɔ enɔ mmɔ. Ntre ke ndik iyakke Syria etɔŋɔ ntak enyaŋa nditɔ Ammon.