2 PETER 2 - Edisana ñwed Abasi Ibom

Mme Prophet ye Mme Andikpep Abiaŋa ye Nsu-nsu Ukpep-Ŋkpɔ

¹ EDI mme prophet abiaŋa ema enyuŋ ebiɔŋɔre ke otu mbio-obio, kpa nte abiaŋa-abiaŋa mme anditeme edinyuŋ edude ke otu mbufo; mmɔ edisaŋa ndibe-ndibe, eda esen ukpep-ŋkpɔ eke osobode ukpɔŋ owo eduk etiene mbufo, edinyuŋ ekaŋ kpa Ɔbɔŋ emi akafakde mmɔ, edinyuŋ esin nsobo abuat idem mmɔ.

² Ediwak owo eyenyuŋ etiene mmɔ ke mbukpo ido mmɔ: oto mmɔ ke owo eyenyuŋ etiŋ idiɔk edian usuŋ akpanikɔ.

³ Ke mbumek mmɔ ke eyeda ikɔ abiaŋa ekama mbufo enam mbubine; toto ke eset ubiom-ikpe mmɔ itreke ndibine mme mmɔ emi, nsobo mmɔ inyuŋ iyetke idap.

⁴ Koro edieke Abasi mikayakke mme angel emi ekeduede ebɔhɔ, edi otopde mmɔ ɔduɔk ke itie-ufen, onyuŋ esinde mmɔ ke ŋkim-ŋkim ukpe, ete, enim mmɔ etie do ebet ikpe;

⁵ edieke Enye mikonyuŋ iyakke akani ererimbot ɔbɔhɔ, edi ekpemede Noah, ɔkwɔrɔ edinen ido, ye owo eŋwen itiaba, ke ini Enye anamde ukwɔ ɔtɔ ofuk ekondo eke mibakke Abasi;

⁶ edieke Enye onyuŋ ɔfɔpde mme obio Sodom ye Gomorrah ekabare ntɔŋ, ke ini Enye adade nsobo obiom mmɔ ikpe onyuŋ anamde mmɔ edi uwut-ŋkpɔ ɔnɔ mmɔ eke midibakke Abasi;

⁷ onyuŋ anyaŋade Lot, edinen owo oro, emi ɔfuhɔde abaŋa mbukpo ido mme anam-idiɔk

⁸ (koro ke adaŋemi edinen owo oro oduŋde ke otu mmɔ, se enye okutde onyuŋ okopde anam eti esit esie okut ndutuhɔ ke usen ke usen ye otime-otime erinam mmɔ):

⁹ Ɔbɔŋ ɔmɔfiɔk ndinyaŋa mmɔ emi eteŋede Enye nsio ke idomo, ndinyuŋ mmum mme idiɔk owo nnim ke itie ufen, tutu osim usen ikpe;

¹⁰ akpan-akpan mmɔ eke esaŋade ke ndek-ndek idiɔk itɔŋ obukidem edu uwem enyuŋ esinde mme andikara. Mmɔ edi mbon emiom ye mbon nsɔŋ-ibuot, inamke mmɔ ndik ndisuŋi mme akama-itie ubɔŋ:

¹¹ edi mme angel, emi ekopde idem enyuŋ enyenede odudu ekan mmɔ ikosuŋike mmɔ ke ikpe ke iso Ɔbɔŋ.

¹² Edi mme mmɔ emi, nte ŋkpɔ-uwem eke minyeneke ibuot, eke emanade ke uduot unam, man ekpemum mmɔ ewot, esuŋi ebaŋa se mmɔ mifiɔkke; eyeda nsobo unam esobo mmɔ; mmɔ eyenyuŋ ebɔ idiɔk ke utip idiɔk erinam mmɔ.

¹³ Mmɔ ebat ete edi ŋkpɔ inemesit ndidu otime uwem ke uwemeyo; mmɔ edi ɔkɔp ye ndo, emi enamde ido otime-otime ke usɔrɔ ima mmɔ, ke ini mmɔ ediade udia ye mbufo.

¹⁴ Enyin mmɔ eyɔhɔ ye efibe, mmɔ inyuŋ itreke ndinam idiɔk; mmɔ etap owo emi enanade iwuk; esit mmɔ emehe ye mbumek; mmɔ edi nditɔ isuŋi.

¹⁵ Mmɔ ekpɔŋ edinen usuŋ ediyo ebine afaŋ Balaam eyen Beor, emi akamade utip ukwaŋido;

¹⁶ edi ema esua idiɔk-ŋkpɔ esiemɔ enɔ enye: ass imum etiŋ ikɔ ke uyo owo, ɔbiɔŋɔ prophet oro ndisime ido esie.

¹⁷ Mmɔ edi idim eke misiahake mmɔŋ, ye akarika eke oyobio emende ofime ebe; ema enim ata obubit ekim enɔ mmɔ.

¹⁸ Koro mmɔ etiŋ ikpikpu ikɔ ŋkpon-inua, enyuŋ eda obukpo ido esaŋa ke idiɔk itɔŋ obukidem, etap mmɔ emi ke ebɔbɔhɔ mbon nduyo.

¹⁹ Mmɔ eŋwɔŋɔ enɔ mmɔ ete iyenam mmɔ ebɔhɔ ufin, kpa ke ini mmɔ ke idem mmɔ edukde ufin enɔ nsobo; koro owo odukde ufin ɔnɔ ŋkpɔ ekededi eke akande enye.

²⁰ Koro edieke mmɔ ema ekesaŋa ke ifiɔk Ɔbɔŋ ye Andinyaŋa nnyin Jesus Christ ebɔhɔ se isabarede owo uwem ke ererimbot, ndien mmɔ etɔŋɔ ntak ekɔmɔ ke esit, enyuŋ eyak ŋkpɔ oro akan mmɔ ubɔk, akpatre itie mmɔ akabare ɔdiɔk akan akpa.

²¹ Ɔkpɔfɔn ye mmɔ ndikpetre ndifiɔk usuŋ edinen ido akan ndifiɔk mma, ndien ndiwɔŋɔre ŋkpɔŋ edisana ibet eke enɔde mmɔ.

²² Ɔwɔrɔ ye mmɔ ada ekekem ye ŋke akpanikɔ emi, Ebua akabare adia se ɔkpɔhide; Edi eke ekeyetde mmɔŋ afiak aka ndiwere ke mbat.