2 PETER 1 - Edisana ñwed Abasi Ibom

Yak Ikot ye Edimek Emi Abasi Emekde Nnyin Okuwɔrɔ Ikpuikpu

¹ SIMON PETER, emi edide owo ye apostle Jesus Christ, ewet ŋwed emi ɔnɔ esɔk mmɔ emi ekɔbɔde utɔ ɔsɔŋ-urua mbuɔtidem eke ebietde eke nnyin, ke edinen ido Abasi nnyin ye Andinyaŋa Jesus Christ.

² Mfɔn ye emem akpakam oto ke erifiɔk Abasi ye Jesus Ɔbɔŋ nnyin etiene mbufo uwak-uwak.

³ Sia Odudu Abasi ama ɔkɔnɔ nnyin kpukpru ŋkpɔ eke esaŋade ye uwem ye uteŋe Abasi, oto erifiɔk Enye emi akadade ubɔŋ ye nti ido Esie okot nnyin;

⁴ emi Enye okonyuŋ adade ɔnɔ nnyin mme uŋwɔŋɔ eke esɔŋde urua enyuŋ ekponde eti-eti; man mbufo eda mmɔ ekabare ebuana ke uduot Abasi, ke ema ekebɔhɔ mbiara emi idiɔk itɔŋ esinde ke ererimbot;

⁵ ke ntak emi ndien, mbufo ke ŋkaŋ mbufo esin ifik ke ofuri ukeme edian eti ido ke mbuɔtidem mbufo, enyuŋ edian ifiɔk ke eti ido, enyuŋ edian erifara ke idem ke ifiɔk,

⁶ ye ime ke erifara ke idem,

⁷ ye uteŋe Abasi ke ime, ye iman ke uteŋe Abasi, ye ima ke iman.

⁸ Koro edieke mme ŋkpɔ emi edude ke esit mbufo ɔyɔhɔ-ɔyɔhɔ, mmɔ eyenam mbufo ekutie ifu, ekunyuŋ enana mfri ke erifiɔk Ɔbɔŋ nnyin Jesus Christ.

⁹ Koro owo eke minyeneke mme ŋkpɔ emi edi nnan, itimke ikut usuŋ, onyuŋ efre ete, ema eyet imɔ ŋkani mme idiɔk-ŋkpɔ efep, enyuŋ enam imɔ isana.

¹⁰ Ntre nditɔ-ete, edɔdiɔŋ esin ifik enam ikot eke ekekotde mbufo ye erimek eke emekde mbufo ɔsɔŋɔ ada: koro edieke mbufo enamde mme ŋkpɔ emi mbufo idikɔmɔke iduɔ;

¹¹ koro edi ntem ke edinɔ mbufo ɔyɔhɔ odudu ndibe nduk ke nsinsi Obio Ubɔŋ Ɔbɔŋ ye Andinyaŋa nnyin Jesus Christ.

¹² Ke ntak emi nduak nditi mbufo ŋkpɔ emi kpukpru ini, okposuk edi nte mbufo efiɔkde mmɔ, enyuŋ esɔŋɔde eda ke akpanikɔ eke odude ye mbufo.

¹³ Nnyuŋ mbat nte enen mi ndidemere mbufo ke eriti mbufo ŋkpɔ emi, adaŋa ini nte ndodu ke ataya emi;

¹⁴ sia mfiɔkde nte eyewara ndifut ataya mi nnim ŋkaŋ kiet, nte Ɔbɔŋ nnyin Jesus okowutde mi.

¹⁵ Ke akpanikɔ nyesin ifik nti mbufo, man mma ndaha, mbufo ekpekeme nditi mme ŋkpɔ emi kpukpru ini.

¹⁶ Koro nnyin ikeyireke ikpikpu mbuk, eke owo edade mbufiɔk etibi, ke adaŋemi nnyin inamde mbufo efiɔk odudu ye eridi Ɔbɔŋ nnyin Jesus Christ; edi nnyin ke idem nnyin iketie ise ubom Esie.

¹⁷ Koro Enye ɔkɔbɔ ukpono ye ubɔŋ ke ubɔk Abasi Ete, ke adaŋemi uyo otode ke akakan ubɔŋ oro osim Enye ntem, ete, Emi edi Eyen mi, Eyen ima Mi, emi esit enemde Mi ye Enye:

¹⁸ nnyin ke idem nnyin ikokop uyo oro, nte otode ke enyɔŋ ɔwɔrɔ, ke ini nnyin idude ye Enye ke edisana obot oro.

¹⁹ Ndien ema edɔdiɔŋ esɔŋɔ ikɔ mme prophet ekan enɔ nnyin; ndien mbufo eyetim enam, edieke mbufo edibiɔŋde utɔŋ ke ikɔ oro, nte owo esese utuenikaŋ eke ayamade ke ŋkim-ŋkim ebiet, tutu eyo esiere, utin onyuŋ asiaha ke esit mbufo;

²⁰ sia mbufo efiɔkde ke akpa itie, ete, baba ikɔ prophet kiet ke Ŋwed Abasi idige se owo ekemede ndisiak ke usuŋ esie mmɔ.

²¹ Koro akanam baba ikɔ prophet itoho ke uduak owo: edi mme owo etiŋ ikɔ eke otode Abasi, nte Edisana Spirit esinde mmɔ etiŋ.