2 NDIDEM 9 - Edisana ñwed Abasi Ibom

Eyet Jehu Aran Enim

¹ EKEM Elisha prophet okot eyen mme prophet kiet, onyuŋ ɔdɔhɔ enye, ete, Bɔbɔ mbɔbɔ fo ke isin, nyuŋ da ekpeme aran emi ke ubɔk fo, ka ke Ramoth-gilead:

² ndien ke adaŋemi afo osimde do, yom Jehu eyen Jehoshaphat, eyen Nimshi do, ndien be duk kanam enye adaha ke otu nditɔ-ete esie ɔwɔrɔ, ndien da enye duk ke esit ubet;

³ ndien men ekpeme aran emi, tɔhɔ enye ke ibuot, nyuŋ ɔdɔhɔ, ete, Ntem ke Jehovah ɔdɔhɔ ete, Mmeyet fi aran nnim ke edidem Israel. Ndien sio usuŋ, fehe, kubet.

⁴ Ntre ke akparawa oro, kpa eyen mme prophet, aka ke Ramoth-gilead.

⁵ Ekem ke ini enye edide, sese, mme etubom mbon-ekɔŋ ke etie do; ndien enye ɔdɔhɔ ete, Mmenyene ikɔ eke ndɔhɔde ye afo, etubom. Ndien Jehu ɔdɔhɔ ete, Ye anie nnyin kpukpru? Ndien enye, ete ye afo, etubom.

⁶ Ndien enye adaha ke enyɔŋ oduk ke ufɔk; ndien enye ada aran oro ɔtɔhɔ enye ke ibuot, onyuŋ ɔdɔhɔ enye, ete, Ntem ke Jehovah Abasi Israel ɔdɔhɔ, ete, Mmeyet fi aran nnim ke edidem Israel, ikɔt Jehovah

⁷ Wot ndien ufɔk Ahab usɔ, man nsio usiene iyip ikɔt mi mme prophet, ye iytip kpukpru ikɔt Jehovah, ke ubɔk Jezebel.

⁸ Ndien ofuri ufɔk Ahab eyetak: nyenyuŋ ŋkpok irenowo Ahab mfep, ye ofin ye eyen-isɔŋ ke Israel:

⁹ nyenyuŋ nnam ufɔk Ahab etie nte ufɔk Jeroboam, eyen Nebat ye nte ufɔk Baasha, eyen Ahijah,

¹⁰ Ndien mme ebua eyeta Jezebel ke iŋwaŋ Jezreel, owo eke obukde enye idinyuŋ iduhe. Ndien enye osio usuŋ efehe.

¹¹ Ekem Jehu ɔwɔrɔ etiene ikɔt ete esie: ndien owo kiet obup enye, ete, Nte ɔfɔn? Idat oro ekedi nso ke ɔtɔ fo? Ndien enye ɔbɔrɔ mmɔ ete, Mbufo emefiɔk owo emi, emenyuŋ efiɔk uyo esie.

¹² Ndien mmɔ ete, Nsu; tiŋ nɔ nnyin, mbɔk. Ndien enye ete, Ntem ye ntem ke enye ɔkɔdɔhɔ mi, ete, Ntem ke Jehovah ɔdɔhɔ ete, Mmeyet fi aran nnim ke edidem Israel.

¹³ Ndien kpukpru mmɔ ewara eda ɔfɔŋ-idem mmɔ esin enye ke idak ke idem udigukot, enyuŋ efuri ukorowo, enyuŋ edɔhɔ, ete, Jehu edi edidem.

¹⁴ Ntre ke Jehu eyen Jehoshaphat, eyen Nimshi, oduk odu abaŋa Joram. (Ndien Joram ye ofuri Israel eketie ekpeme ke Ramoth-gilead, ebaŋa Hazael edidem Syria.

¹⁵ Edi edidem Jehoram ama afiak ɔnyɔŋ ke Jezreel ete ikɔkɔk unan oro mme Syrian ekenɔde enye, ke ini enye aŋwanade ekɔŋ ye Hazael edidem Syria.) Ndien Jehu ɔdɔhɔ ete, Ama edi se mbufo eyomde, ekuyak owo baba kiet ɔwɔrɔ ke obio, ɔbɔhɔ, aka eketiŋ ke Jezreel.

¹⁶ Ekem Jehu odoro ke chariot aka ke Jezreel; koro Joram anade do. Ahaziah edidem Judah ama okonyuŋ ɔsuhɔre aka ndise Joram.

¹⁷ Ekem owo emi ekpemede ada ke enyɔŋ tower ke Jezreel, ndien enye okut udim Jehu nte enye edide, onyuŋ ɔdɔhɔ ete, Ami ŋkut udim owo. Ndien Jehoram ɔdɔhɔ ete, Sio odoro-horse kiet, dɔŋ ete aka okosobo ye mmɔ, onyuŋ obup mme edi ke emem.

¹⁸ Ndien andidoro horse oro aka okosobo ye enye, onyuŋ ɔdɔhɔ ete, Ntem ke edidem ɔdɔhɔ ete, Mme edi ke emem? Ndien Jehu ete, Afo asaŋa nso ye emem? Kabare ka ke edem mi. Ndien andikpeme oro etiŋ, ete, Isuŋ oro omosim mmɔ, edi ifiakke.

¹⁹ Ndien enye ɔdɔŋ odoro-horse efen; enye onyuŋ aka okosim mmɔ, onyuŋ obup ete, Ntem ke edidem ɔdɔhɔ, ete, Mme edi emem? Ndien Jehu ɔbɔrɔ ete, Afo asaŋa nso ye emem?

²⁰ Kabare ka ke edem mi. Ndien andikpeme etiŋ ete, Enye omosim mmɔ, edi ifiakke: ndien ubin oro ebiet ubin Jehu eyen Nimshi; koro ebinde nte idat.

²¹ Ekem Jehoram ɔdɔhɔ ete, Tim chariot. Ndien etim chariot esie. Ndien Jehoram edidem Israel ɔwɔrɔ ye Ahaziah edidem Judah, kiet kiet ke chariot mmɔ, ndien mmɔ ewɔrɔ eka ekesobo ye Jehu, ekesim enye ke iŋwaŋ Naboth eyen Jezreel.

²² Edikem ke ini Jehoram okutde Jehu, enye obup ete, Nte edi emem, Jehu? Ndien enye ɔbɔrɔ ete, Nso emem, adaŋa ini nte use Jezebel uka, ye ediwak idiɔŋ esie ebigide?

²³ Ndien Jehoram akabare ubɔk esie efehe; onyuŋ ɔdɔhɔ Ahaziah, ete, Ahaziah, odu mmɔ emi.

²⁴ Ndien Jehu omum utiga esie etiga Jehoram ke aba-edem, ndien idaŋ oyu enye oti, ndien enye ɔsuhɔre ɔduɔ ke chariot esie.

²⁵ Ndien enye (Jehu) ɔdɔhɔ Bidkar adidaha esie, ete, Men enye duɔk ke iŋwaŋ Naboth eyen Jezreel: koro ti nte nnyin mbiba, ami ye afo, ikedorode horse itiene Ahab ete esie ke edem, ndien Jehovah etiŋ ikɔ emi adian enye; ete,

²⁶ “Ŋkokut iyip Naboth ye iyip nditɔ esie, mkpɔŋ, edi uyo Jehovah: ndien nyesio usiene ye afo ke iŋwaŋ emi, edi uyo Jehovah”. Men enye, ndien, duɔk ke ŋwaŋ oro, ke uyo Jehovah.

²⁷ Adaŋoro Ahaziah edidem Judah okutde, enye efehe ke usuŋ ufɔk iŋwaŋ. Ndien Jehu ebine enye, onyuŋ ɔdɔhɔ ete, Mbufo ewot enye ŋko ke chariot esie, ke obot Gur emi ekperede Ibleam; ndien enye efehe aka ke Megiddo, onyuŋ akpa do.

²⁸ Ekem ikɔt esie ebiom enye ke chariot esie, eda enye eka ke Jerusalem, enyuŋ ebuk enye ke udi esie ye mme ete esie ke obio David.

²⁹ Ndien Ahaziah ada ubɔŋ Judah ke ɔyɔhɔ isua Joram eyen Ahab duopekiet.

³⁰ Ekem Jehu osim ke Jezreel; ndien adaŋemi Jezebel okopde, enye ada stibium ewet enyin esie, onyuŋ ɔdiɔŋ ibuot esie, ndien etie ke window ese.

³¹ Ekem Jehu sim enyin-usuŋ. Ndien Jezebel ɔdɔhɔ ete, Nte edi emem, Zimri, andiwot ete esie?

³² Ndien enye emenere iso esie ese window oro, onyuŋ obup ete, Anie ada ye ami, anie? Ndien eunuch iba mme ita etop iso ese enye.

³³ Ndien enye ɔdɔhɔ ete, Mbufo emen enye eduɔk ke isɔŋ. Ntre ke mmɔ emen enye eduɔk ke isɔŋ; ndien iyip esie osime ke ibibene, ye ke idem mme horse: Jehu onyuŋ edigi enye.

³⁴ Ndien enye oduk adia ŋkpɔ, onyuŋ ɔŋwɔŋ. Ekem enye ɔdɔhɔ ete, Mbufo ese, ndien, ata idiɔk aŋwan oro, enyuŋ ebuk enye: koro enye edide eyen edidem.

³⁵ Ndien mmɔ eka ndibuk enye: edi ikwe enye, ke mibɔhɔke mkpɔkpɔrɔ, ye ikpat-ukot,

³⁶ ye ekaubɔk. Ndien mmɔ efiak eketiŋ enɔ enye. Ndien enye ete, Emi edi uyo Jehovah oro enye ɔkɔdɔhɔde ke inua Elijah Tishbite owo esie, ete, Mme ebua eyeta obuk Jezebel ke iŋwaŋ Jezereel:

³⁷ okpo Jezebel eyenyuŋ etie nte ifum ke iso ntan-isɔŋ ke iŋwaŋ Jezreel; ntre ke mmɔ ididɔhɔke ite, Emi edi Jezebel.