2 NDIDEM 24 - Edisana ñwed Abasi Ibom

Edidem Nebuchdnezzer Akan Judah Ubɔk Onyuŋ Omum Jerusalem ke Mbot Ekɔŋ

¹ KE eyo esie Nebuchadnezzar edidem Babylon ɔdɔk edi, ndien Jehoiakim akabare edi owo esie ke isua ita, ndien akabare ɔsɔŋ ibuot ye enye.

² Ndien Jehovah ɔdɔŋ mme udim mme Chaldean, ye mme udim mme Syrian, ye mme udim Moab, ye mme udim nditɔ Ammon utom, ete eŋwana ekɔŋ ye enye, onyuŋ ɔdɔŋ mmɔ, ete enam Judah, enyuŋ esobo enye, ekem ke uyo Jehovah emi enye ɔkɔdɔhɔde ke inua ikɔt esie mme prophet.

³ Ŋkɔm osu ntre ɔnɔ Judah ke uyo Jehovah, man enye emen mmɔ ke iso esie efep, abaŋa mme idiɔk ido Manasseh, nte enye akanamde kpukpru;

⁴ ndien ŋko Jehovah inyimeke ndidahado ke ikpikpu iyip oro enye ɔkɔduɔkde; koro enye ama anam ikpikpu iyip ɔyɔhɔ ke Jerusalem.

⁵ Ndien ama edi ikɔ Jehoiakim emi ɔsuhɔde, ye kpukpru se enye akanamde, nte iwetke mmɔ isin ke ŋwed ikɔ eyo ndidem Judah?

⁶ Ekem Jehoiakim ɔsuhɔre ana ye mme ete esie ede: ndien Jehoiachin eyen esie ada ubɔŋ ke itie esie.

⁷ Ndien edidem Egypt itɔŋɔke aba ntak ito ke idut esie idi koro edidem Babylon akadade kpukpru se edidem Egypt ekenyenede, ɔtɔŋɔde ke akpa Egypt tutu osim akpa Euphrates.

⁸ Jehoiachin osim isua efureta ke ini enye adade ubɔŋ; enye onyuŋ edi edidem ke Jerusalem ke ɔfiɔŋ ita. Ndien enyiŋ eka esie ekere Nehushta eyen Elnathan a Jerusalem.

⁹ Enye ŋko onyuŋ anam idiɔk ke iso Jehovah, kpa nte ete esie akanamde kpukpru.

¹⁰ Ke ini oro ikɔt Nebuchadnezzar edidem Babylon edɔk edi ke Jerusalem edikan obio ekuk.

¹¹ Nebuchadnezzar edidem Babylon onyuŋ edi ekɔŋ ye obio; ndien ikɔt esie ekan enye ekuk.

¹² Ekem Jehoiachin edidem Judah ɔwɔrɔ etiene edidem Babylon, enye, ye eka esie, ye ikɔt esie, ye ikpɔ owo esie, ye ndidaha esie: ndien edidem Babylon ada enye ke ɔyɔhɔ isua ubɔŋ esie itiaita.

¹³ Enye onyuŋ osio do kpukpru ŋkpɔ uto ufɔk Jehovah, ye ŋkpɔ uto ufɔk edidem, onyuŋ adianare gold efep ke kpukpru ŋkpɔ oro Solomon edidem Israel akanamde ke ufɔk Jehovah, kpa nte Jehovah ɔkɔdɔhɔde.

¹⁴ Enye onyuŋ ataŋ ofuri Jerusalem, ye kpukpru ikpɔ owo, ye kpukpru mbon-uko efep, kpa tɔsin mbuot-ekɔŋ duop, ye kpukpru mbon-usɔ, ye mme odom-utim: isuhɔke baba kiet ke mibɔhɔke nditɔ ubuene ke isɔŋ.

¹⁵ Ntre ke enye ada Jehoiachin ɔnyɔŋ ke Babylon, ye eka edidem, ye iban edidem, ye ndidaha esie, ye ikpɔ owo isɔŋ, ke enye ataŋ ke Jerusalem, ɔnyɔŋ ke Babylon.

¹⁶ Ye kpukpru mbon-inyene, kpa tɔsin owo itiaba, ye mme anam-usɔ, ye mme odom utim, tɔsin owo, kpukpru mbon-uko emi eŋwanade ekɔŋ, kpa mmɔ ke edidem Babylon ataŋ ɔnyɔŋ ke Babylon.

¹⁷ Ndien edidem Babylon ada Mattaniah eyen-ete esie, onim ke edidem ke itie esie, onyuŋ ɔkpuhɔre enye enyiŋ okot Zedekiah.

¹⁸ Zedekiah osim isua edip ye kiet ke ini enye adade ubɔŋ, ndien enye edi edidem ke Jerusalem ke isua duopekiet. Ndien enyiŋ eka esie ekere Hamutal eyen Jeremiah a Libnah.

¹⁹ Enye ŋko onyuŋ anam idiɔk ke iso Jehovah, kpa nte Jehoiakim akanamde kpukpru.

²⁰ Koro osu ntre ye Jerusalem, ye Judah, abaŋa iyaresit Jehovah, tutu enye emen mmɔ ke iso esie ɔduɔk. Ndien Zedekiah ɔsɔŋ ibuot ye edidem Babylon.