2 NDIDEM 21 - Edisana ñwed Abasi Ibom

Manasseh Akara ke Judah

¹ MANASSEH ekedi eyen isua duopeba ke ini enye adade ubɔŋ, ndien enye akara nte edidem ke Jerualem ke isua aba ye efut.

² Enyiŋ eka esie onyuŋ ekere Hephzi-bah. Ndien enye anam idiɔk ke iso Jehovah, ekem ye mbubiam mme idut oro Jehovah okosiode efep ke iso nditɔ Israel.

³ Koro enye ɔtɔŋɔde ntak ɔbɔp mme edikoŋ ebiet oro Hezekiah ete esie okowuride; onyuŋ anam itie-uwa ɔnɔ Baal, onyuŋ anam edisɔi ŋkpɔ Asherah, kpa nte Ahab edidem Israel akanamde; onyuŋ atuak ibuot ɔnɔ ofuri udim-enyɔŋ, onyuŋ anam ŋkpɔ mmɔ.

⁴ Enye onyuŋ anam itie-uwa ke ufɔk Jehovah, emi Jehovah ɔkɔdɔhɔde, ete, Ke Jerusalem ke ndinim enyiŋ mi.

⁵ Ntre ke enye anam itie-uwa ɔnɔ ofuri udim-enyɔŋ ke esien mbiba ke ufɔk Jehovah.

⁶ Enye onyuŋ anam eyen esie ebe oduk ke ikaŋ, onyuŋ ebre idiɔŋ ikpa-enyɔŋ, ye idiɔŋ urukikɔt, onyuŋ onim mme ebre-idiɔŋ ekpo, ye mme ɔfiɔkŋpɔ owo: enye awak ndinam se idiɔkde ke iso Jehovah, onyuŋ ayat enye esit,

⁷ Onyuŋ ada edisɔi ŋkpɔ Asherah oro enye akanamde, onim ke ufɔk oro Jehovah ɔkɔdɔhɔde David ye Solomon eyen esie, ete, Nyenim enyiŋ mi ke nsinsi ke ufɔk emi, ye ke Jerusalem emi mmekde ke otu kpukpru esien Israel.

⁸ Ndien nditɔŋɔke aba ntak mmen ikpat Israel mfep ke isɔŋ emi ŋkɔnɔde mme ete mmɔ; ke mmɔ ema etim enam kpukpru se ŋketemede mmɔ.

⁹ Edi mmɔ ikekopke: ndien Manasseh esin mmɔ ewaha eka ekenam idiɔk ekan mme idut oro Jehovah okosobode ke iso nditɔ Israel efep.

¹⁰ Ndien Jehovah ebe ke inua ikɔt esie mme prophet etiŋ ikɔ, ete,

¹¹ Koro Manasseh, edidem Judah, akanamde mbubiam ŋkpɔ emi, onyuŋ ɔdiɔkde akan kpukpru se mme Amorite oro ekebemde enye iso ekenamde, onyuŋ esin Judah ediɔk ke nsu-nsu abasi esie:

¹² Mmɔdo ntem ke Jehovah Abasi Israel ɔdɔhɔ, ete, Sese, ami mmɔŋ nda idiɔk-ŋkpɔ ntiene Jerusalem ye Judah emi utɔŋ mbiba ediduatde kpukpru owo eke ekopde.

¹³ Nyenyuŋ nda uruk Samaria, ye plummet ufɔk Ahab nnyanare ke Jerusalem: nyenyuŋ ŋkwɔhɔre Jerusalem, nte owo ɔkwɔhɔre usan, ke ɔkwɔhɔre, onyuŋ akabare okubi.

¹⁴ Nyenyuŋ mmen ubak udeme mi emi ɔsuhɔde, nduɔk, nnyuŋ nda mmɔ nsin mme asua mmɔ ke ubɔk: ndien mmɔ eyedi se kpukpru mme asua mmɔ ebumede edia;

¹⁵ koro mmɔ enamde idiɔk ke iso mi, enyuŋ eyatde mi esit, ɔtɔŋɔde ke usen nte mme ete mmɔ eketode ke Egypt ewɔŋɔ, tutu osim mfin emi.

¹⁶ Ndien ŋko Manasseh ɔkɔduɔk iyip ata ediwak owo eke miduehe isop, tutu ɔyɔhɔ ke Jerusalem, ɔtɔŋɔde ke utit emi tutu osim utit oko; ɔkɔrɔ ye mme idiɔk ido esie oro enye esinde Judah enam, ke erinam idiɔk ke iso Jehovah.

¹⁷ Ndien ama edi ikɔ Manasseh emi esuhɔde, ye kpukpru se enye akanamde, ye mme idiɔk ido esie emi enye akanamde, nte ikewetke mmɔ isin ke ŋwed ikɔ eyo ndidem Judah?

¹⁸ Ekem Manasseh ɔsuhɔre ana ye mme ete esie ede, onyuŋ ɔbuhɔ ke iŋwaŋ esa ufɔk esie, ke iŋwaŋ esa Uzza. Ndien Amon eyen esie ada ubɔŋ ke itie esie.

¹⁹ Amon osim isua edip ye iba ke ini enye adade ubɔŋ; ndien enye edi edidem ke Jerusalem ke isua iba. Ndien enyiŋ eka esie ekere Meshullemeth, eyen Haruz a Jotbah.

²⁰ Enye onyuŋ anam idiɔk ke iso Jehovah, kpasuk nte Manasseh ete esie akanamde.

²¹ Enye onyuŋ asaŋa ke kpukpru usuŋ emi ete esie akasaŋade, onyuŋ anam ŋkpɔ nsu-nsu abasi oro ete esie akanamde ŋkpɔ mmɔ, onyuŋ atuak ibuot ɔnɔ mmɔ:

²² onyuŋ ɔkpɔŋ Jehovah Abasi mme ete esie; inyuŋ isaŋake ke usuŋ Jehovah.

²³ Ndien ikɔt Amon eduk odu ebaŋa enye, enyuŋ ewot edidem ke ufɔk esiemɔ.

²⁴ Ekem mbio-obio ewot kpukpru mmɔ oro ekedukde odu ebaŋa edidem Amon. Mbio-obio enyuŋ eda Josiah eyen esie, enim ke edidem ke itie esie.

²⁵ Ndien ama edi ikɔ Amon emi esuhɔde, emi enye akanamde, nte ikewetke mmɔ isin ke ŋwed ikɔ eyo ndidem Judah?

²⁶ Ndien mmɔ ebuk enye ke udi esie ke iŋwaŋ esa Uzza: ndien Josiah eyen esie ada ubɔŋ ke itie esie.