2 NDIDEM 20 - Edisana ñwed Abasi Ibom

Edidem Hezikiah Ɔdɔŋɔ

¹ KE ini oro Hezekiah ɔdɔŋɔ udɔŋɔ mkpa. Ndien prophet Isaiah eyen Amoz aka ke ɔtɔ esie, ɔkɔdɔhɔ enye, ete, Ntem ke Jehovah ɔdɔhɔ, ete, Tim ŋkpɔ ufɔk fo: koro afo eyekpa, ududuhe uwem.

² Ndien enye akabare iso ese ibibene, onyuŋ ekpe Jehovah ubɔk, ete,

³ O Jehovah mbɔk, ti nte nsaŋade ke iso fo ke akpanikɔ, ye ke ofuri esit, mma nnyuŋ nnam se ifɔnde ke iso fo. Hezekiah onyuŋ atua eyet eti-eti.

⁴ Edikem, ke Isaiah mika-iwɔrɔke isim ufɔt obio, Jehovah ɔdɔhɔ enye, ete,

⁵ Fiak kɔdɔhɔ Hezekiah, etubom ikɔt mi, ete, Ntem ke Jehovah, Abasi David usɔ, ɔdɔhɔ, ete, Mmokop mkpe-ubɔk fo, mmokut mmɔŋ-eyet fo; sese, nyenam udoŋɔ okure fi: afo eyedɔk ke ufɔk Jehovah ke ɔyɔhɔ usen ita.

⁶ Nyenyuŋ ŋkɔrɔ isua efut ke mme usen fo; nnyuŋ nnyaŋa fi ye obio emi nsio ke ubɔk edidem Assyria: nyenyuŋ ŋkpeme obio emi, mbaŋa idem mi, ye David owo mi.

⁷ Isaiah onyuŋ ɔdɔhɔ, ete Mbufo eda ebok fig; ndien mmɔ eda edian ke oyo oro, ndien udɔŋɔ okure enye.

⁸ Ndien Hezekiah obup Isaiah, ete, Nsidi idiɔŋɔ, ete ke Jehovah edinam udɔŋɔ, okure mi ami ndinyuŋ ndɔk ŋka ufɔk Jehovah ke ɔyɔhɔ usen ita?

⁹ Ndien Isaiah ɔdɔhɔ, ete, Idiɔŋɔ emi eyeto Jehovah ɔnɔ fi, ete ke Jehovah edinam ŋkpɔ emi enye ɔkɔdɔhɔde; nte, afo oyom ete mfut aka iso ikpat duop, mme afiak edem ikpat duop?

¹⁰ Ndien Hezekiah ɔdɔhɔ, ete, Emi mfut ɔsuhɔrede ikpat duop edi ekpri ŋkpɔ: Ih ih, edi yak mfut afiak edem ikpat duop.

¹¹ Ndien prophet Isaiah eseme ɔnɔ Jehovah, ndien enye anam mfut afiak edem ikpat duop, ekem ye ikpat emi enye ɔsuhɔrede ke dial Ahaz.

¹² Ke ini oro Berodach-baladan, eyen Baladan, edidem Babylon, ɔnɔ ŋwed ye enɔ esɔk Hezekiah; koro enye okokopde ete ke Hezekiah ɔkɔdɔŋɔ.

¹³ Ndien Hezekiah okop uyo mmɔ, onyuŋ owut mmɔ ofuri ufɔk ŋkpɔ-uto esie, ye silver, ye gold, ye ufuɔŋkpɔ, ye edifɔn aran, ye ofuri ufɔk ŋkpɔ-ekɔŋ esie, ye kpukpru se ekutde ke ebiet unim-ŋkpɔ esie: ŋkpɔ baba kiet eke Hezekiah miwutke mmɔ, iduhe ke ufɔk esiemɔ, ye ke ofuri idut emi enye akarade.

¹⁴ Ekem prophet Isaiah aka ke ebiet edidem Hezekiah, ɔkɔdɔhɔ enye, ete, Mbio emi ekedɔhɔ didie? Ekenyuŋ eto mmɔŋ etiene fi? Ndien Hezekiah ɔbɔrɔ, Mmɔ eto ke anyan idut, kpa ke Babylon.

¹⁵ Ndien enye obup, ete, Mmɔ ekekut nso ke ufɔk fo? Ndien Hezekiah ɔbɔrɔ, ete, Mmɔ ekekut kpukpru se idude ke ufɔk mi: baba ŋkpɔ kiet eke mmeŋkowutke mmɔ iduhe ke ebiet unim-ŋkpɔ mi.

¹⁶ Ndien Isaiah ɔdɔhɔ Hezekiah, ete, Kop uyo Jehovah.

¹⁷ Sese, usen ke edi emi mmɔ editaŋde kpukpru se idude ke ufɔk fo, ye se mme usɔ ekenimde tutu osim mfin emi, eka Babylon: ŋkpɔ ndomo kiet idisuhɔke. Ke edi Jehovah ɔdɔhɔ.

¹⁸ Mmɔ eyenyuŋ eda nditɔ fo eke editode fi ke idem, eke afo edibonde; ndien mmɔ eyedi eunuch ke ebiet edidem Babylon.

¹⁹ Ndien Hezekiah ɔdɔhɔ Isaiah, ete, Uyo Jehovah emi afo ɔdɔhɔde ɔfɔn. Enye onyuŋ ɔdɔhɔ, ete, Ŋkɔm emem ye akpanikɔ eyedu ke ini mi?

²⁰ Ndien ama edi ikɔ Hezekiah eke esuhɔde, ye kpukpru uko esie, ye nte enye akanamde mkpɔdiɔhɔ - mmɔŋ, ye udiɔŋ mmɔŋ, onyuŋ anamde mmɔŋ oduk ke obio, nte iwetke mmɔ isin ke ŋwed ikɔ eyo ndidem Judah?

²¹ Ekem Hezekiah osuhɔre ana ye mme ete esie ede: ndien Manasseh eyen esie ada ubɔŋ ke itie esie.