2 NDIDEM 2 - Edisana ñwed Abasi Ibom

Abasi Emen Elijah Ɔdɔk ke Enyɔŋ Ndien Elisha Ada Itie Esie

¹ EDIKEM adaŋemi Jehovah oyomde ndida idio mmen Elijah nnim ke heaven, Elijah ye Elisha edaha ke Gilga.

² Ndien Elijah ɔdɔhɔ Elisha, ete, Mbɔk, tie mi; koro Jehovah ɔdɔŋde mi utom ke Beth-el. Edi Elisha ɔdɔhɔ ete, Ma uwem Jehovah, ye uwem ukpɔŋ fo. Ndikpɔŋke fi.

³ Ntre ke mmɔ esuhɔre eka ke Beth-el. Ndien nditɔ mme prophet oro edude ke Beth-el ewɔŋɔ etiene Elisha, enyuŋ edɔhɔ enye, ete, Nte afo ɔmɔfiɔk ete ke Jehovah eyemen usɔ ɔbɔ fi mfin emi? Ndien enye ete, Ih, ami mmɔfiɔk;

⁴ mbufo edop uyo. Ndien Elijah ɔdɔhɔ enye, ete, Elisha, mbɔk, tie mi; koro Jehovah ɔdɔŋde mi utom ke Jericho. Ndien enye ɔdɔhɔ, ete, Ma uwem Jehovah, ye uwem ukpɔŋ fo, ndikpɔŋke fi. Ndien mmɔ ekesim Jericho.

⁵ Ndien nditɔ mme prophet emi edude ke Jericho etiene Elisha, ekedɔhɔ enye, ete, Nte afo ɔmɔfiɔk ete ke Jehovah eyemen usɔ ɔbɔ fi mfin emi? Ndien enye ɔdɔhɔ ete, Ih, ami mmɔfiɔk ŋko; mbufo edop uyo.

⁶ Ndien Elijah ɔdɔhɔ enye, ete, mbɔk, tie mi; koro Jehovah ɔdɔŋde mi ŋkake Jordan. Ndien enye ɔdɔhɔ ete, Ma uwem Jehovah, ye uwem ukpɔŋ fo, ndikpɔŋke fi. Ndien mmɔ mbiba esaŋa.

⁷ Ndien nditɔ mme prophet, owo aba ye duop, eka ekeda nsan nsan, esak iso ese mmɔ: ndien mmɔ mbiba eda ke mben Jordan.

⁸ Ndien Elijah emen mantle esie, onyuŋ akpaŋ enye, ada oyibi mmɔŋ, ndien mmɔŋ asiaha edem mbiba, ndien mmɔ mbiba esaŋa ke nsatisɔŋ ebe.

⁹ Edikem ke adaŋemi mmɔ ema ekebe, Elijah ɔdɔhɔ Elisha, ete, Siak se ndinamde nnɔ fi, ke mika-imenke mi kaŋa ibɔ fi. Ndien Elisha ɔdɔhɔ ete, Mbɔk, yak nnyene udeme spirit fo iba.

¹⁰ Ndien enye ɔdɔhɔ ete, Afo emebeŋe ɔkpɔsɔŋ ŋkpɔ: ama okut nte emende mi ebɔ fi, eyesu ntre ɔnɔ fi: edi mukwe, idisuhe.

¹¹ Edikem ke mmɔ esaŋade eka iso, eneme nneme, sese, chariot ikaŋ ye horse ikaŋ edibahare mmɔ kiet ye kiet; ndien Elijah ɔdɔk ke heaven ke idio oro.

¹² Ndien adaŋemi Elisha okutde, enye ofiori, ete, Ete mi, ete mi! chariot Israel, ye mbon horse esie. Ndien enye ikwe aba enye. Ndien enye omum ɔfɔŋidem esie, awai ke mbak iba.

¹³ Enye onyuŋ emen mantle Elijah emi okotode enye ke idem ɔduɔ, ndien afiak akada ke mben Jordan.

¹⁴ Enye onyuŋ ada mantle Elijah oro okotode enye ke idem ɔduɔ, oyibi mmɔŋ, onyuŋ ɔdɔhɔ ete, Enye Jehovah Abasi Elijah? Kpa enye ŋko onyuŋ oyibi mmɔŋ, ndien mmɔŋ abahare edem mbiba: ndien Elisha asaŋa ebe.

¹⁵ Ndien adaŋemi nditɔ mme prophet oro edude ke Jericho ke edem oko ekutde, mmɔ edɔhɔ ete, spirit Elijah odu Elisha ke idem. Ndien mmɔ eka ekesobo ye enye, enyuŋ enuhɔ ke isɔŋ enɔ enye.

¹⁶ Ndien mmɔ edɔhɔ enye, ete, Mbɔk, sese, mkpɔsɔŋ owo aba ye duop mmɔ mi ye ikɔt fo; mbɔk, yak mmɔ eka ekeyom usɔ; mbak mme spirit Jehovah ekemen enye ɔduɔk ke obot kiet, mme ke ebedeŋ kiet. Edi enye ɔdɔhɔ ete, Mbufo ekudɔŋ.

¹⁷ Edi mmɔ ekɔbɔ enye, tutu but anam enye, ndien enye ete, Mbufo edɔŋ. Mmɔ edɔŋ ndien owo aba ye duop: ndien mmɔ eka ekeyom enye, edehe usen ita, edi ikwe enye.

¹⁸ Ekem, ke ini mmɔ efiakde etiene enye (koro enye oduŋde ke Jericho) enye ɔdɔhɔ mmɔ, ete, Nte ŋkɔdɔhɔke mbufo, nte, mbufo ekuka?

¹⁹ Ndien mbio-obio edɔhɔ Elisha, ete, Mbɔk, sese, itie obio emi ɔfɔn, nte ɔbɔŋ mi okutde: edi mmɔŋ ɔdiɔk, isɔŋ onyuŋ anam awak eyen.

²⁰ Ndien enye ɔdɔhɔ ete, Mbufo eda obufa abaŋ, esin inuŋ ke esit, esɔk mi. Ndien mmɔ eda esɔk enye.

²¹ Ndien enye ɔwɔrɔ aka ke iso idim, ɔkɔduɔk inuŋ esin do, onyuŋ ɔdɔhɔ, ete, Ntem ke Jehovah ɔdɔhɔ ete, Mmɔkɔk mmɔŋ emi mma: mkpa ye uwak eyen ididuhe aba.

²² Ndien mmɔŋ oro akabare ɔfɔn tutu osim mfin emi, ekem ke uyo Elisha oro enye ɔkɔdɔhɔde.

²³ Ekem enye oto do aka ɔkɔdɔk ke Beth-el: ndien nte enye asaŋade ke usuŋ, ŋkpri nditɔ eto ke obio, edisak enye nsahi, enyuŋ edɔhɔ enye, ete, Ibɔ, dɔk: ibɔ, dɔk.

²⁴ Ndien enye akabare iso ese mmɔ, onyuŋ osuŋi mmɔ ke enyiŋ Jehovah. Ndien uman bear iba eto ke akai, ediwai nditɔ oro, owo aba ye iba, mbai-mbai.

²⁵ Ndien enye oto do aka ke obot Carmel, onyuŋ oto do aka ke Samaria.