2 NDIDEM 17 - Edisana ñwed Abasi Ibom

Edidem Shamaneser Ataŋ Israel Ɔnyɔŋ Assyria

¹ KE ɔyɔhɔ isua Ahaz edidem Judah duopeba, Hoshea eyen Elah ada ubɔŋ Israel ke Samaria ke isua usukkiet.

² Enye onyuŋ anam idiɔk ke iso Jehovah, edi inamke nte ndidem Israel oro ekebemde enye iso.

³ Shamaneser edidem Assyria ɔdɔk aka ekɔŋ ye enye; ndien Hoshea akabare edi owo esie, onyuŋ otomo enye utomo.

⁴ Ekem edidem Assyria ayarare odu ke Hoshea: koro enye ɔkɔdɔŋde mme isuŋ utom ke ɔtɔ So edidem Egypt, ndien itomoke edidem Assyria, nte isua efen: ndien edidem Assyria okuk enye, onyuŋ ɔkɔŋ enye ke ufɔk ŋkpɔkɔbi.

⁵ Ntem ke edidem Assyria ɔdɔk asaŋa ke ofuri isɔŋ ebe, onyuŋ ɔdɔk aka ke Samaria, akakan enye okuk ke isua ita.

⁶ Ke ɔyɔhɔ isua Hoshea usukkiet, edidem Assyria ada Samaria, onyuŋ ataŋ Israel ɔnyɔŋ ke Assyria, okonim mmɔ ke Halah, ye ke Habor, ke mben akpa Gozan, ye ke mme obio nditɔ Media.

⁷ Edikem, koro nditɔ Israel ediɔkde ye Jehovah Abasi mmɔ, emi okosiode mmɔ ke isɔŋ Egypt, ye ke idak ubɔk Pharaoh edidem Egypt, ɔdɔk, enyuŋ ebak abasi eŋwen,

⁸ enyuŋ esaŋa ke mme ewuhɔ mme idut oro Jehovah ekebinde ke iso nditɔ Israel efep, ye eke ndidem Israel emi mmɔ ekenamde;

⁹ ndien nditɔ Israel efuk ŋkpɔ eke minenke ye Jehovah Abasi mmɔ, mmɔ enyuŋ ebɔp edikoŋ ebiet ke idem mmɔ ke kpukpru obio mmɔ, ɔtɔŋɔde ke tower mbon-ukpeme tutu osim obio ibibene;

¹⁰ mmɔ enyuŋ ewuk, adaha ke idem mmɔ, ye eto-mkpe, ke enyɔŋ kpukpru ŋkokoŋo obot, ye ke idak kpukpru awawa eto:

¹¹ do ke mmɔ enyuŋ efɔp incense ke kpukpru edikoŋ ebiet, kpa nte mme idut oro Jehovah akataŋde ke iso mmɔ efep; mmɔ enyuŋ enam oburobut ido, enyuŋ eyat Jehovah esit:

¹² mmɔ enyuŋ enam ido ndem oro Jehovah ɔkɔdɔhɔde mmɔ, ete, Mbufo ekunam ŋkpɔ emi.

¹³ Edi Jehovah ada inua kpukpru prophet, ye eke kpukpru mbon ŋkukut, asua ɔnɔ Israel ye Judah, ete, Mbufo ekabare ekpɔŋ mme idiɔk usuŋ mbufo, enyuŋ enim ibet mi, ye item mi, ekem ke kpukpru mme ewuhɔ emi ŋkowukde mme ete mbufo, emi ŋkonyuŋ ntobode mbufo ke ubɔk ikɔt mi mme prophet.

¹⁴ Ndien mmɔ inyimeke ndikop, edi esɔŋ obot itɔŋ mmɔ nte itɔŋ mme ete mmɔ, emi mikenimke uyo Jehovah Abasi mmɔ ke akpanikɔ.

¹⁵ Ndien mmɔ esin item esie, ye ediomi esie emi enye akanamde ye mme ete mmɔ, ye ikɔ ntiense esie emi enye eketiŋde ke otu mmɔ; ndien mmɔ etiene ikpikpu ŋkpɔ, enyuŋ enam oburobut ido, enyuŋ etiene mme idut eke ekande mmɔ ekuk, emi Jehovah eketemede mmɔ, ete ekunam nte mmɔ enamde.

¹⁶ Edi mmɔ ekpɔŋ kpukpru ibet Jehovah Abasi mmɔ, enyuŋ enam editara mbiet ke idem mmɔ, kpa nditɔ-enaŋ iba, enyuŋ enam eto-mkpe, enyuŋ ebɔŋ akam enɔ ofuri udim enyɔŋ, enyuŋ enam ŋkpɔ Baal.

¹⁷ Mmɔ enyuŋ enam nditɔ-iren mmɔ ye nditɔ-iban mmɔ ebe eduk ke ikaŋ, enyuŋ ebre idiɔŋ ye mfa, enyuŋ enyam idem mmɔ ndinam idiɔk ke iso Jehovah, enyuŋ eyat enye esit.

¹⁸ Ndien Jehovah ayat esit ye Israel eti-eti, ndien enye emen mmɔ ke iso esie efep; isuhɔke baba kiet ke mibɔhɔke esien Judah ikpɔŋ-ikpɔŋ.

¹⁹ Judah ŋko inyuŋ inimke mbet Jehovah Abasi mmɔ, edi asaŋa ke ido Israel emi mmɔ enamde.

²⁰ Ndien Jehovah ɔduɔk ofuri ubon Israel, onyuŋ otuk mmɔ, onyuŋ esin mmɔ ke ubɔk mbon ŋwo, tutu enye emen mmɔ ke iso esie ɔduɔk.

²¹ Koro enye akawaide Israel osio ufɔk David ke ubɔk; ndien mmɔ enim Jeroboam eyen Nebat ke edidem: ndien Jeroboam onuk Israel efep, ete ekutiene Jehovah, onyuŋ esin mmɔ enam ata idiɔk ido.

²² Ndien nditɔ Israel esaŋa ke kpukpru mme idiɔk ido Jeroboam, emi enye akanamde: mmɔ ikabakede ikpɔŋ mmɔ;

²³ tutu Jehovah osio Israel ke iso esie efep, kpa nte enye ɔkɔdɔhɔde ke inua kpukpru ikɔt esie mme prophet. Ntem ke enye ataŋ Israel efep ke isɔŋ mmɔ ɔnyɔŋ ke Assyria, tutu osim mfin emi.

²⁴ Ekem edidem Assyria ada owo ke Babylon, ye ke Cuthah, ye ke Avva, ye ke Hamath, ye ke Sepharvaim, edi edinim mmɔ ke mme obio Samaria ke ibuot nditɔ Israel: ndien mmɔ eda Samaria enyene, enyuŋ eduŋ ke mme obio esie.

²⁵ Edikem ke eritɔŋɔ iduŋ mmɔ do mmɔ ibakke Jehovah, ndien Jehovah ɔdɔŋ lion utom ke otu mmɔ, eke ewotde ndusuk mmɔ.

²⁶ Ekem mmɔ etiŋ enɔ edidem Assyria, ete, Mme idut emi afo akataŋde edi edinim ke mme obio Samaria, ifiɔkke ido Abasi edem emi; ndien enye ɔmɔdɔŋ lion utom ke otu mmɔ, ndien, sese, ke ewot mmɔ, koro mmɔ mifiɔkke ido Abasi edem emi.

²⁷ Ndien edidem Assyria eteme, ete, Mbufo eda owo kiet ke otu mme oku oro mbufo eketaŋde do edi, eka do; ndien yak mmɔ eka eketie do, enyuŋ eteme mmɔ ido Abasi idut oro.

²⁸ Ekem owo mme oku kiet emi mmɔ eketaŋde ke Samaria efep, edi ediduŋ ke Beth-el, onyuŋ eteme mmɔ usuŋ nte ebakde Jehovah.

²⁹ Edi kpukpru mme idut enam mme abasi mmɔ, enim ke ufɔk edikoŋ ebiet oro mme Samaritan ekenamde, kpukpru mme idut ke mme obio mmɔ emi mmɔ eduŋde do.

³⁰ Ndien mbio Babylon enam Succoth-benoth, mbio Cuth enyuŋ enam Nergal, mbio Hamath enyuŋ enam Ashima,

³¹ mme Avvite enyuŋ enam Nibhaz ye Tartak, mbio Sepharvaim enyuŋ efɔp nditɔ mmɔ ke ikaŋ enɔ Adrammelech ye Annammelech, mme abasi Sepharvaim.

³² Ntem ke mmɔ ebak Jehovah, enyuŋ esio owo ke otu idem mmɔ, enim ke oku mme edikoŋ ebiet, emi enamde ŋkpɔ enɔ mmɔ ke ufɔk edikoŋ ebiet oro.

³³ Mmɔ ebak Jehovah, enyuŋ enam ŋkpɔ mme abasi idem mmɔ, ekem ke ido mme idut oro eketaŋde mmɔ ke esit edi.

³⁴ Tutu osim mfin emi mmɔ enam akpa ido mmɔ: mmɔ ibakke Jehovah, inyuŋ inamke mme ewuhɔ mmɔ, ye ido mmɔ, ye mme item ye ibet oro Jehovah okowukde nditɔ Jacob, emi enye akadade enyiŋ Israel osio enye;

³⁵ emi Jehovah okonyuŋ anamde ediomi ye mmɔ, onyuŋ etemede mmɔ, ete, Mbufo ekubak mme abasi efen, ekunyuŋ enuhɔ enɔ mmɔ, ekunyuŋ enam ŋkpɔ mmɔ, ekunyuŋ ewa uwa enɔ mmɔ:

³⁶ ke mibɔhɔke Jehovah emi akadade mbufo ke isɔŋ Egypt ɔdɔk, ke akamba odudu ye ke edinyanare ubɔk, mbufo ebak enye, enyuŋ etuak ibuot enɔ enye, enyuŋ ewa uwa enɔ enye.

³⁷ Ndien mbufo etim enim mme ewuhɔ, ye ido, ye item, ye ibet, emi enye ewetde ɔnɔ mbufo, kpukpru ini; ekunyuŋ ebak mme abasi efen.

³⁸ Ekunyuŋ efre ediomi emi ŋkodiomide ye mbufo; ekunyuŋ ebak abasi efen.

³⁹ Edi mbufo ebak Jehovah Abasi mbufo; ndien enye eyenyaŋa mbufo osio kpukpru mme asua mbufo ke ubɔk.

⁴⁰ Ndien mmɔ ikopke, edi enam kpa ido mmɔ.

⁴¹ Ntre ke mme idut emi ekebak Jehovah, enyuŋ enam ŋkpɔ enɔ edisɔi mbiet mmɔ, kpa nditɔ mmɔ, ye nditɔ nditɔ mmɔ: kpa nte mme ete mmɔ ekenamde, kpa ntre ke mmɔ enam tutu osim mfin emi.