2 NDIDEM 14 - Edisana ñwed Abasi Ibom

Amaziah Akara ke Judah

¹ KE udiana-akpa isua Joash eyen Jehoahaz edidem Israel, Amaziah eyen Joash edidem Judah ada ubɔŋ.

² Enye osim isua edip ye ition ke ini adade ubɔŋ, onyuŋ edi edidem ke Jerusalem ke isua edip ye usukkiet. Enyiŋ eka esie onyuŋ ekere Jehoaddin a Jerusalem.

³ Enye onyuŋ anam se inende ke iso Jehovah; edi inamke nte David ete esie: enye anam kpukpru nte Joash ete esie akanamde.

⁴ Edi ibiatke mme edikoŋ ebiet ifep: mbio-obio esuk ewa uwa enyuŋ efɔp incense ke mme edikoŋ ebiet oro.

⁵ Edikem adaŋemi ubɔŋ ɔsɔŋɔde enye ke ubɔk, enye owot ikɔt esie oro ekewotde ete esie, edidem.

⁶ Edi iwotke nditɔ mme andiwot oro: kpa nte ewetde ke ŋwed ibet Moses, emi Jehovah eketemede, ete, Ekuwot mme ete ebaŋa nditɔ, ekunyuŋ ewot nditɔ ebaŋa mme ete; edi ewot kpukpru owo ebaŋa idiɔk ido idem mmɔ.

⁷ Enye asuan Edom ke itihere inuŋ, tɔsin owo duop, onyuŋ ada Sela ke ekɔŋ, ndien ada Joktheel osio enye enyiŋ tutu osim mfin emi.

⁸ Ndien Amaziah ɔdɔŋ mme isuŋutom ke ɔtɔ Jehoash, eyen Jehoahaz, eyen Jehu, edidem Israel, ete, Di, yak kiet ese kiet iso.

⁹ Ndien Jehoash edidem Israel ɔdɔŋ ekedɔhɔ Amaziah edidem Judah, ete, Mbarekpe emi odude ke Lebanon ɔdɔŋ ekedɔhɔ cedar emi odude ke Lebanon, ete, Da adiaha fo nɔ eyen mi ɔdɔ: ndien unam-ikɔt emi odude ke Lebanon, ebe edigi mbarekpe oro.

¹⁰ Afo amakan Edom, ndien akabare ataŋ idem: taŋ ese, nyuŋ tie ke ufɔk fo: afo edinam didie otibi ekɔŋ ye idiɔk-ŋkpɔ, ndien ɔduɔ, kpa afo, ye Judah ŋko?

¹¹ Edi Amaziah ikopke. Ndien Jehoash edidem Israel ɔdɔk; enye ye Amaziah edidem Judah, kiet onyuŋ ese kiet iso ke Beth-shemesh emi enyenede Judah.

¹² Ndien Israel esuan Judah; ndien kpukpru owo efeŋe eka ke mme tent mmɔ.

¹³ Jehoash edidem Israel onyuŋ omum Amaziah edidem Judah, eyen Jehoash, eyen Ahaziah, ke Beth-shemesh, ndien mmɔ eka ke Jerusalem, ekewuri ubak ibibene Jerusalem, ɔtɔŋɔde ke inua-otop Ephraim, tutu osim inua-otop ke inuk, ibio-idomo-okuk ikie inaŋ.

¹⁴ Enye onyuŋ ada ofuri gold ye silver, ye kpukpru mkpɔduɔhɔ emi mmɔ ekutde ke ufɔk Jehovah, ye ke ebiet unim-ŋkpɔ ufɔk edidem, ye mbon ubiɔŋ, ndien ɔnyɔŋ ke Samaria.

¹⁵ Ndien ama edi ikɔ Jehoash emi esuhɔde, emi enye akanamde, ye uko esie, ye nte enye aŋwanade ekɔŋ ye Amaziah edidem Judah, nte ikewetke mmɔ isin ke ŋwed ikɔ eyo ndidem Israel?

¹⁶ Ekem Jehoash ɔsuhɔre ana ye mme ete esie ede, onyuŋ ɔbuhɔ ke Samaria ye ndidem Israel? ndien Jeroboam eyen esie ada ubɔŋ ke itie esie.

¹⁷ Ndien Amaziah eyen Joash edidem Judah odu uwem isua efut, ke Jehoash eyen Jehoahaz edidem Israel ama akakpa.

¹⁸ Ndien ama edi ikɔ Amaziah emi esuhɔde, nte ikewetke mmɔ isin ke ŋwed ikɔ eyo ndidem Judah?

¹⁹ Ekem mmɔ eduk odu ebaŋa enye ke Jerusalem: ndien enye efehe aka Lachish; edi mmɔ edɔŋ ebine enye ke Lachish, enyuŋ ewot enye do.

²⁰ Ndien mmɔ eda horse ebiom enye edi, ndien enye ɔbuhɔ ke Jerusalem ye mme ete esie, ke obio David.

²¹ Ndien kpukpru mbio Judah eda Azariah, emi edide isua efurekiet, enim enye ke edidem ke ibuot Amaziah ete esie.

²² Enye ɔdiɔŋ Elath, onyuŋ ada enye ɔnɔ Judah, adaŋemi edidem ama ɔkɔsuhɔre ana ye mme ete esie ede.

²³ Ke ɔyɔhɔ isua Amaziah eyen Joash edidem Judah efut, Jeroboam, eyen Joash, edidem Israel ada ubɔŋ ke Samaria, ke isua aba ye kiet.

²⁴ Enye onyuŋ anam idiɔk ke iso Jehovah: ikabakede ikpɔŋ kpukpru mme idiɔk ido Jeroboam, eyen Nebat, emi akanamde Israel ekabare ediɔk.

²⁵ Enye ɔtɔŋɔ ntak ada ofuri adaŋa Israel, ɔtɔŋɔde ke ebiet emi edukde Hamath tutu osim inyaŋ Arabah, ekem ke uyo Jehovah Abasi Israel, emi enye eketiŋde ke inua owo esie Jonah eyen Amittai, prophet oro okotode ke Gath-hepher.

²⁶ Koro Jehovah okutde nte ukut Israel odorode eti-eti: ndien ofin okure, eyen-isɔŋ onyuŋ okure, owo eke anyaŋade inyuŋ iduhe ke Israel.

²⁷ Edi Jehovah ikɔdɔhɔke, ite esɔhi enyiŋ Israel efep ke idak enyɔŋ: edi enye ada ubɔk Jeroboam eyen Joash anyaŋa mmɔ.

²⁸ Ndien ama edi ikɔ Jeroboam emi esuhɔde, ye kpukpru se enye akanamde, ye uko esie, emi enye akadade aŋwana ekɔŋ, ye nte enye akadade Damascus, ye Hamath, emi ekenyenede Judah, ɔnɔ Israel, nte ikewetke mmɔ isin ke ŋwed ikɔ eyo ndidem Israel?

²⁹ Ekem Jeroboam ɔsuhɔre ana ye mme ete esie ede, kpa ye ndidem Israel; ndien Zechariah eyen esie ada ubɔŋ ke itie esie.