2 NDIDEM 12 - Edisana ñwed Abasi Ibom

Jehoash Akara ke Judah

¹ JEHOASH osim isua itiaba ke ini enye adade ubɔŋ. Jehoash ada ubɔŋ ke ɔyɔhɔ isua Jehu itiaba; onyuŋ edi edidem ke Jerusalem ke isua aba. Enyiŋ eka esie onyuŋ ekere Zibiah a Beer-sheba.

² Ndien Jehoash anam se inende ke iso Jehovah ke ofuri ini esie oro Jehoiada oku etemede enye.

³ Edi mmɔ ibiatke mme edikoŋ ebiet ifep: edi mbio-obio esuk ewa uwa, enyuŋ efɔp incense ke ŋkokoŋo ebiet.

⁴ Ekem Jehoash ɔdɔhɔ mme oku, ete, Ofuri silver emi ekam edade esɔk ufɔk Jehovah, kpa silver mmɔ eke ebatde, ye silver ufak owo nte ekɔmde enɔ enye, ye ofuri silver eke odukde owo ke esit ndida nsɔk ufɔk Jehovah,

⁵ yak mme oku ɔbɔ mme ɔdiɔŋɔ mmɔ ke idem mmɔ: yak mmɔ enyuŋ ediɔŋ ŋwure ufɔk, ke kpukpru ebiet emi mmɔ ekutde nte owurede.

⁶ Edikem ke ɔyɔhɔ isua edidem Jehoash edip ye ita, mme oku ika idiɔŋke ŋwure ufɔk.

⁷ Ndien edidem Jehoash okot Jehoiada oku, ye mme oku efen, onyuŋ ɔdɔhɔ mmɔ, ete, Nsinam mbufo midiɔŋke ŋwure ufɔk? Mbufo ekubɔ aba, ndien, mme ɔdiɔŋɔ mbufo silver, edi eda enye enɔ ediɔŋ ŋwure ufɔk.

⁸ Ndien mme oku enyime, ete idibɔhɔ aba mbio-obio silver, idinyuŋ idiɔŋke ŋwure ufɔk.

⁹ Ekem Jehoiada oku ada ekebe kiet, otibi odudu ke okukip esie, onyuŋ ada enye ɔdiɔk ke ŋkaŋ itie-uwa, ke nnasia nte owo odukde ke ufɔk Jehovah: ndien mme oku eke ekpemede usuŋ emen kpukpru silver eke edade esɔk ufɔk Jehovah esin do.

¹⁰ Edikem adaŋemi mmɔ ekutde ete ke silver awak ke ekebe oro, andiwet ŋwed edidem ye akamba oku edɔk, ekeda enye ebɔp ke ekpat, enyuŋ ebat silver oro mmɔ ekutde ke ufɔk Jehovah.

¹¹ Ndien mmɔ eda silver oro mmɔ edomode, esin ke ubɔk mme anam-utom emi esede ŋkpɔ ufɔk Jehovah; ndien mmɔ esio enye enɔ mme carpenter, ye mme ɔbɔp, eke enamde ufɔk Jehovah,

¹² ye mme ɔbɔp-ibibene, ye mme ɔsɔi-itiat, man enyuŋ edep eto ye edisɔi itiat eke edade ediɔŋ ŋwure ufɔk Jehovah, ye ke kpukpru se mmɔ esiode ebaŋa ufɔk, ete ediɔŋ enye.

¹³ Edi mmɔ idaha silver eke edade esɔk ufɔk Jehovah, inam bowl silver, ye udɔŋ utuenikaŋ, ye bason, ye ukorowo, ye kpukpru ŋkpɔ gold, ye eke silver inɔ ufɔk Jehovah:

¹⁴ koro mmɔ edade enye enɔ mbon-utom enyuŋ ediɔŋ ufɔk Jehovah ke esit.

¹⁵ Mmɔ inyuŋ ibatke ibat ye mmɔ emi enɔde mmɔ silver oro ke ubɔk, ete eda enɔ mme anam-utom: koro mmɔ enamde ido akpanikɔ.

¹⁶ Mmɔ idaha silver uwa-ndudue ye silver uwa-idiɔk-ido isɔk ufɔk Jehovah: mme oku eda enye.

¹⁷ Edikem Hazael edidem Syria ɔdɔk aka akaŋwana ekɔŋ ye Gath, onyuŋ ada enye: ndien Hazael onim iso esie, ete idɔk ika ekɔŋ ye Jerusalem.

¹⁸ Ndien Jehoash edidem Judah emen kpukpru edisana ŋkpɔ oro Jehoshaphat, ye Jehoram, ye Ahaziah, mme ete esie, ndidem Judah, ekenimde, ye ndisana ŋkpɔ esiemɔ, ye ofuri gold eke ekutde ke ebiet unim-ŋkpɔ ufɔk Jehovah, ye ke eke ufɔk edidem ɔnɔ esɔk Hazael edidem Syria: ndien enye ɔdɔk ɔkpɔŋ Jerusalem.

¹⁹ Ndien ama edi ikɔ Joash emi esuhɔde, ye kpukpru se enye akanamde, nte ikewetke mmɔ isin ke ŋwed eyo ndidem Judah?

²⁰ Ekem ikɔt esie edaha ke enyɔŋ eduk odu, enyuŋ ewot Joash ke ufɔk Millo, emi ɔsuhɔrede ke Silla.

²¹ Ntre ke Jozacar eyen Shimeath, ye Jehozabad eyen Shomer, ikɔt esiemɔ, etɔ enye ewot; ndien ebuk enye ye mme ete esie ke obio David: ndien Amaziah eyen esie ada ubɔŋ ke itie esie.