2 JOHN 1 - Edisana ñwed Abasi Ibom

Ema Kiet Eken Enyuŋ Esɔŋɔ Emum Ukpep-Ŋkpɔ Christ Ekama

¹ EBIOWO ɔnɔ ŋwed emi esɔk eti ŋwan emi Abasi ekemekde, ye nditɔ esie emi mmade ke esit akpanikɔ; inyuŋ idige ami ikpɔŋ mma mmɔ, edi kpukpru mmɔ emi efiɔkde akpanikɔ;

² ke ntak akpanikɔ eke oduŋde nnyin ke esit, edinyuŋ odude ye nnyin ke nsinsi.

³ Mfɔn ye mbɔm ye emem eyeto ke ubɔk Abasi Ete, ye ke ubɔk Jesus Christ Eyen Ete, odu ye nnyin ke akpanikɔ ye ima.

⁴ Mmedat esit eti-eti koro ŋkutde ndusuk nditɔ fo esaŋade ke akpanikɔ, kpa nte Ete ɔkɔnɔde nnyin uyo, ete inam.

⁵ Ndien ke emi mmebeŋe fi, eti ŋwan, idige nte ŋwetde obufa item nnɔ fi, edi idem item emi nnyin ikenyenede toto ke eritɔŋɔ, nte, yak nnyin ima kiet eken.

⁶ Ndien emi edi ima, ete nnyin ikpasaŋa ke mme item Esie. Emi onyuŋ edi item, kpa nte mbufo ekekopde toto ke eritɔŋɔ, ete, mbufo ekpesaŋa ke ima.

⁷ Koro ediwak mbon abiaŋa ema ewɔŋɔ ekeduk ke ererimbot, kpa mmɔ emi minyimeke ite, Jesus Christ ama edi ke obukidem. Utɔ owo oro edi owo abiaŋa ye andibiɔŋɔ Christ.

⁸ Ekpeme idem mbak mbufo edibiat se nnyin ikanamde utom ibaŋa enye, edi man ekpɔbɔ utip ɔyɔhɔ-ɔyɔhɔ.

⁹ Kpukpru owo eke adade ibuot usuŋ, minyuŋ isukke idem itie ke ukpep-ŋkpɔ Christ, inyeneke Abasi; owo oro osukde idem etie ke ukpep-ŋkpɔ oro enyene Ete, onyuŋ enyene Eyen.

¹⁰ Edieke owo ekededi edide ke ɔtɔ mbufo, minyuŋ idaha ukpep-ŋkpɔ emi idi, ekuda enye esin ke ufɔk, ekunyuŋ ekɔm enye:

¹¹ koro owo eke ɔkɔmde enye etiene abuana ke mme idiɔk utom esie.

¹² Mmenyene ediwak ŋkpɔ ndiwet nnɔ mbufo; edi mmaŋa ndida ŋwed ye mmɔŋ-ŋwed ŋwet. Edi mmenyene idori-enyin, nte nyedi ke ɔtɔ mbufo, nneme nneme ye mbufo iso ye iso, man mbufo enyene ɔyɔhɔ idaresit.

¹³ Nditɔ eyen-ete fo aŋwan, emi Abasi ekemekde, ete ekɔm mbufo.