1 SAMUEL 8 - Edisana ñwed Abasi Ibom

Nditɔ Israel Eyom Edidem

¹ EDIKEM adaŋemi Samuel ɔsɔŋde, enye onim nditɔ esie ke mme ebierikpe Israel.

² Ndien akpan esie ekere Joel, udɔ onyuŋ ekere Abijah, mme ebierikpe ke Beer-sheba.

³ Edi nditɔ esie isaŋake ke usuŋ esie, edi ewaha etiene udori, enyuŋ ebɔ inyene ekwaŋa ikpe.

⁴ Ekem kpukpru mbiowo Israel esop idem ɔtɔ kiet, ndien etiene Samuel ke Ramah.

⁵ Ndien mmɔ edɔhɔ enye, ete, Sese, afo ɔmɔsɔŋ, ndien nditɔ fo isaŋake ke usuŋ fo: kam nim edidem nɔ nnyin, man enye ekpe ikpe nnyin kpa nte mme idut kpukpru.

⁶ Edi ikɔ oro inemke Samuel, ke ini mmɔ edɔhɔde ete, Nɔ nnyin edidem eke edikpede ikpe nnyin.

⁷ Ndien Samuel ekpe Jehovah ubɔk. Ndien Jehovah ɔdɔhɔ Samuel, ete, Kop uyo mbon emi ke kpukpru se mmɔ edɔhɔde fi: koro midige afo ke mmɔ esin, edi ami ke mmɔ esin, ete ŋkudi edidem mmɔ.

⁸ Kpa nte mmɔ ekenamde kpukpru ŋkpɔ, toto ke usen oro ŋkadade mmɔ ke Egypt ndɔk, tutu osim mfin emi, enyuŋ ekpɔŋ mi, enyuŋ enam ŋkpɔ abasi efen, kpa ntre ŋko ke mmɔ enam ye afo.

⁹ Kop ndien uyo mmɔ: edi kutetre ndisua nnɔ mmɔ, nnyuŋ nsian mmɔ ido edidem emi edikarade mmɔ.

¹⁰ Ndien Samuel etiŋ kpukpru ikɔ Jehovah ɔnɔ kpukpru mmɔ eke ebeŋede enye edidem.

¹¹ Ndien enye ɔdɔhɔ ete, Emi eyedi ido edidem emi edikarade mbufo: enye eyeda nditɔ-iren mbufo ke idem esie, onim ke mbon chariot esie, ye mbon horse esie; mmɔ eyenyuŋ ebem chariot esie iso efeŋe itɔk.

¹² Enye eyenyuŋ onim etubom mme tɔsin ke idem esie, ye mme etubom mme aba ye duop; man mmɔ enyuŋ efuŋ isɔŋ esie, enyuŋ ekpeŋe ukpeŋe esie, enyuŋ enam ŋkpɔ ekɔŋ esie,ye ŋkpɔ mme chariot esie.

¹³ Enye eyenyuŋ ada nditɔ-iban mbufo onim ke mme anam ufuɔŋ-ŋkpɔ ye ke mme etem-udia, ye ke mme asaŋa-uyo.

¹⁴ Eyenyuŋ ada iŋwaŋ mbufo, ye iŋwaŋ vine mbufo, ye mbaha olive mbufo eke efɔnde, enɔ ikɔt esie.

¹⁵ Enye eyenyuŋ ada ɔyɔhɔ ubak uduot ŋkpɔ mbufo, ye eke iŋwaŋ mbufo, duop, ɔnɔ mme etubom esie ye ikɔt esie.

¹⁶ Enye eyenyuŋ ada ifin iren mbufo, ye ifin iban mbufo, ye mkparawa mbufo eke efɔnde, ye mme ass mbufo, ɔdɔŋ mmɔ utom esiemɔ.

¹⁷ Eyeda ɔyɔhɔ ubak ŋkpri ufene mbufo duop: mbufo eyenyuŋ edi ifin esie.

¹⁸ Ndien mbufo eyeseme ke usen oro ebaŋa edidem mbufo eke edimekde ke idem-mbufo; edi Jehovah idiyereke mbufo ke usen oro.

¹⁹ Edi mbon oro inyimeke ndikop uyo Samuel; ndien mmɔ edɔhɔ ete, Ih ih: kam yak edidem akara nnyin;

²⁰ man nnyin inyuŋ ibiet kpukpru mme idut, man edidem nnyin onyuŋ ekpe ikpe nnyin, onyuŋ ebem nnyin iso ɔwɔrɔ ndiŋwana ekɔŋ nnyin.

²¹ Ndien Samuel okop kpukpru ikɔ mmɔ, onyuŋ etiŋ mmɔ ke utɔŋ Jehovah.

²² Ndien Jehovah ɔdɔhɔ Samuel, ete, Kop uyo mmɔ, nyuŋ nim edidem nɔ mmɔ. Ekem Samuel ɔdɔhɔ nditɔ Israel, ete, Kpukpru mbufo enyɔŋɔ ke obio mbufo.