1 SAMUEL 7 - Edisana ñwed Abasi Ibom

Ini Samuel Edide Oku ke Israel

¹ NDIEN mbio-obio Kiriath jearim eka ekeda ekebe Jehovah edɔk, enyuŋ eda enye ekesin ke ufɔk Abinadab ke obot, enyuŋ enim Eleazer eyen esie, ete enye ekpeme ekebe Jehovah.

² Edikem, ini emi ekebe oro odude ke Kiriat-jearim ebigi, osim isua edip: ndien ofuri ufɔk Israel etua eyom Jehovah.

³ Ndien Samuel ɔdɔhɔ ofuri ufɔk Israel, ete, Edieke mbufo ekabarede etiene Jehovah ke ofuri esit mbufo, esioŋe ndien isen abasi mme Ashtaroth ke otu mbufo efep, enyuŋ ewuk esit mbufo etiene Jehovah, enyuŋ enam ŋkpɔ enɔ enye ikpɔŋ-ikpɔŋ: ndien enye eyenyaŋa mbufo osio mme Philistine ke ubɔk.

⁴ Ndien nditɔ Israel esioŋo Baalim ye Ashtaroth efep, enyuŋ enam ŋkpɔ enɔ Jehovah ikpɔŋ-ikpɔŋ.

⁵ Ndien Samuel ɔdɔhɔ ete, Mbufo ebon ofuri Israel ke Mizpah, man ŋkpe Jehovah ubɔk nnɔ mbufo.

⁶ Ndien mmɔ eka ekesop idem ke Mizpah, enyuŋ ekoi mmɔŋ, eŋwaŋa ke iso Jehovah, enyuŋ etre udia ke usen oro, enyuŋ edɔhɔ do, ete, Nnyin imedue Jehovah. Ndien Samuel ekpe ikpe nditɔ Israel ke Mizpah.

⁷ Ekem adaŋemi mme Philistine ekopde ete ke nditɔ Israel emebono ke Mizpah, mbɔŋ mme Philistine edɔk eka ikɔ ndinam ye Israel. Ndien adaŋemi nditɔ Israel ekopde, ndik mme Philistine anam mmɔ.

⁸ Ndien nditɔ Israel edɔhɔ Samuel, ete, Kutre ndiseme nnɔ Jehovah Abasi nnyin unɔ nnyin, ete enye anyaŋa nnyin osio mme Philistine ke ubɔk.

⁹ Ndien Samuel ada eyen erɔŋ kiet eke awapde eba, ɔfɔp enye ofuri ɔnɔ Jehovah ke edifɔp uwa; Samuel onyuŋ ekpe Jehovah ubɔk ɔnɔ Israel: ndien Jehovah ɔbɔrɔ enye.

¹⁰ Ndien ke ini Samuel osuk ɔfɔpde edifɔp uwa oro, mme Philistine esaŋa ekpere ndiŋwana ye Israel: edi Jehovah atuak enyɔŋ, ada ɔkpɔsɔŋ uyo okuni mme Philistine, onyuŋ asuan mmɔ usen oro; ndien mmɔ enuaha ke iso Israel.

¹¹ Ndien nditɔ Israel ewɔŋɔ ke Mizpah, ebine mme Philistine, enyuŋ ewot mmɔ, tutu esim ke usuhɔre Beth-car.

¹² Ndien Samuel ada itiat owuk ke ufɔt Mizpah ye Shen, ndien osio enye enyiŋ Eben-ezer (itiat uŋwam), ete, Jehovah amanyaŋa nnyin tutu osim emi.

¹³ Ntre ke mme Philistine ekɔŋɔ mfaŋ, inyuŋ itɔŋɔke aba ntak iduk ke adaŋa Israel: Jehovah onyuŋ ada ubɔk odori mme Philistine ke ofuri eyo Samuel.

¹⁴ Ndien mme Philistine eyak mme obio oro mmɔ ekebɔde Israel enɔ Israel, ɔtɔŋɔde ke Ekron tutu osim ke Gath. Israel enyuŋ esio adaŋa mmɔ mme Philistine ke ubɔk. Israel ye mme Amorite enyuŋ etie ke ufan ŋko.

¹⁵ Ndien Samuel ekpe ikpe Israel ke ofuri uwem esie.

¹⁶ Enye onyuŋ asaŋa kpukpru isua akanade Beth-el, ye Gilgal, ye Mizpah, onyuŋ ekpe ikpe Israel ke mme ebiet oro kpukpru.

¹⁷ Enye akam afiak ke Ramah: koro ufɔk esie odude do; onyuŋ ekpe ikpe Israel do; do ke enye onyuŋ anam itie-uwa ɔnɔ Jehovah.