1 SAMUEL 5 - Edisana ñwed Abasi Ibom

Ekebe Ediomi Abasi ke Obio Philistine

¹ NTEM ke mme Philistine eda ekebe Abasi ke Eben-ezer, ndien mmɔ emen enye edi ke Ashdod.

² Ndien mme Philistine emen ekebe Abasi eduk ke ufɔk Dagon, ekediɔk enye ke ŋkaŋ Dagon.

³ Ndien mbio-obio Ashdod ebak edemere ke eyo esierede, ndien, sese, Dagon ana okubi iso ke isɔŋ ke iso ekebe Jehovah.

⁴ Ndien mmɔ emen Dagon enim ke itie esie. Ekem mmɔ ebak edemere ke eyo esierede, ndien, sese, Dagon ana okubi iso esie ke isɔŋ ke iso ekebe Jehovah; ema ekenyuŋ esibe ibuot Dagon ye ubɔk esie mbiba efep, eduɔk ke asaŋudɔk: obukpit Dagon ikpɔŋ-ikpɔŋ ɔsuhɔ ɔnɔ enye.

⁵ Mmɔdo mme oku Dagon, ye mmɔ eke edukde ke ufɔk Dagon baba kiet midigike asaŋudɔk Dagon ke Ashdod tutu osim mfin emi.

⁶ Ndien Jehovah ɔsɔŋ ubɔk otuk nditɔ Ashdod, onyuŋ osobo mmɔ, onyuŋ ada akpasak amia mmɔ, kpa Ashdod ye mme adaŋa esie.

⁷ Ekem adaŋemi mbio-obio Ashdod ekutde nte edide ntre, mmɔ edɔhɔ ete, Ekebe Abasi Israel ididuŋke ye nnyin: koro enye ɔsɔsɔŋ ubɔk otuk nnyin ye Dagon abasi nnyin.

⁸ Ndien mmɔ edɔŋ ekekot kpukpru mbɔŋ mme Philistine edi ke ɔtɔ mmɔ; ndien ebup, ete, Nnyin idinam ekebe Abasi Israel nso ŋkpɔ? Ndien mmɔ edɔhɔ ete, Yak eda ekebe Abasi Israel ewɔŋɔre eka ke Gath. Ndien mmɔ emen ekebe Abasi Israel ewɔŋɔre eka do.

⁹ Edikem adaŋemi mmɔ ema ekeda enye ewɔŋɔre eka, ubɔk Jehovah odoro ke obio, kpa ata akamba nsobo. Enye onyuŋ amia mbio-obio, ɔtɔŋɔde ke nditɔwɔŋ tutu osim ikpɔ owo, mme akpasak enyuŋ etibe mmɔ ke idem.

¹⁰ Ndien mmɔ enɔ ekebe Abasi esɔk Ekron. Ndien edikem, ke ini ekebe Abasi osimde Ekron, mbio-obio Ekron eseme, ete, Emeda ekebe Abasi Israel ewɔŋɔre esɔk nnyin, ete iwot nnyin ye mbio-obio nnyin.

¹¹ Ndien mmɔ edɔŋ ekekot kpukpru mbɔŋ mme Philistine edi ɔtɔ kiet, ndien edɔhɔ ete, Mbufo eyak ekebe Abasi Israel ɔnyɔŋ, man afiak ke ebiet esiemɔ, mbak ediwot nnyin ye mbio-obio nnyin. Koro mkpa osobode owo ke ofuri obio: ubɔk Abasi onyuŋ ɔsɔŋ eti-eti do.

¹² Ndien mmɔ eke mikpaha edɔŋɔ akpasak: eseme obio onyuŋ ɔdɔk ke enyɔŋ.