1 SAMUEL 31 - Edisana ñwed Abasi Ibom

Saul ye Nditɔ Esie Ita Ekpaŋa ke Ekɔŋ

¹ EKEM mme Philistine eŋwana ekɔŋ ye Israel: ndien nditɔ Israel efeŋe itɔk ke iso mme Philistine, enyuŋ eda unan eduɔŋɔ ke obot Gilboa.

² Ndien mme Philistine esɔp ebine Saul ye nditɔ-iren esie; mme Philistine enyuŋ ewot Jonathan, ye Abinadab, ye Malchi-shua, nditɔ Saul.

³ Ekɔŋ onyuŋ ɔsɔŋ ebine Saul, mbon utiga enyuŋ etiga enye; mbon utiga enyuŋ esin enye edige eti-eti.

⁴ Ndien Saul ɔdɔhɔ andibiom ŋkpɔ-ekɔŋ esie, ete, Sio ofut fo, nyuŋ da enye kim mi; mbak mbio edut emi edidi edikim mi, enyuŋ enam mi ŋkpɔ but. Edi andibiom ŋkpɔ-ekɔŋ esie inyimeke: koro enye efehede ndik eti-eti. Ndien Saul ada ofut esie ɔduɔ ke esit.

⁵ Ndien adaŋemi andibiom ŋkpɔ-ekɔŋ esie okutde ete ke Saul amakpa, enye onyuŋ ɔduɔ ke ofut esie ŋko, onyuŋ akpa ye enye.

⁶ Ntre ke Saul akakpa, ye nditɔ-iren esie ita, ye andibiom ŋkpɔ-ekɔŋ esie, ye kpukpru ikɔt esie, ke usen oro, ɔtɔ kiet.

⁷ Ndien adaŋemi nditɔ Israel eke edude ke edem itihere oko, ye mmɔ eke edude ke edem Jordan oko, ekutde nte nditɔ Israel efeŋede, ye nte Saul ye nditɔ esie ema enyuŋ ekpa, mmɔ ekpɔŋ mme obio efeŋe; ndien mme Philistine edi ediduŋ ke esit.

⁸ Edikem mkpɔŋ, mme Philistine edi ndisioŋo mme akpa-mkpa ŋkpɔ ke idem, ndien mmɔ ekut Saul, ye nditɔ esie ita, nte mmɔ eduɔŋɔde ke obot Gilboa.

⁹ Ndien mmɔ ebigi enye ibuot, enyuŋ esio enye ŋkpɔ-ekɔŋ ke idem, enɔ esaŋa ke isɔŋ mme Philistine ekan ekuk, ete eketɔt ke ufɔk ibɔk mmɔ, ye ke otu kpukptu mbio-obio.

¹⁰ Ndien mmɔ esin ŋkpɔ-ekɔŋ esie ke ufɔk Ashtaroth: enyuŋ ekɔŋ okpo esie ke ibibene Beth-shan.

¹¹ Ekem adaŋemi mme andiduŋ Jabesh-gilead ekopde ebaŋa enye, (ekop) se mme Philistine ekenamde ye Saul;

¹² kpukpru mbon-ekɔŋ edaha ke enyɔŋ esaŋa ke ofuri okoneyo, ekekɔŋɔre okpo Saul ye mme okpo nditɔ esie ke ibibene Beth-shan efep, ndien enyɔŋɔ ke Jabesh ekefɔp mmɔ ke ikaŋ do.

¹³ Ndien mmɔ eda mme ɔkpɔ mmɔ ebuk ke idak tamarisk kiet ke Jabesh, enyuŋ etre udia ke ofuri usen itiaba.