1 SAMUEL 29 - Edisana ñwed Abasi Ibom

Mbon Philistine Inyimeke David Etiene Mmɔ Aka Ekɔŋ

¹ EDIKEM mme Philistine ebon kpukpru mbon-ekɔŋ mmɔ ke Aphek: ndien Israel enam nna-ekɔŋ ke mben idim kiet emi odude ke Jezreel.

² Ndien mbɔŋ mme Philistine esaŋa ke ikie, ke ikie, ye ke tɔsin ke tɔsin, ebe: David ye ikɔt esie enyuŋ esaŋa ke ukpere-edem ye Achish, ebe.

³ Ndien mbɔŋ mme Philistine ebup, ete, Mme Hebrew emi edi mme anie? Ndien Achish ɔbɔrɔ mbɔŋ mme Philistine, ete, Nte emi idige David, owo Saul edidem Israel, emi ama okodu ye ami anyan ini emi, mme ke mme isua emi, ndien ŋkanam ŋkwe enye baba idiɔk ŋkpɔ kiet ke idem, ɔtɔŋɔde ke usen oro enye etienede mi, tutu osim mfin emi.

⁴ Ndien mbɔŋ mme Philistine eyat esit ye enye; mbɔŋ mme Philistine enyuŋ edɔhɔ enye, ete, Nam owo emi afiak, man enye aka ebiet esie emi afo okonimde ɔnɔ enye, enye okunyuŋ etiene nnyin ɔsuhɔre aka ekɔŋ, mbak edikabare edi usua nnyin ke ekɔŋ: koro enye akpada nso enem ete esie esit, ke midige mbuot mbon emi?

⁵ Nte emi idige David oro mmɔ ekekwɔde ke unek, ete, Saul ama owot mme tɔsin esie, edi David mme tɔsin esie duop?

⁶ Ndien Achish okot David edi, onyuŋ ɔdɔhɔ enye, ete, Ma uwem Jehovah, afo emenen; erisaŋa emi afo asaŋade ye ami ɔwɔrɔ, onyuŋ asaŋade ye ami oduk ke nna-ekɔŋ ɔfɔn mi eti-eti: koro mmeŋka-ŋkwe fi idiɔk ido ke idem, toto ke usen oro afo ekedide ke ebiet mi, tutu osim mfin emi: edi mbɔŋ oro isehe fi ke eti owo.

⁷ Fiak edem, ndien, nyuŋ saŋa suŋ, kunyuŋ unam se idiɔkde ke enyin mbɔŋ mme Philistine.

⁸ Ndien David ɔdɔhɔ Achish, ete Nso ŋkpɔ naŋa ke ŋkanam? Afo onyuŋ okut owo fo nso ŋkpɔ ke idem toto ke usen oro ŋkodude ke iso fo, tutu osim mfin emi, eke esinde mi ŋkuka ŋkaŋwana ye mme asua ɔbɔŋ mi edidem?

⁹ Ndien Achish ɔbɔrɔ David, ete, Mmɔfiɔk nte ke afo ɔmɔfɔn ke iso mi nte angel Abasi: edi mbɔŋ mme Philistine edɔhɔ, ete, Yak enye okutiene nnyin ɔdɔk aka ekɔŋ.

¹⁰ Bak, ndien, daha ke enyɔŋ ke usenubɔk ye ikɔt usɔ oro esaŋade ye afo edi: ndien adaŋemi mbufo ebakde edemere ke usenubɔk, enyuŋ ekutde uŋwana, mbufo enyɔŋɔ.

¹¹ Ntre ke David abak edemere ye ikɔt esie, mmɔ enyuŋ esaŋa ke usenubɔk enyɔŋ eka ke idut mme Philistine. Ndien mme Philistine edɔk eka ke Jezreel.