1 SAMUEL 26 - Edisana ñwed Abasi Ibom

David Ɔtɔŋɔ Ntak Esin Ndiwot Saul

¹ EKEM mbio-obio Ziph eka ɔtɔ Saul ke Gibeah, ete, Nte David idibehe ke obot Hachilah, emi asakde iso ese Jeshimon?

² Ndien Saul adaha ke enyɔŋ ɔsuhɔre ke wilderness Ziph, tɔsin edimek owo Israel ita enyuŋ esaŋa ye enye, man eyom David ke wilderness Ziph.

³ Ekem Saul anam nna ke mben usuŋ, ke obot Hachilah emi asakde iso ese Jeshimon. Edi David etie ke wilderness, onyuŋ okut ete ke Saul edi ndibine imɔ ke wilderness.

⁴ Ekem David ɔdɔŋ mbon uyep, ndien ɔfiɔk ete ke Saul edi ke akpanikɔ.

⁵ Ndien David adaha ke enyɔŋ aka ke ɔtɔ emi Saul anamde nna-ekɔŋ; David onyuŋ okut ebiet emi Saul anade do, ye Abner eyen Ner, etubom mbon-ekɔŋ esie: ndien Saul ana do ke ebiet mkpoduoho, kpukpru owo enyuŋ ena ekan enye ekuk,

⁶ Ndien David ɔbɔrɔ Ahimelech Hittite, ye Abishai eyen Zeruiah, eyen-eka Joab, ete, Anie editiene mi ɔsuhɔre ke ɔtɔ Saul ke nna-ekɔŋ? Ndien Abishai ɔdɔhɔ ete, Ami nyetiene fi nsuhɔre.

⁷ Ekem David asaŋa ye Abiashai aka ke ɔtɔ mbon oro ke okoneyo: ndien, sese, Saul ana ke isɔŋ ede ke ɔtɔ mkpoduoho, eduat esie onyuŋ ɔwuhɔ ke isɔŋ ke ɔtɔ udoribuot esie: Abner ye kpukpru owo enyuŋ ena ekan enye ekuk.

⁸ Ndien Abishai ɔdɔhɔ David, ete, Abasi amada usua fo esin fi ke ubɔk mfin emi: mbɔk, kam yak nda eduat ŋkim enye ndian ke isɔŋ ini kiet, ndien ndikim ke enye utim ikaba.

⁹ Ndien David ɔdɔhɔ Abishai, ete, Kusobo enye: koro anie edinyan ubɔk esie otuk enye emi Jehovah ekeyetde aran, ndien etre ndidue isop?

¹⁰ David onyuŋ ɔdɔhɔ ete, Ma uwem Jehovah, Jehovah eyewot enye; mme ini mkpa esie eyedi; mme enye eyesuhɔre ke ekɔŋ, ndien atak.

¹¹ Nsa mi O, ma Jehovah, ndinyanke ubɔk mi ntuk enye emi Jehovah ekeyetde aran: edi, mbɔk, kam men eduat emi odude ke ɔtɔ udoribuot esie, ye abaŋ mmɔŋ, ndien yak nnyin inyɔŋ.

¹² Ntre ke David emen eduat, ye abaŋ mmɔŋ, ke ɔtɔ udoribuot Saul; ndien mmɔ enyɔŋ, edi baba owo kiet ikwe, baba owo kiet inyuŋ ifiɔkke, baba kiet inyuŋ idemekede: koro kpukpru mmɔ edede idap; koro ɔkpɔsɔŋ idap Jehovah ɔduɔde mmɔ ke idem.

¹³ Ndien David ebe aka edem oko ke ibuot obot kiet; akamba ufaŋ esine mmɔ ke ufɔt:

¹⁴ ndien David ofiori okot mbon oro, ye Abner eyen Ner, ete, Oro uyereke, Abner? Ndien Abner eyere, ete, Afo emi ofioride okot edidem edi anie owo?

¹⁵ Ndien David ɔdɔhɔ Abner, ete, Nte afo udige eren-owo? Anie owo onyuŋ ebiet fi ke Israel? Nsinam ndien mukpemeke usɔ, edidem? koro owo kiet okodukde ete iwot edidem ɔbɔŋ fo.

¹⁶ Ŋkpɔ oro afo akanamde idige eti. Ma uwem Jehovah, mbufo emedot mkpa, koro mbufo mikekpemeke ɔbɔŋ mbufo, emi Jehovah ekeyetde aran. Enye eduat edidem ŋko, ye abaŋ mmɔŋ emi ekedude ke ɔtɔ udoribuot esie?

¹⁷ Ekem Saul ɔdiɔŋɔ David uyo, onyuŋ ɔdɔhɔ, ete, Nte uyo fo edi oro, eyen mi, David? Ndien David ɔdɔhɔ ete, Uyo mi, O edidem ɔbɔŋ mi.

¹⁸ Enye onyuŋ ɔdɔhɔ ete, Nsinam ɔbɔŋ mi ebinede owo esie ntem? Ŋkanam nso, ndien? Ewe idiɔk -ŋkpɔ onyuŋ odu mi ke ubɔk?

¹⁹ Mbɔk, ndien, yak ɔbɔŋ mi edidem okop uyo owo esie. Ndi Jehovah ekedemere fi ete ebine mi, yak enye ɔbɔ uwa; edi ama edi nditɔ owo, osuk ɔdɔdiɔk ɔnɔ mmɔ ke iso Jehovah; koro mmɔ emebin mi efep mfin emi, esin mi ŋkusop idem ye udeme Jehovah, ete, Ka kanam ŋkpɔ nɔ Abasi efen.

²⁰ Kuyak ndien iyip mi ɔduɔ ke isɔŋ ke iso Jehovah: koro edidem Israel ɔmɔwɔrɔ ndiyom idaŋ ebua kiet kpa nte owo ebinede nduduɔk ke ikpɔ obot.

²¹ Ndien Saul ɔdɔhɔ ete, Mmanam idiɔk: fiak edem, eyen mi, David: koro mmendinamke aba fi idiɔk ŋkpɔ; koro afo akabatde uwem mi ke ŋkpɔ uto mfin emi: sese, mmanam ndisime, mma nnyuŋ ndue eti-eti.

²² Ndien David ɔbɔrɔ ete, Se eduat edidem! yak akparawa kiet ndien ebe edibɔ enye.

²³ Yak Jehovah onyuŋ ada ido ye akpanikɔ owo osio owo oro usiene: koro Jehovah ekemende fi esin mi ke ubɔk mfin emi, edi ŋkonyimeke ndinyan ubɔk mi ntuk enye emi Jehovah ekeyetde aran.

²⁴ Ndien, sese, kpa nte ŋkabatde uwem fo ke akamba ŋkpɔ mfin emi, kpa ntre yak Jehovah onyuŋ abat uwem mi ke akamba ŋkpɔ, onyuŋ osio mi ke kpukpru nnanenyin.

²⁵ Ndien Saul ɔdɔhɔ David, ete, Ɔfɔfɔn ɔnɔ fi, eyen mi, David: afo udutreke nditim nnam, nnyuŋ ŋkut unen. Ndien David ɔnyɔŋ esiemɔ, Saul onyuŋ afiak ke ebiet esie ŋko.