1 SAMUEL 25 - Edisana ñwed Abasi Ibom

Samuel Akpa ye Mbuk David ye Abigail

¹ EKEM Samuel akpa; ndien ofuri Israel esop idem, eketua enye, enyuŋ ebuk enye ke ufɔk esie ke Ramah. Ndien David adaha ke enyɔŋ ɔsuhɔre aka ke wilderness Paran.

² Ndien owo kiet odu ke Maon, emi inyene esie edude ke Carmel; owo oro onyuŋ okpon eti-eti, enye onyuŋ enyene tɔsin erɔŋ ita, ye tɔsin ebot; ndien enye afat erɔŋ esie ke Carmel.

³ Ndien enyiŋ owo oro ekere Nabal; enyiŋ ŋwan esie onyuŋ ekere Abigail: ndien ŋwan oro enyene eti ibuot, onyuŋ eye iso: edi eren oro ɔsɔŋ ido, onyuŋ ɔdiɔk ido; enye onyuŋ oto ke oruk Caleb.

⁴ Ekem David etie ke wilderness okop ete ke Nabal ke afat erɔŋ esie idet.

⁵ Ndien David ɔdɔŋ mkparawa duop utom, David onyuŋ ɔdɔhɔ mkparawa oro, ete, Mbufo edɔk ke Carmel, eka ke ɔtɔ Nabal, enyuŋ ekɔm enye ke enyiŋ mi:

⁶ enyuŋ edɔhɔ enye ntem, ete, Yak itɔŋ uwem ɔsɔŋ fi: osuk ɔfɔn ɔnɔ fi, onyuŋ ɔfɔn ɔnɔ ufɔk fo, onyuŋ ɔfɔn ɔnɔ kpukpru se afo enyenede.

⁷ Ke emi mmokop ete ke afo enyene mme andifat: ndien mme ekpeme ufene fo ekedu ye nnyin; nnyin ikanamke mmɔ ŋkpɔ, baba ŋkpɔ kiet ikonyuŋ isopke mmɔ ofuri ini oro mmɔ ekedude ke Carmel.

⁸ Bup mkparawa fo, ndien mmɔ eyetiŋ enɔ fi. Fɔn ido ndien ye mkparawa emi: koro nnyin idide ke eti usen: mbɔk, da se idukde fi ke ubɔk nɔ ikɔt fo, ye eyen fo David.

⁹ Ntre mkparawa David eka eketiŋ kpukpru ikɔ emi ke enyiŋ David enɔ Nabal, ndien edop.

¹⁰ Ndien Nabal ɔbɔrɔ ikɔt David, ete, David edi anie? eyen Jesse onyuŋ edi anie? Ke eyo emi ediwak ifin edu emi edianarede ekpɔŋ mme ete mmɔ.

¹¹ Nte nda uyo mi, ye mmɔŋ mi, ye unam mi emi ŋwotde nnɔ mme andifat erɔŋ mi, nnɔ mbon eke mmemfiɔkke ebiet eke mmɔ etode?

¹² Ndien mkparawa David ekabare enyɔŋ eke mmɔ, enyuŋ efiak edem eka eketiŋ kpukpru ikɔ emi enɔ enye.

¹³ Ndien David ɔdɔhɔ ikɔt esie, ete, Mbufo kpukpru ebɔbɔ ofut mbufo. Ndien kpukpru owo ebɔbɔ ofut mmɔ; David onyuŋ ɔbɔbɔ ofut esie ŋko: ndien owo ikie inaŋ etiene David edɔk; ikie iba enyuŋ esuk ye ŋkpɔ mmɔ.

¹⁴ Edi akparawa kiet ke otu mkparawa etiŋ ɔnɔ Abigail aŋwan Nabal, ete, Sese, David etie ke wilderness ɔdɔŋ mme isuŋutom, ete edikɔm ete nnyin; ndien enye osuŋi mmɔ.

¹⁵ Edi mbon oro ekefɔn ye nnyin eti-eti, idiɔk-ŋkpɔ ndomo kiet ikonyuŋ inamke nnyin, baba ŋkpɔ nnyin kiet ikonyuŋ isopke, ke ofuri ini oro nnyin ikasaŋade ye mmɔ, ke ini nnyin idude ke obot iŋwaŋ.

¹⁶ Mmɔ ekedi ibibene nnyin ke okoneyo ye ke uwemeyo ŋko, ke ofuri ini nnyin ikodude ye mmɔ ibɔk ŋkpri ufene.

¹⁷ Fiɔk ndien, nyuŋ kere se afo edinamde: koro emeduak idiɔk-ŋkpɔ enɔ ete nnyin, ye ofuri ufɔk esie: enye onyuŋ edi oburobut owo akan nte owo ekemede ndidɔhɔ ikɔ ye enye.

¹⁸ Ndien Abigail awara ada uyo ikie iba, ye ikpa wine iba, ye erɔŋ emi etemde ition, ye edifɔp ibokpot ke idomo ition, ye ebok edisat grape ikie, ye ebok fig ikie iba, ada mmɔ odori ass ke idem.

¹⁹ Ndien enye ɔdɔhɔ mkparawa esie, ete, Mbufo ebem mi iso: sese, ami mmɔŋ ntiene mbufo ke edem. Edi itiŋke inɔ Nabal ebe esie.

²⁰ Ekem nte enye odorode ke ass, onyuŋ ɔsuhɔre ke ndibe ebiet obot, sese, David ye ikɔt esie ke esuhɔre edibiɔŋɔre enye ke iso; ndien enye osobo ye mmɔ.

²¹ Ndien David ama ɔkɔdɔhɔ ete, Ŋkɔm mma ŋkekpeme kpukpru se inyenede owo emi ke wilderness ke ikpikpu, baba ŋkpɔ esie kiet ikonyuŋ isopke: ndien enye ada idiɔk osio mi usiene eti.

²² Abasi osuk anam ntre ɔnɔ mme asua David, onyuŋ anam ntre aka iso, ke mma ŋkpɔŋ eyen-eren kiet ke otu kpukpru se enye enyenede, ke eyo esierede.

²³ Ekem adaŋemi Abigail okutde David, enye awara oto ass ke edem ɔsuhɔre, onyuŋ ɔduɔ ke isɔŋ ke iso David, otuk iso esie ɔnuhɔ ke isɔŋ.

²⁴ Onyuŋ ɔduɔ enye ke ukot, ndien ɔdɔhɔ ete, Ɔbɔŋ mi, yak idiɔk ido emi obiomo mi ke idem yak ofin aŋwan fo onyuŋ ɔdɔhɔ fi ke utɔŋ, mbɔk, nyuŋ kop uyo ofin aŋwan fo.

²⁵ Mbɔk, ɔbɔŋ mi, kukpa ndikere oburobut owo Nabal emi koro enye edide nte enyiŋ esie edide; Nabal (ndisime) edi enyiŋ esie, ndisime onyuŋ odu ye enye: edi ami ofin aŋwan fo ŋkekwe mkparawa ɔbɔŋ mi oro afo ɔkɔdɔŋde utom.

²⁶ Ndien, ɔbɔŋ mi, ma uwem Jehovah, ma uwem fo ŋko, koro Jehovah amakpan fi ndidue isop iyip, ndinyuŋ nda ubɔk fo nnyaŋa idem fo, yak mme asua fo, ye mmɔ eke eyomde ndidiɔk ye ɔbɔŋ mi ekam etie nte Nabal.

²⁷ (Se), ndien ŋkpɔ mfɔn emi ofin aŋwan fo adade ɔsɔk ɔbɔŋ mi, yak emen mmɔ enɔ mkparawa emi esaŋade ye ɔbɔŋ mi.

²⁸ Mbɔk, fen ndudue ofin aŋwan fo: koro Jehovah miditreke ndinam ɔkpɔsɔŋ ufɔk nnɔ ɔbɔŋ mi; koro ɔbɔŋ mi aŋwanade ekɔŋ Jehovah, miko-nyuŋ ikwe fi idiɔk-ŋkpɔ ke idem ke ofuri uwem fo.

²⁹ Edi owo amadaha ke enyɔŋ ndibine fi, nnyuŋ nyom uwem fo: edi eyebɔp uwem ɔbɔŋ mi esin ke ebek uwem ye Jehovah Abasi fo; edi enye eyesin uwem mme asua fo ke esit ŋkpɔ utop-itiat ofuŋ ɔduɔk.

³⁰ Ndien ama ekem ke adaŋemi Jehovah edinamde ɔbɔŋ mi kpukpru ufɔn emi enye ɔkɔdɔhɔde abaŋa fi, edinyuŋ onimde fi ke etubom Israel;

³¹ emi ididige ndien ŋkpɔ iduɔ fo, ye ŋkpɔ utɔk esit ye ɔbɔŋ mi, emi ɔbɔŋ mi ɔduɔkde iyip ke minyeneke ntak, onyuŋ anyaŋade idem fo. Ndien adaŋemi Jehovah edifɔnde ye ɔbɔŋ mi, nyuŋ ti ofin aŋwan fo.

³² Ndien David ɔdɔhɔ Abigail, ete, Ekɔm Jehovah Abasi Israel, emi ɔdɔŋde fi, ete edisobo ye ami mfin emi:

³³ enyuŋ ekɔm eti ibuot fo, enyuŋ ekɔm fi emi akpande mi, ete ŋkudue isop iyip, ŋkunyuŋ nda ubɔk mi nnyaŋa idem mi mfin emi.

³⁴ Ndien ke akpanikɔ ma uwem Jehovah Abasi Israel, emi akpande mi ndinnam fi idiɔk-ŋkpɔ, ke afo mukpawarake udi udusobo ye ami, baba eyen-eren kiet ikpɔsuhɔke inɔ Nabal ke eyo esierede.

³⁵ Ntre ke David ɔbɔ enye kpukpru se enye adade edisɔk enye, ke ubɔk, onyuŋ ɔdɔhɔ enye, ete, Dɔk ka ke ufɔk fo ke ifure; sese, mmokop uyo fo, afo omonyuŋ enem mi ŋko.

³⁶ Ndien Abigail aka ke ebiet Nabal; ndien, sese, enye ke onim akamba udia ke ufɔk esie, ebiet udia edidem; esit ke onyuŋ adat Nabal, enye onyuŋ akpa wine eti-eti: ndien ŋwan itiŋke baba ikɔ kiet inɔ enye, ekpekpri, okpokpon, tutu eyo esiere.

³⁷ Edikem ke eyo esierede, ke adaŋemi wine oro atamde Nabal, ŋwan esie obuk kpukpru ikɔ emi ɔnɔ enye, ndien esit akpa enye ke idibi, enye onyuŋ akabare etie nte itiat.

³⁸ Edikem ɔyɔhɔ usen duop Jehovah ɔtɔ Nabal owot.

³⁹ Ndien adaŋemi David okopde ete ke Nabal ama akpa, enye ɔdɔhɔ ete, Etoro Jehovah emi ɔkɔtɔhɔde utɔk ŋkpɔ but mi oro okotode ke ubɔk Nabal, okonyuŋ omumde owo esie, ete enye okunam idiɔk; koro Jehovah anamde idiɔk ido Nabal afiak ɔkɔtɔ enye ke ibuot. Ndien David ɔdɔŋ ekeneme nneme ye Abigail, ete ida enye idɔ.

⁴⁰ Ndien ikɔt David eka ke Carmel, ke ɔtɔ Abigail, ekedɔhɔ enye, ete, David ɔdɔŋ nnyin utom ke ɔtɔ fo, ete ida fi isɔk imɔ idɔ.

⁴¹ Ndien enye adaha ke enyɔŋ otuk iso esie ese isɔŋ, onyuŋ ɔdɔhɔ ete, Sese, yak owo fo akabare edi ofin aŋwan eke eyetke ikɔt ɔbɔŋ mi ukot.

⁴² Ndien Abigail awara adaha ke enyɔŋ odoro ke ass, ifin iban esie ition enyuŋ etiene enye eka; ndien enye etiene mme isuŋutom David ke edem, onyuŋ akabare edi ŋwan esie.

⁴³ David onyuŋ ada Ahinoam ke Jezreel; ndien mmɔ mbiba edi iban esie.

⁴⁴ Edi Saul ama akada Michal uduŋwan esie, ŋwan David, ɔnɔ Palti eyen Laish, emi okotode ke Gallim.