1 SAMUEL 24 - Edisana ñwed Abasi Ibom

Abasi Ada Saul Esin David ke Ubɔk Edi David Esin ndiwot Enye

¹ EDIKEM adaŋemi Saul otode ndibine mme Philistine afiak, mmɔ etiŋ enɔ enye, ete, Sese, David ke odu ke wilderness En-gedi.

² Ndien Saul ada tɔsin owo ita emi emekde ke ofuri Israel, aka ndiyom David ye ikɔt esie ke otu ikpɔ itiat ebot ikɔt.

³ Ndien enye okosim nna ŋkpri ufene ke usuŋ, emi aba itiat odude do; ndien Saul oduk aka ndifuk ukot esie: ndien David ye ikɔt esie etie do ke ŋkaŋ aba oro.

⁴ Ndien ikɔt David edɔhɔ enye, ete, Sese, emi edi usen emi Jehovah ɔkɔdɔhɔde fi, ete, Sese, nyeda usua fo nsin fi ke ubɔk, man anam enye kpa nte afo amade. Ndien David adaha ke enyɔŋ, aka okosibe utɔŋ ekura Saul ke ndibe.

⁵ Edikem ndien esit ɔduɔ David: koro enye okosibede utɔŋ ekura Saul.

⁶ Enye onyuŋ ɔdɔhɔ ikɔt esie, ete, Nsa mi, ma Jehovah, ndinamke ŋkpɔ emi ye ete mi emi Jehovah ekeyetde aran; ndinyanke ubɔk mi ntuk enye: koro enye edide se Jehovah ekeyetde aran.

⁷ Ntre ke David ada ikɔ oro akpan ikɔt esie, inyuŋ iyakke mmɔ edaha ke enyɔŋ enam Saul baba ŋkpɔ kiet. Ekem Saul adaha ke enyɔŋ oto ke aba aka esiemɔ.

⁸ Ndien David onyuŋ etiene enye adaha ke enyɔŋ, oto ke aba ɔwɔrɔ, onyuŋ ofiori okot Saul, ete, Ete mi edidem! Ndien ke ini Saul akabarade ese edem, David otuk iso esie ese isɔŋ, onyuŋ ɔnuhɔ.

⁹ Ndien David ɔdɔhɔ Saul, ete, Nsinam afo okopde uyo owo, ete, Sese, David ke oyom ndinam fi ŋkpɔ?

¹⁰ Sese, mfin emi enyin fo emekut nte Jehovah akadade fi esin mi ke ubɔk mfin emi ke esit aba emi; ndien owo ɔdɔhɔ mi, ete ŋwot fi; edi ŋkatua fi mbɔm; nnyuŋ ndɔhɔ nte ke ndinyanke ubɔk mi ntuk ɔbɔŋ mi; koro edi enye ke Jehovah ekeyet aran.

¹¹ Ndien ŋko, ete mi, se utɔŋ ekura fo ke ubɔk mi: koro ŋkesibede utɔŋ ekura fo mfep, ndien mme-ŋwotke fi, da oro fiɔk, nyuŋ se, ete ke idiɔk ido ye ukwaŋ-ŋkpɔ iduhe mi ke ubɔk, ŋkonyuŋ nduehe fi baba ŋkpɔ kiet; edi afo ke osuk ebine ndibɔ mi uwem.

¹² Jehovah osuk ekpe ikpe ke ufɔt mi ye afo, Jehovah osuk onyuŋ osio usiene ye afo ɔnɔ mi: edi ubɔk mi iditukke fi.

¹³ Nte mbio eset eketopde ŋke, ete, Idiɔk ido oto mme idiɔk owo: edi ubɔk mi iditukke fi.

¹⁴ Edidem Israel ɔmɔwɔrɔ oyom anie? Afo ke ebine anie? Ke ebine okpo ebua: ke ebine idaŋ ebua kiet.

¹⁵ Jehovah osuk edi ebierikpe ndien, onyuŋ ekpe ikpe ke ufɔt mi ye afo, onyuŋ ese, onyuŋ ɔtɔhɔ utɔk mi, onyuŋ osio mi efep ke ubɔk fo.

¹⁶ Edikem adaŋemi David eketrede nditiŋ ikɔ emi ye Saul, Saul ɔdɔhɔ ete, Nte emi edi uyo fo, eyen mi David? Ndien Saul emenere uyo esie atua eyet.

¹⁷ Enye onyuŋ ɔdɔhɔ David, ete, Afo emenen akan mi: koro afo akadade eti ŋkpɔ usiene ɔnɔ mi: edi ami nda idiɔk-ŋkpɔ nsio fi usiene.

¹⁸ Afo ama onyuŋ etiŋ eti ŋkpɔ oro afo akanamde ye ami mfin emi: koro Jehovah akadade mi esin fi ke ubɔk, ndien afo uwotke mi.

¹⁹ Ke ini owo okutde asua esie, nte eyeyak enye ɔbɔhɔ ke ifure? Jehovah osuk ada eti ŋkpɔ osio fi usiene ke ibuot ŋkpɔ emi afo akanamde ye ami mfin emi.

²⁰ Ndien, sese, mmɔfiɔk nte ke afo udutreke ndidi edidem, nte ke itie edidem Israel eyenyuŋ ɔsɔŋ ada fi ke ubɔk.

²¹ Tomo, ndien, Jehovah nɔ mi, ete ke afo udusibeke ubon mi emi editienede mi, ufep, ete ke afo udunyuŋ usoboke enyiŋ mi ke ufɔk ete mi ufep.

²² Ndien David ɔŋwɔŋɔ ɔnɔ Saul. Ndien Saul ɔnyɔŋ ufɔk esiemɔ; edi David ye ikɔt esie edɔk ke ɔkpɔsɔn ebiet oro.