1 SAMUEL 22 - Edisana ñwed Abasi Ibom

David ye Mme Nsaŋa Esie ke Obio Adullam

¹ NDIEN David adaha do, efehe ɔbɔhɔ aka ke aba itiat Adullam: ndien adaŋemi nditɔ-ete esie ye ofuri ufɔk ete esie ekopde, mmɔ esuhɔre etiene enye do.

² Ndien kpukpru owo nnan-enyin, ye kpukpru owo isɔn, ye kpukpru owo eke esit minemke mmɔ, esop idem ke ɔtɔ esie; enye onyuŋ akabare edi etubom mmɔ: ntre ke owo ikie inaŋ edu ye enye.

³ Ekem David oto do aka Mizpeh Moab: ɔkɔdɔhɔ edidem Moab, ete, Mbɔk, yak ete mi ye eka mi ewɔrɔ etiene fi, tutu ndifiɔk se Abasi edinamde ye ami.

⁴ Ndien enye ada mmɔ onim ke iso edidem Moab: ndien mmɔ eduŋ ye enye ke ofuri ini emi David odude ke ɔkpɔsɔŋ ebiet oro.

⁵ Ndien prophet Gad ɔdɔhɔ David, ete, Kutie ke ɔkpɔsɔŋ ebiet emi; daha ka ke isɔŋ Judah. Ndien David aka okoduk ke akai Hereth.

⁶ Ekem Saul okop ete ke ema ekut David, ye mbon emi edude ye enye. Ndien Saul etie ke Gibeah ke idak tamarisk kiet ke edikoŋ ebiet, ye eduat ke ubɔk, kpukpru ikɔt esie enyuŋ eda ekpere enye.

⁷ Ndien Saul ɔdɔhɔ ikɔt esie emi edade ekpere enye, ete, Mbufo, nditɔ Benjamin, ekop ndien; nte eyen Jesse eyeda iŋwaŋ ye iŋwaŋ vine ɔnɔ kpukpru mbufo ŋko, onyuŋ onim kpukpru mbufo ke mme etubom mme tɔsin, ye mme etubom mme ikie;

⁸ eke esinde kpukpru mbufo eduk odu ebaŋa mi, baba owo kiet eke asiande mi, ete ke eyen mi ama odiomi ediomi ye eyen Jesse, inyuŋ iduhe; baba owo mbufo kiet inyuŋ ituaha mi mbɔm, inyuŋ isianke mi, ite ke eyen mi edemere owo mi, ete enye etie ebet man anam mi ŋkpɔ, kpa nte edide mfin emi?

⁹ Ndien Doeg, eyen Edom, emi edide etubom ikɔt Saul, ɔbɔrɔ ete, Ŋkokut eyen Jesse nte enye akade Nob, etiene Ahimelech eyen Ahitub.

¹⁰ Ndien enye obup uyo Jehovah ɔnɔ enye, onyuŋ ɔnɔ enye udia, onyuŋ ɔnɔ enye ofut Goliath Philistine.

¹¹ Ndien edidem ɔdɔŋ ekekot Ahimelech eyen Ahitub, oku, ye ofuri ufɔk ete esie, mme oku eke edude ke Nob: ndien kpukpru mmɔ edi ke ɔtɔ edidem.

¹² Ndien Saul ɔdɔhɔ ete, Eyen Ahitub, kop ndien. Ndien enye ɔdɔhɔ ete, Se mi mi, ɔbɔŋ mi.

¹³ Ndien Saul ɔdɔhɔ enye, ete, Nsinam mbufo edukde odu ebaŋa mi, afo ye eyen Jesse, emi afo ɔkɔnɔde udia ye ofut, okonyuŋ obupde uyo Abasi ɔnɔ enye, man enye adaha ke enyɔŋ etie edet, ete inam mi ŋkpɔ, kpa nte edide mfin emi?

¹⁴ Ahimelech ɔbɔrɔ edidem, ete, Ndien anie ke otu kpukpru ikɔt fo etie nte David, owo akpanikɔ, ye ukot edidem, emi onyuŋ edide owo mbet fo kiet, onyuŋ enyenede ukpono ke ufɔk fo?

¹⁵ Nte ŋkɔtɔŋɔ ndibup uyo Abasi nnɔ enye usen oro? Nsa mi O! Edidem okudori owo esie ikɔ, ekudoro owo ufɔk ete mi baba kiet: koro owo fo mikɔfiɔkke ŋkpɔ emi baba kiet, edide ekpri, onyuŋ edide akamba.

¹⁶ Ndien edidem ɔdɔhɔ ete, Ahimelech, afo enyene ndikpa, afo, ye ofuri ufɔk usɔ.

¹⁷ Ndien edidem ɔdɔŋ mbon nsɔp-itɔk emi edade ye enye, ete, Mbufo esaŋa ekpere ekewot mme oku Jehovah: koro ubɔk mmɔ onyuŋ odude ye David; koro mmɔ ekenyuŋ efiɔkde ete ke enye efefehe, ndien itiŋke inɔ mi. Edi ikɔt edidem inyimeke ndinyan ubɔk mmɔ ŋwot mme oku Jehovah.

¹⁸ Ndien edidem ɔdɔhɔ Doeg, ete, Afo saŋa kpere kowot mme oku. Ndien Doeg Edomite oro asaŋa ekpere okowot mme oku, ndien ke usen oro enye owot owo anaŋ ye ition eke esinede ephod linen.

¹⁹ Enye onyuŋ ada iso ofut abiat Nob, obio mme oku, ɔtɔŋɔde ke eren tutu osim ŋwan, ye eyenɔwɔŋ, ye nsek eyen, ye enaŋ, ye ass, ye ŋkpri ufene.

²⁰ Edi eyen Ahimelech, eyen Ahitub, kiet, ekere Abiathar, ɔbɔhɔ, ndien enye efehe etiene David.

²¹ Ndien Abiathar etiŋ ɔnɔ David, ete ke Saul okowot mme oku Jehovah.

²² Ndien David ɔdɔhɔ Abiathar, ete, Mma mfiɔk ke usen oro Doeg Edomite okodude do, nte ke enye iditreke nditiŋ nnɔ Saul: ami ndi ntak mkpa kpukpru owo ufɔk usɔ.

²³ Tie ye ami, kufehe ndik: koro andiyom uwem mi ke oyom uwem fo; koro afo edide se ndikpemede.