1 SAMUEL 21 - Edisana ñwed Abasi Ibom

David Efeghe Mbak Saul Ediwot Enye

¹ NDIEN David aka ke Nob, etiene Ahimelech oku: ndien Ahimelech edikhe adaŋemi enye osobode ye David, ndien ɔdɔhɔ enye, ete, Nsinam afo asaŋade ikpɔŋ, ndien owo baba kiet miduhe ye afo?

² Ndien David ɔbɔrɔ Ahimelech oku, ete, Edidem ɔmɔdɔŋ mi utom, onyuŋ ɔdɔhɔ mi ete, Kuyak owo ɔfiɔk utom emi ami ndɔŋde fi, ye emi ŋwukde fi: ndien mma nteme ikɔt mi ebiet (nte ekpebetde).

³ Nso ŋkpɔ odu fi ke ubɔk ndien? Sin mi uyo ition ke ubɔk, mme udia eke ebietde.

⁴ Ndien oku ɔbɔrɔ David, ete, Uyo eke misanake iduhe mi ke ubɔk, edi edisana uyo odu; edieke mkparawa ekpemede idem mmɔ ke iban.

⁵ Ndien David ɔbɔrɔ oku, onyuŋ ɔdɔhɔ enye, ete, Ih; ŋkɔm ŋwan ikoduhe ye nnyin mkpɔŋ ye edem mkpɔŋ nte ŋkɔwɔrɔ: ŋkpɔ mkparawa oro enyuŋ esana: ndien okposuk edi nte usuŋ misanake, ŋkɔm ŋkpɔ eyesin enye asana mfin emi.

⁶ Ndien oku ɔnɔ enye edisana uyo: koro baba uyo miduhe do, ke mibɔhɔke uyo iso eke mmɔ emende ke iso Jehovah efep, man ediɔk edifɔp uyo ke usen eke emende enye efep.

⁷ Ndien ke usen oro owo Saul kiet odu do, ebet ke iso Jehovah; ndien enyiŋ esie ekere Doeg, eyen Edom kiet, etubom mme ɔbɔk-ufene Saul.

⁸ David onyuŋ obup Ahimelech, ete, Nte eduat mme ofut inyuŋ iduhe mi ke ubɔk fo? koro mme ŋkadaha ofut mi ye ŋkpɔ-ekɔŋ mi ke ubɔk: koro utom edidem edide ke nnyek idem.

⁹ Ndien oku ɔdɔhɔ ete, Ofut Goliath Philistine oro afo okowotde ke itihere Elah, sese, enye ɔmɔbɔbɔ ke ɔfɔŋ ke edem ephod: afo ama oyom enye, da, koro efen miduhe mi ke mibɔhɔke enye. Ndien David ɔdɔhɔ ete, Baba kiet ibietke enye, nɔ mi oro.

¹⁰ Ntre ke David adaha ke usen oro efehe ɔkpɔŋ Saul, ndien aka ke ebiet Achish ɔbɔŋ Gath.

¹¹ Ndien ikɔt Achish edɔhɔ enye, ete, Nte emi idige David edidem idut oro? Nte idige enye ke mmɔ ekekwɔ ebaŋa ke unek, ete, Saul ama owot mme tɔsin esie; edi David ama owot mme tɔsin esie duop?

¹² Ndien David onim ikɔ emi ke esit esie, ndik Achish edidem Gath onyuŋ anam enye eti-eti.

¹³ Enye onyuŋ ɔkpuhɔre ido esie ke iso mmɔ, onyuŋ onim idem esie nte idat ke ubɔk mmɔ, onyuŋ ewet ke itim enyin-usuŋ, onyuŋ ɔkpɔhi udɔt ɔduɔk ke ntaŋebek esie.

¹⁴ Ndien Achish ɔdɔhɔ ikɔt esie, ete, Sese, owo emi ke adama idat: nsinam mbufo edade enye esɔk mi?

¹⁵ Nte idat anana mi, eke esinde mbufo eda owo emi edi, ete enye edidama ɔnɔ mi? Nte owo emi ediduk ke ufɔk mi?