1 SAMUEL 20 - Edisana ñwed Abasi Ibom

David Anam Ufan ye Jonathan

¹ EKEM David adaha ke Naioth ke Ramah efehe aka ɔkɔdɔhɔ ke iso Jonathan, ete, Ŋkanam nso? Nsidi idiɔk ido mi? Ŋkonyuŋ nnam nso idiɔk ŋkpɔ ke iso usɔ, eke esinde enye oyom uwem mi?

² Ndien enye ɔbɔrɔ enye, ete, Nsa fo O: udukpaha kpa: sese, ete mi inamke ŋkpɔ, edide akamba, onyuŋ edide ekpri, ke miyarakede enye ke utɔŋ mi: ndien ete mi akpanam didie edip mi ŋkpɔ emi? ikemke ntre.

³ Ndien David ɔŋwɔŋɔ ŋko, ete, Usɔ ɔmɔfiɔk ete ke afo amama mi; ndien enye, ɔdɔhɔ ete, Kuyak Jonathan ɔfiɔk emi, mbak esit ediyat enye: edi ma uwem Jehovah, ma uwem idem fo ŋko, ayak ikpat kiet ami ndikpa.

⁴ Ndien Jonathan ɔdɔhɔ David, ete, Se afo ɔdɔhɔde, oro ke ndinam nnɔ fi.

⁵ Ndien David ɔdɔhɔ Jonathan, ete, Sese, mkpɔŋ edi obufa ɔfiɔŋ, ndien ŋkpetreke nditie ke itie udia ye edidem: edi yak ŋka ŋkedibe ke ikɔt, tutu osim ke ɔyɔhɔ mbubreyo ita.

⁶ Usɔ ama oyom mi, dɔhɔ ndien, ete, David ekebeŋe mi, ete nyak imɔ ifehe ika Bethlehem obio imɔ: koro ofuri oruk imɔ eyomde ndiwa uwa isua do.

⁷ Enye ama ɔdɔhɔ ntre, ete, Ɔfɔn; owo fo eyekut ifure: edi enye ama ayat esit eti-eti, fiɔk ete ke enye amaduak mi idiɔk uduak.

⁸ Nyuŋ nam ido ufan ye owo fo; koro afo akanamde owo fo oduk ke ediomi Jehovah ye afo; edi edieke idiɔk-ŋkpɔ odude ye ami, afo wot mi; akpanam didie ada mi ɔsɔk usɔ?

⁹ Ndien Jonathan ɔdɔhɔ, ete, Nsa fo O! koro ŋkpɔfiɔk nte ke ete mi ɔmɔŋ aduak ete idiɔk-ŋkpɔ anam fi, ŋkpetiŋke nnɔ fi?

¹⁰ Ndien David ɔdɔhɔ Jonathan, ete, Anie editiŋ inɔ mi? Mme nso ɔkpɔsɔŋ ikɔ ke usɔ edidɔhɔ fi?

¹¹ Ndien Jonathan ɔdɔhɔ David, ete, Di nnyin iwɔrɔ iduk ikɔt. Ndien mmɔ mbiba ewɔrɔ eduk ikɔt.

¹² Ndien Jonathan ɔdɔhɔ David, ete, O Jehovah Abasi Israel, ke ami nditimde mbup ete mi ke adaŋa emi mkpɔŋ, mme okut, ndien, sese, ama ɔfɔn ɔnɔ David, ndien mmendidɔŋke edisian fi;

¹³ Jehovah osuk anam ntre ye Jonathan, onyuŋ anam aka iso: edi edieke ete mi amade ndinam fi idiɔk-ŋkpɔ, nyenyuŋ nsian fi, nnyuŋ nyak fi ɔnyɔŋ ke emem: ndien Jehovah osuk odu ye afo, kpa nte okodude ye ete mi.

¹⁴ Ndien idige ke eyo uwem mi ikpɔŋ ke afo ediwut mi ima Jehovah,man ŋkukpa:

¹⁵ Edi kusibe ima fo ufep ke ufɔk mi ke nsinsi: kusibe ke idem ini emi Jehovah edikpokde mme asua David kpukpru; efep ke iso isɔŋ.

¹⁶ Ntre ke Jonathan odiomi ediomi ye ufɔk David, ete, Jehovah osuk osio usiene ye mme asua David.

¹⁷ Ntre ke Jonathan anam David ɔtɔŋɔ ntak ɔŋwɔŋɔ, koro amade enye: koro amade enye ke ima esit.

¹⁸ Ndien Jonathan ɔdɔhɔ enye, ete, Mkpɔŋ edi obufa ɔfiɔŋ: ndien eyeyom fi koro itie fo edinade ukpɔk.

¹⁹ Ndien ke ɔyɔhɔ usen ita kutre ndisuhɔre iwiwa ndi ke ebiet oro afo okodibede do ke usen utom oko, nyuŋ tie ke mben itiat Ezel.

²⁰ Ndien ami nyetop idaŋ ita ke edem esie nte ŋkpɔ eke ŋketde.

²¹ Ndien, sese, nyedɔŋ akparawa oro utom, nte, Ka kataŋ idaŋ oro. Mma ndɔhɔ eyen oro, nte, Sese, idaŋ edu fi ke edem emi, da mmɔ; ndien afo edi: koro ɔfɔnde ɔnɔ fi, ikɔ inyuŋ iduhe, ma uwem Jehovah.

²² Edi mma ndɔhɔ ntem ye eyenɔwɔŋ oro, nte, Sese, mme idaŋ edu fi ke edem oko; ka koro Jehovah ɔdɔŋde fi aka.

²³ Ndien ama edi ikɔ oro ami ye afo iketiŋde, sese, Jehovah odu ke ufɔt mi ye afo ke nsinsi.

²⁴ Ntre ke David edibe ke iŋwaŋ: ndien adaŋemi obufa ɔfiɔŋ ɔwɔrɔde, edidem ɔsuhɔre etie ndidia ŋkpɔ.

²⁵ Ntre edidem etie ke itie esie, nte akam esitiede, kpa ke itie ibibene; ndien Jonathan adaha ke enyɔŋ, Abner onyuŋ etie Saul ke ŋkaŋ, edi itie David ana ukpɔk.

²⁶ Edi Saul idɔhɔke baba ikɔ kiet ke usen oro; koro enye ekerede, ete, Mme ŋkpɔ akanam enye, esin enye okusana; ŋkɔm enye isanake.

²⁷ Edikem mkpɔŋ, ke udiana-akpa usen ɔfiɔŋ, itie David onyuŋ ana ukpɔk: ndien Saul ɔdɔhɔ Jonathan eyen esie, ete, Nsinam eyen Jesse midige udia mkpɔŋ, ye mfin?

²⁸ Ndien Jonathan ɔbɔrɔ Saul, ete, David ekebeŋe mi eti-eti, ete imɔ ika Bethlehem:

²⁹ enye okonyuŋ ɔdɔhɔ ete, Mbɔk, yak ŋka; koro uwa oruk nnyin odude ke obio, eyen-eka mi ŋko onyuŋ owuk mi: mmɔdo edieke afo amade mi, mbɔk, yak ŋwara ŋka ŋkokut nditɔ-eka mi. Mmɔdo enye midige okpokoro edidem.

³⁰ Ndien Saul ayat esit ye Jonathan, onyuŋ ɔdɔhɔ enye, ete, Afo eyen aŋwan ukwaŋ ye itun, nte mfiɔkke nte afo ememek eyen Jesse, ke ŋkpɔ but fo, ye ke ŋkpɔ but iferi uka?

³¹ Koro adaŋa ini nte eyen Jesse edidude uwem ke isɔŋ, afo udusɔŋɔke uda, ubɔŋ fo idinyuŋ isɔŋɔke ida. Dɔŋ ndien ekeda enye esɔk mi: koro enye edide owo mkpa.

³² Ndien Jonathan ɔbɔrɔ Saul ete esie, onyuŋ ɔdɔhɔ enye, ete, Enye edikpa abaŋa nso? Enye akanam nso?

³³ Ndien Saul otop eduat oyom enye nditɔ: ndien Jonathan ɔfiɔk ete ke ete esie ɔmɔŋ aduak ndiwot David.

³⁴ Ndien Jonathan obumere iyaresit adaha ke okpokoro, inyuŋ idiaha ŋkpɔ ke udiana-akpa usen ɔfiɔŋ: koro esit ayatde enye abaŋa David: koro ete esie anamde oburobut ido ye enye.

³⁵ Edikem ke eyo esierede, Jonathan ɔwɔrɔ aka iŋwaŋ, ke ini oro enye okodoride ye David, ekpri eyenɔwɔŋ kiet onyuŋ asaŋa ye enye.

³⁶ Ndien enye ɔdɔhɔ eyen-ɔwɔŋ esie, ete, Fehe ka koyom idaŋ emi ami ntopde. Eyenɔwɔŋ efehe, ndien enye otop idaŋ ebe enye.

³⁷ Ndien ke ini eyenɔwɔŋ osimde ebiet idaŋ oro Jonathan okotopde, Jonathan ofiori okot eyenɔwɔŋ ete, Nte idaŋ iduhe ko ke iso fo?

³⁸ Jonathan onyuŋ ofiori okot eyenɔwɔŋ oro, ete, Sɔp, men idem, kubigi. Ndien eyenɔwɔŋ Jonathan ataŋ idaŋ oro etiene ete esie.

³⁹ Edi eyen oro ifiɔkke baba ŋkpɔ kiet; edi David ye Jonathan efiɔk ŋkpɔ oro.

⁴⁰ Ekem Jonathan ayak ŋkpɔ-utop esie ɔnɔ eyeŋɔwɔŋ esie, onyuŋ ɔdɔhɔ enye, ete, Da mmɔ nyɔŋ ke obio.

⁴¹ Eyen ɔwɔŋ oro ɔnyɔŋ, ndien David oto ke Ezel ɔwɔrɔ ke edem usuk-usuk, onyuŋ ɔduɔ ke isɔŋ okubi iso esie, onyuŋ ɔnuhɔ utim ikata: ndien kiet otim kiet inua, kiet onyuŋ etiene kiet atua eyet, tutu David akan.

⁴² Ndien Jonathan ɔdɔhɔ David, ete, Ka ke ifure, koro nnyin owo mbiba ike ŋwɔŋɔde, itomo enyiŋ Jehovah, ite Jehovah osuk odu ke ufɔt mi ye afo, ye ke ufɔt ubon fo ye ubon mi ke nsinsi. Ndien enye (David) adaha: Jonathan onyuŋ ɔnyɔŋ ke obio ŋko.