1 SAMUEL 2 - Edisana ñwed Abasi Ibom

Ikwɔ ye Akam Hannah

¹ NDIEN Hannah ɔbɔŋ akam, ete, Esit mi ke adara Jehovah; nduk mi okoŋ ke Jehovah; inua mi atara akan mme asua mi; koro edinyaŋa fo adatde mi esit.

² Baba kiet isanake nte Jehovah: koro efen miduhe ke mibɔhɔke afo: baba itiat ibietke Abasi nnyin.

³ Mbufo ekukɔbɔ nditiŋ iseri-iseri; ekuyak isa-isa ikɔ ɔwɔrɔ mbufo ke inua: koro Jehovah edi Abasi ifiɔk, enye onyuŋ odomo ido

⁴ Mme utiga mkpɔsɔŋ owo emebuŋɔ, ndien mmɔ eke eketuakde ukot eduɔŋɔ, eda nsɔŋidem ebɔbɔ ke idem.

⁵ Mmɔ eke ekeyuhɔde emekabare enam utom udia: mmɔ eke eketiede biɔŋ enyuŋ etre: tutu ada aman itiaba; ndien ŋwan eke enyenede ediwak nditɔ onyuŋ akabare mmeme.

⁶ Jehovah owot, onyuŋ onim ke uwem: enye anam ɔsuhɔre ke udi, onyuŋ anam eset.

⁷ Jehovah anam owo ebuene, onyuŋ anam enyene ŋkpɔ: enye ɔduɔk ke isɔŋ, onyuŋ emen onim ke enyɔŋ.

⁸ Anam ubuene adaha ke ntɔŋ, onyuŋ emen mme anana ŋkpɔ ke ifum odori, ete inam mmɔ etie ye mbɔŋ, enye onyuŋ ɔnɔ mmɔ ebekpo ubɔŋ enyene: koro mme obubɔk ererimbot enyenede Jehovah, ndien enye amada ekondo odori mmɔ ke esit.

⁹ Enye eyekpeme ukot mbon ima esie, mme idiɔk owo eyenyuŋ edobo ke ekim: koro midige ke odudu ke owo ɔsɔŋ idem.

¹⁰ Jehovah eyenuak mbon utɔk esie; enye etie ke enyɔŋ ada obuma esie ɔtɔ mmɔ: Jehovah eyekpe ikpe utit ererimbot; eyenyuŋ ɔnɔ edidem esie nsɔŋidem, onyuŋ emen nduk Messiah esie onim ke enyɔŋ.

¹¹ Ekem Elkanah ɔnyɔŋ ke Ramah ke ufɔk esie. Ndien eyen oro anam ŋkpɔ Jehovah ke iso Eli oku.

¹² Ndien nditɔ Eli edi oburobut owo; mmɔ ifiɔkke Jehovah.

¹³ Ndien ido emi mme oku enamde ye mbio-obio etie ntem; adaŋaemi owo ekededi awade uwa, owo oku edi ke ini mmɔ etemde unam, ye fork iso ita ke ubɔk;

¹⁴ Ndien esin enye ke pan, mme caldron, mme kettle, mme eso: ndien kpukpru se fork osiode oro, ke oku ada ke idem esie. Ntem ke mmɔ enam kpukpru nditɔ Israel eke ekade do ke Shiloh.

¹⁵ Ndien ŋko ke mika-ifɔpke kaŋa ikpɔŋ, owo oku akam edi edidɔhɔ ye andiwa, ete, Nɔ unam eke efɔpde enɔ oku: koro enye midibɔhɔ fi editem unam, ke mibɔhɔke ndisi.

¹⁶ Ndien edieke owo oro ɔdɔhɔde enye, ete, Yak ekutre ndifɔp ikpɔŋ idahemi, ndien afo ada adaŋa nte esit fo oyomde; ndien enye ɔbɔrɔ, ete, Ih ih; kam nɔ ke emi: ndien munɔŋɔ, nyeda ke ŋkanubɔk.

¹⁷ Ntre ke idiɔk ido mkparawa oro ekpon ekan ke iso Jehovah: koro mmɔ esinde mbon oro ese uwa Jehovah ke ndek.

¹⁸ Ntre ke Samuel anam ŋkpɔ ke iso Jehovah, nte eyenɔwɔŋ, ɔbɔbɔ ephod linen.

¹⁹ Ndien eka esie anam ekpri ɔfɔŋ-idem ɔnɔ enye, onyuŋ ada ɔdɔk ɔsɔk enye kpukpru isua, ke ini enye asaŋade ye ebe esie ɔdɔk ndiwa uwa isua.

²⁰ Ndien Eli ɔdiɔŋ Elkanah ye ŋwan esie, onyuŋ ɔdɔhɔ, ete, Yak Jehovah anam ŋwan emi aman nditɔ ɔnɔ fi, ke ibuot ebuɔt emi afo ɔkɔbuɔtde Jehovah. Ndien mmɔ esaŋa eka ke ebiet esie.

²¹ Koro Jehovah esede Hannah; ndien enye oyomo, onyuŋ aman nditɔ-iren ita ye nditɔ-iban iba. Ndien Samuel eyen oro ɔkɔri ke iso Jehovah.

²² Ndien Eli ɔsɔŋ eti-eti, enye onyuŋ okop kpukpru se nditɔ esie enamde ofuri Israel, ye nte mmɔ ekotde iban oro ekam ebonode ke enyin-usuŋ efe esop.

²³ Ndien enye ɔdɔhɔ mmɔ ete, Nsinam mbufo enamde oruk ŋkpɔ emi, kpa mme idiɔk ido mbufo emi ami ŋkopde ofuri mbio emi etiŋde?

²⁴ Nditɔ mi, mbufo ekunam: koro midige eti etop ke ami ŋkop; mbufo esin ikɔt Jehovah edue.

²⁵ Edieke owo eduede ye owo, Abasi eyekpe ikpe esie; edi edieke owo eduede ye Jehovah, anie edikpe ubɔk inɔ enye? Edi mmɔ ikopke uyo ete mmɔ, koro Jehovah amade ndiwot mmɔ.

²⁶ Ndien eyen oro Samuel ɔdiɔŋ ɔkɔri; Jehovah ye owo enyuŋ ema enye.

²⁷ Ekem owo Abasi kiet oto edi ke ɔtɔ Eli edidɔhɔ enye, ete, Ntem ke Jehovah ɔdɔhɔ ete, Nte ŋketimke nyarare idem mi nnɔ ufɔk usɔ, kadaŋoro mmɔ edude ke Egypt, ke ufɔk Pharaoh?

²⁸ Ŋkonyuŋ mmek enye ŋko ke otu kpukpru mme esien Israel, nnim ke oku mi, man enye ɔfɔp uwa ke itie uwa mi, onyuŋ ɔfɔp incense, onyuŋ esine ephod ke iso mi. Ŋkonyuŋ nda kpukpru mme uwa ikaŋ nditɔ Israel nnɔ ufɔk usɔ.

²⁹ Nsinam mbufo edigide mme uwa mi ke ukot, ye inuak-udia mi, emi ŋkowukde ke ebiet iduŋ mi? Afo omonyuŋ okpono nditɔ fo akan mi ke erinam idem mbufo ekpon ke akpan kpukpru mme uwa Israel ikɔt mi.

³⁰ Mmɔdo Jehovah Abasi Israel ɔdɔhɔde ete, Kakpan ke ŋkɔdɔhɔ, nte ke ufɔk fo,ye ufɔk usɔ eyesaŋa ke iso mi ke nsinsi: edi ke emi Jehovah ɔdɔhɔ ete, Nsa mi O! koro nyekpono mmɔ eke ekponode mi, edi nyesin mme andisuene mi ke ndek.

³¹ Sese, usen ke edi eke ami ndibuŋde fi ubɔk, ye ubɔk ufɔk usɔ, man baba akani owo kiet okudu ke ufɔk fo.

³² Ndien afo eyekut ukut ebiet iduŋ mi, ke ofuri ini eke edifɔnde ye Israel: baba akani owo kiet idinyuŋ iduhe ke ufɔk fo ke nsinsi.

³³ Ndien ndisibeke owo fo mfep ke itie uwa mi, man enyin okpokim fi, esit okponyuŋ ayat fi: edi ofuri ŋkɔri ufɔk fo eyekpaŋa ke ini mmɔ edide iren-owo.

³⁴ Ndien emi edi idiɔŋɔ fo, emi editibede ye nditɔ-iren fo mbiba, Hophni ye Phinehas; ke usen kiet ke mmɔ mbiba edikpa.

³⁵ Ndien nyenam oku akpanikɔ adaha da ɔnɔ mi, enye eyenam kpa nte odude ke esit mi ye ke ekikere mi; nyenyuŋ mbɔp ɔkpɔsɔŋ ufɔk nnɔ enye; ndien enye eyesaŋa ke iso Messiah mi ke nsinsi.

³⁶ Ndien ama ekem, kpukpru owo eke esukde ke ufɔk fo, eyedi edinuhɔ enɔ enye, ebeŋe ubak silver ye obukpa uyo, eyenyuŋ edɔhɔ ete, Mbɔk, sin mi ke itie oku kiet, man nta ŋkeŋe uyo.