1 SAMUEL 18 - Edisana ñwed Abasi Ibom

Jonathan Anam Ediomi ye David

¹ EDIKEM adaŋemi enye ama ɔkɔdɔhɔ ye Saul ama, ukpɔŋ Jonathan eyire ye ukpɔŋ David, Jonathan onyuŋ ama enye nte ukpɔŋ esiemo.

² Ndien Saul ada enye ke usen oro, inyuŋ iyakke enye ɔnyɔŋ ke ufɔk ete esie.

³ Jonathan onyuŋ odiomi ediomi ye David, koro amade enye nte ukpɔŋ esiemɔ.

⁴ Ndien Jonathan osio ekura emi enye esinede, ada ɔnɔ David, ye ɔfɔŋ-idem esie, ye ofut esie ŋko, ye utiga esie, ye ubɔp-isin esie.

⁵ Ndien David ɔwɔrɔ aka kpukpru utom eke Saul ɔdɔŋde enye, ɔdiɔŋ anam ŋkpɔ; ndien Saul onim enye ke etubom mbom-ekɔŋ: ndien kpukpru owo ye ikɔt Saul ema enye.

⁶ Edikem nte mmɔ esaŋade edi, adaŋemi David ama okoto ndiwot Philistine oro, iban eda idara, ye ekɔmɔ, ye ŋkpɔ mbre, eto ke kpukpru obio Israel, ke ekwɔ, enyuŋ enek, edi edibiɔŋɔre edidem Saul.

⁷ Ndien nte iban enekde, mmɔ ebɔrɔ kiet eken, ete, Saul ama owot mme tɔsin esie, David ama onyuŋ owot mme tɔsin esie duop.

⁸ Ndien Saul ayat esit eti-eti, ikɔ emi inyuŋ inemke enye; ndien enye ɔdɔhɔ, ete, Mmɔ emenɔ David mme tɔsin duop, edi ami mmɔ enɔ mme tɔsin: ndien ubɔŋ ikpɔŋ-ikpɔŋ osuk enye ndida kaŋa.

⁹ Saul onyuŋ ese David idiɔk enyin, toto ke usen oro, onyuŋ aka iso.

¹⁰ Edikem ke usen efen, idiɔk spirit Abasi oduk Saul ke idem, ndien enye adama ke ufɔk: ndien David ebre harp ke ubɔk esie, nte enye akam esinamde: eduat onyuŋ odu Saul ke ubɔk.

¹¹ Ndien Saul otop eduat, ete, Nyekim David ndian ke ibibene. Ndien David efep ɔbɔhɔ enye ke iso utim ikaba.

¹² Ndien ndik David anam Saul, koro Jehovah odude ye enye, ama onyuŋ ɔkpɔŋ Saul.

¹³ Ekem Saul adianare enye ke idem esie efep onyuŋ onim enye ke etubom tɔsin ɔnɔ idem esie: ndien enye ɔwɔrɔ onyuŋ oduk ke iso mbio-obio.

¹⁴ David onyuŋ okut unen ke kpukpru usuŋ esie; Jehovah onyuŋ odu ye enye.

¹⁵ Ndien Saul okut nte enye okutde unen eti-eti, onyuŋ efehe ndik abaŋa enye.

¹⁶ Edi ofuri Israel ye Judah ema David, koro enye ɔwɔrɔde onyuŋ odukde ke iso mmɔ.

¹⁷ Ndien Saul ɔdɔhɔ David, ete, Se adiaha mi Merab, nyeda enye nnɔ fi ɔdɔ; edi afo di owo uko nɔ mi, nyuŋ ŋwana ekɔŋ Jehovah. Koro Saul ɔdɔhɔde ete, Ubɔk mi okutuk enye, edi yak ubɔk mme Philistine etuk enye.

¹⁸ Ndien David ɔdɔhɔ Saul, ete, Ami ndi anie? uwem mi onyuŋ edi nso, ye oruk ete mi ke Israel, eke ami ŋkpedide ukot edidem?

¹⁹ Edikem ke ini eke mmɔ ekpedade Merab adiaha Saul enɔ David, eda enye enɔ Adriel Meholathite ɔdɔ.

²⁰ Ndien Michal uduŋwan Saul ama David: mmɔ enyuŋ etiŋ enɔ Saul, ndien ŋkpɔ oro enem enye esit.

²¹ Ndien Saul ɔdɔhɔ ete, Nyeda enye nnɔ enye, man etie nte afia ye enye, man ubɔk mme Philistine enyuŋ etuk enye. Ndien Saul ɔdɔhɔ ye David ke utɔŋɔ ntak, ete, Afo eyedi ukot mi mfin emi.

²² Saul onyuŋ eteme ikɔt esie, ete, Mbufo edɔhɔ ye David ke ndibe, ete, Sese, edidem ke ama fi eti-eti, kpukpru ikɔt esie enyuŋ ema fi: ɔfɔn ndien nte afo ekpedide ukot edidem. Ntre ke ikɔt Saul etiŋ ikɔ oro ke utɔŋ David.

²³ Ndien David ɔbɔrɔ ete, Nte mbufo ebat itie ukot edidem ke ekpri ŋkpɔ? ndien ami ndi eyen ubuene, mmɔ enyuŋ ese mi ke mbio.

²⁴ Ekem ikɔt Saul esian enye, ete, David ɔkɔdɔhɔ ntem ye ntem.

²⁵ Ndien Saul ɔdɔhɔ ete, Ntem ke mbufo edidɔhɔ David, ete, Edidem iyomke ŋkpɔ ndɔ; ke mibɔhɔke edut mme Philistine ikie, man enye osio usiene ye mme asua edidem. Edi Saul ekere ndiwot David ke ubɔk mme Philistine.

²⁶ Ndien ikɔt esie etiŋ ikɔ emi enɔ David, ndien enem David ndidi ukot edidem; mme usen ika-inyuŋ ikemke.

²⁷ Ndien David adaha ke enyɔŋ asaŋa ye ikɔt esie aka okowot mme Philistine owo ikie iba; David onyuŋ ada edut mmɔ kpukpru edinɔ edidem, man enye edi ukot edidem. Ndien Saul ɔnɔ enye Michal uduŋwan esie ɔdɔ.

²⁸ Ekem Saul okut onyuŋ ɔfiɔk ete ke Jehovah ododu ye David, ete ke Michal uduŋwan Saul onyuŋ ama enye.

²⁹ Ndien ndik David ɔdɔdiɔŋ anam Saul aka iso; Saul onyuŋ ɔdɔdiɔŋ asua David kpukpru usen.

³⁰ Ekem mbɔŋ mme Philistine ewɔŋɔ: ndien edikem adaŋa ini nte mmɔ ewɔŋɔde, David okut unen akan kpukpru ikɔt Saul; mmɔ enyuŋ ekpono enyiŋ esie eti-eti.