1 SAMUEL 16 - Edisana ñwed Abasi Ibom

Samuel Eyet David Aran Enim ete Eti Edidem ke Israel

¹ EKEM Jehovah ɔdɔhɔ Samuel, ete, Adaŋa didie ke afo editua Saul, sia mma nsio enye mfep ke idaha edidem Israel? Sin aran ke nduk fo yɔhɔ; ndien ka, nyedɔŋ fi utom ke ebiet Jesse eyen Bethlehem: koro mmokut edidem mi ke otu nditɔ-iren esie.

² Ndien Samuel ɔdɔhɔ ete, Ndinam didie ŋka? Saul ama okop, enye eyewot mi. Ndien Jehovah ɔdɔhɔ ete, Da abak uman enaŋ kama ke ubɔk fo, nyuŋ dɔhɔ ete, Ndi uwa ndiwa nnɔ Jehovah.

³ Nyuŋ kot Jesse edi ke uwa, ndien nyesian fi se afo edinamde: ndien da aran yet owo eke ndidɔhɔde fi, nim nɔ mi.

⁴ Ndien Samuel anam se Jehovah ɔkɔhɔde, onyuŋ edi ke Bethlehem. Ndien mbiowo enyek idem ke ini enye ɔbiɔŋɔrede, ndien mmɔ ebup ete, Nte afo edi ke ufan?

⁵ Ndien enye ɔbɔrɔ ete, Ke ufan: ndi uwa emem ndiwa nnɔ Jehovah: mbufo enam idem-mbufo esana, enyuŋ etiene mi edi uwa. Enye onyuŋ anam Jesse ye nditɔ-iren esie esana, onyuŋ okot mmɔ edi uwa.

⁶ Edikem adaŋemi mmɔ edide, enye ese Eliab, ndien ɔdɔhɔ ete, Ŋkɔm enye emi Jehovah ediyetde aran odu enye ke iso.

⁷ Edi Jehovah ɔdɔhɔ Samuel, ete, Kuse enye iso, kunyuŋ use nte enye okoŋde idaha; koro mmesin enye: koro (mmensehe) nte owo esede; koro owo esede enyin, edi Jehovah ese esit.

⁸ Ndien Jesse okot Abinadab, onyuŋ anam enye ebe ke iso Samuel. Ndien enye ɔdɔhɔ ete, Jehovah inyuŋ imekke emi ŋko.

⁹ Ndien Jesse anam Shammah asaŋa ebe. Ndien enye onyuŋ ɔdɔhɔ ete, Jehovah inyuŋ imekke emi ŋko.

¹⁰ Ntre ke Jesse akanam nditɔ-iren esie itiaba esaŋa ke iso Samuel ebe. Ndien Samuel ɔdɔhɔ Jesse, ete, Jehovah imekke mmɔ emi.

¹¹ Ndien Samuel obup Jesse, ete, Nte mkparawa ekure? Ndien enye ɔbɔrɔ ete, Eyenɔwɔŋ osuk kaŋa, ndien sese, enye ke ekpeme ŋkpri ufene. Ndien Samuel ɔdɔhɔ Jesse ete. Dɔŋ ekeda enye edi: koro nnyin midisuhɔkede itie tutu enye edi ken.

¹² Ndien enye ɔdɔŋ ekeda enye edi. Enye onyuŋ oyibe, onyuŋ eye iso, onyuŋ ɔfɔn ndise. Ndien Jehovah ɔdɔhɔ enye, Daha ke enyɔŋ, yet enye aran, koro edide emi edi enye.

¹³ Ntre Samuel ada nduk aran eyet enye idem ke otu nditɔ-ete esie: ndien spirit Jehovah oduk David ke idem toto ke usen oro, aka iso. Ndien Samuel adaha ɔnyɔŋ Ramah.

¹⁴ Ndien spirit Jehovah ɔkpɔŋ Saul, idiɔk spirit emi otode Jehovah onyuŋ ɔtuhɔ enye.

¹⁵ Ndien ikɔt Saul edɔhɔ enye, ete, Mbɔk, sese, idiɔk spirit Abasi ke ɔtɔtuhɔ fi.

¹⁶ Mbɔk, ete nnyin, dɔhɔ ikɔt fo emi edude ke iso fo, ete eyom owo eke ɔfiɔkde ndibre harp: ndien ama ekem adaŋemi idiɔk spirit Abasi anamde fi, yak enye ada ubɔk esie ebre, ndien eyefɔn fi.

¹⁷ Ndien Saul ɔdɔhɔ ikɔt esie, ete, Mbufo eyom ndien owo eke otimde ɔfiɔk ndibre, enɔ mi,

¹⁸ enyuŋ eda enye esɔk mi. Ndien akaparawa esie kiet ɔbɔrɔ ete, Sese, mma ŋkut eyen Jesse Bethlehemite kiet, emi ɔfiɔkde ndibre, enye onyuŋ edi owo uko, ye owo ekɔŋ, onyuŋ edi asian ke ŋkpɔ, ye owo uyai, Jehovah onyuŋ odu ye enye.

¹⁹ Ndien Saul ɔdɔŋ mme isuŋ-utom ke ebiet Jesse, ete, Nɔ David eyen fo, emi odude ye ŋkpri ufene, esɔk mi.

²⁰ Ndien Jesse ada ass, ye uyo, ye wine ke ikpa, ye eyen ebot kiet, esin David eyen esie ke ubɔk, ete ada ɔsɔk Saul.

²¹ Ndien David aka ke ɔtɔ Saul akada enye ke iso: ndien enye (Saul) ama enye eti-eti: enye onyuŋ akabare edi andibiom ŋkpɔ-ekɔŋ esie.

²² Ndien ɔdɔŋ ekedɔhɔ Jesse, ete, Mbɔk, yak David ada ke iso mi, koro mmama enye.

²³ Ndien edikem adaŋemi spirit Abasi oro anamde Saul, David emen harp ke ubɔk esie ebre: ntre ke efere Saul, onyuŋ ɔfɔn ye enye, idiɔk spirit oro onyuŋ ɔkpɔŋ enye.