1 SAMUEL 13 - Edisana ñwed Abasi Ibom

Saul Aka Ekɔŋ ye Mbon Philistine ye Akpa Ndudue Emi Enye Akanamde

¹ SAUL ada ubɔŋ isua kiet; ndien adaŋemi enye akadade ubɔŋ Israel isua iba,

² Saul emek tɔsin owo ita ke Israel; ndien tɔsin iba edu ye Saul ke Michmash ye ke obot Bethel, tɔsin kiet eken enyuŋ edu ye Jonathan ke Gibeah Benjamin: enye onyuŋ ayak kpukpru owo eŋwen enyɔŋɔ ke mme tent mmɔ.

³ Ekem Jonathan asuan mbonekɔŋ mme Philistine emi edude ke Geba, ndien mme Philistine ekop. Ndien Saul ofuri ukorowo ke ofuri isɔŋ, ete, Yak mme Hebrew ekop.

⁴ Ndien ofuri Israel ekop, ete ke Saul ama asuan mbon-ekɔŋ mme Philistine, ete ke mme Philistine enyuŋ esua Israel. Ndien ewuk kpukpru owo, ete etiene Saul ke Gilgal.

⁵ Ekem mme Philistine esop idem ɔtɔ kiet, ndiŋwana ekɔŋ ye Israel, tɔsin chariot edip ye duop, ye tɔsin mbio horse itiokiet, ye mbon ekɔŋ nte ntan emi odude ke mben inyaŋ ke uwak: ndien mmɔ edɔk ekenam nna-ekɔŋ ke Michmash, ke edem usiaha-utin Beth-aven.

⁶ Ke adaŋemi nditɔ Israel ekutde mbaba oro ababade mmɔ (koro efikde mmɔ) mmɔ edibe ke aba itiat, ye ke ikɔt, ye ke ikpɔ itiat, ye ke ŋkokoŋo ebiet, ye ke obube.

⁷ Mme Hebrew enyuŋ ebe Jordan eka ke isɔŋ Gad ye Gilead. Ama edi Saul, enye osuk etie ke Gilgal, ndien kpukpru owo etiene enye ke nnyekidem.

⁸ Ndien enye ebigi ke usen itiaba, tutu osim ke ini emi Samuel okodoride: edi Samuel idige ke Gilgal; ndien kpukpru owo esuana ekpɔŋ enye.

⁹ Ndien Saul ɔdɔhɔ ete, Mbufo eda edifɔp uwa, ye uwa emem esɔk mi. Ndien enye ɔfɔp edifɔp uwa.

¹⁰ Edikem adaŋemi enye osuk ɔfɔfɔp edifɔp uwa ntem ama, sese, Samuel ɔbiɔŋɔre; Saul onyuŋ ɔwɔrɔ ndisobo ye enye, man ɔkɔm enye.

¹¹ Ndien Samuel obup ete, Nso ke afo akanam? Ndien Saul ɔbɔrɔ ete, adaŋemi ŋkutde nte kpukpru owo esuanade ekpɔŋ mi, afo mukonyuŋ udige ke ini oro ekedoride, ye nte mme Philistine ebonode ke Michmash;

¹² ndien ndɔhɔ nte, Ke emi mme Philistine eyesuhɔre ebine mi ke Gilgal, ndien ŋkpehe kaŋa Jehovah ubɔk: ndien nsɔŋ esit mfɔp edifɔp uwa.

¹³ Ndien Samuel ɔdɔhɔ Saul, ete, Afo amanam ndisime ŋkpɔ: afo ukonimke ewuhɔ Jehovah Abasi fo, emi enye okowukde fi: koro ntem ke Jehovah okponim ubɔŋ fo ke Israel ke nsinsi.

¹⁴ Edi ke emi ubɔŋ fo idibigike: Jehovah ama oyom owo ke idem esie eke ekemde esit ye enye, Jehovah ama onyuŋ eteme enye, ete edi etubom ikɔt imɔ, koro afo mukonimke se Jehovah eketemde fi.

¹⁵ Ekem Samuel adaha ke Gilgal ɔdɔk ke Gibeah Benjamin. Ndien Saul abat mmɔ eke edude ye enye, osim owo ikie itiokiet.

¹⁶ Ndien Saul, ye Jonathan eyen esie, ye mmɔ eke edude ye mmɔ, etie ke Gibeah Benjamin: edi mme Philistine enam nna ke Michmash.

¹⁷ Ndien udim mbon-uŋwo ita ewɔŋɔ ke nna-ekɔŋ mme Philistine: udim kiet ekabare eduk usuŋ Ophrah, eka ke isɔŋ Shual:

¹⁸ udim kiet enyuŋ ekabare eduk ke usuŋ Beth-horon: udim eken enyuŋ ekabare eka ke usuŋ adaŋa eke esede itihere Zeboim ke edem wilderness.

¹⁹ Ndien baba odom-utim kiet iduhe ke ofuri isɔŋ Israel: koro mme Philistine edɔhɔde ete, Mbak mme Hebrew enam ofut ye eduat:

²⁰ ndien ofuri Israel esuhɔre ke ɔtɔ mme Philistine ndiban ŋkpɔ ufuŋ-isɔŋ mmɔ, ye ekudi mmɔ, ye udɔk mmɔ,

²¹ adaŋemi ŋkpɔ ufuŋ-isɔŋ, ye fork iso ita, ye ekudi etipde iso, ndinyuŋ ndiɔŋ eto ukim-ufene.

²² Ndien edikem ke usen ekɔŋ, ikwe baba ofut, inyuŋ ikwe eduat ke ubɔk baba owo kiet eke odude ye Saul ye Jonathan: edi mmɔ ekut ke ubɔk Saul ye Jonathan eyen esie.

²³ Ekem mbon-ekɔŋ mme Philistine ewɔŋɔ eka ke ebiet-ube ebedeŋ Michmash.