1 SAMUEL 1 - Edisana ñwed Abasi Ibom

Elkanah Ada Ekpuk Ufɔk Esie Aka Shiloh ye Mbuk Emana Samuel

¹ OWO kiet okodu ke Ramathaim-zophim, ke edem obot Ephraim, ndien enyiŋ esie ekere Elkanah, eyen Jeroham, eyen Elihu, eyen Tohu, eyen Zuph owo Ephraim.

² Ndien enye enyene iban iba; kiet ekere Hannah, kiet eken ekere Peninnah: ndien Peninnah enyene nditɔ, edi Hannah inyeneke nditɔ.

³ Ndien owo emi oto ke obio mmɔ kpukpru isua ɔdɔk ndituak ibuot, nnyuŋ ŋwa uwa nnɔ Jehovah mme udim ke Shiloh. Ndien nditɔ-iren Eli mbiba, Hophni ye Phinehas, mme oku Jehovah edu do.

⁴ Edikem ke usen eke Elkanah awade uwa, enye ada udeme ɔnɔ Peninnah ŋwan esie, ye kpukpru nditɔ esie iren ye iban:

⁵ enye onyuŋ ɔnɔ Hannah udeme owo iba; koro enye amade Hannah; edi Jehovah ama esiri enye idibi.

⁶ Ndien asua esie odutuhɔ enye ŋko, man esin enye ayat esit, koro Jehovah ekesiride enye idibi.

⁷ Ndien ntre ke enye (Elkanah) osuk anam kpukpru isua, adaŋa ini nte enye ɔdɔkde ke ufɔk Jehovah; ntre ke enye (Peninnah) ayayat enye; oro esin enye atua eyet, onyuŋ etre ndidia udia.

⁸ Ndien Elkanah ebe esie ɔdɔhɔ enye, ete, Hannah, nsinam afo atuade eyet? Nsinam afo onyuŋ etrede ndidia ŋkpɔ? Nsinam esit ɔdiɔkde fi ntre ŋko-ŋko? Ŋkɔm ami mmɔfɔn ye afo ŋkan nditɔ duop?

⁹ Ekem adaŋemi Hannah ama akadia ŋkpɔ onyuŋ ɔŋwɔŋ ama ke Shiloh, enye adaha ke enyɔŋ. Ndien Eli oku etie ke ebekpo ke ɔtɔ obubɔk enyin-usuŋ temple Jehovah.

¹⁰ Ndien esit ɔdiɔk enye, (Hannah), enye onyuŋ ekpe Jehovah ubɔk, onyuŋ atua ɔkpɔsɔŋ eyet.

¹¹ Ndien enye akaŋa akaŋa onyuŋ ɔdɔhɔ ete, Jehovah mme udim, edieke afo edisede ukut eyen fo aŋwan, onyuŋ etide mi, munyuŋ ufreke eyen fo aŋwan, edi ama ɔnɔ eyen fo aŋwan eyen-eren, nyeda enye nnɔ Jehovah kpukpru usen uwem esie, ndien akaraŋ iditukke enye ibuot.

¹² Edikem ke ini enye ɔbɔŋde akam ke iso Jehovah ebigi, Eli ese enye inua.

¹³ Ndien Hannah ɔdɔhɔ ke esit esie, mkpɔk-inua esie enyuŋ enyeŋe, edi owo ikopke uyo esie; mmɔdo Eli esede ete ke enye akpa mmin.

¹⁴ Ndien Eli ɔdɔhɔ enye, ete, Adaŋa didie ke afo edikpa mmin? Sio idem fo ke wine fo fep.

¹⁵ Ndien Hannah ɔbɔrɔ ete, Ih ih ɔbɔŋ mi; ami ndi ŋwan emi esit ɔdiɔkde mi: ŋŋwɔŋke wine, nnyuŋ ŋŋwɔŋke mmin, edi mmaŋwaŋa esit mi ke iso Jehovah.

¹⁶ Kubat eyen fo aŋwan ke oburobut aŋwan: koro ke uwak ekikere mi ye mfuhɔ mi ke ŋketiŋ tutu osim emi.

¹⁷ Ndien Eli ɔbɔrɔ ete, Nyɔŋ ke ifure: ndien Abasi Israel osuk ɔnɔ fi ebeŋe emi afo ekebeŋede enye.

¹⁸ Ndien enye (ŋwan) ɔdɔhɔ ete, Nen iso ye eyen fo aŋwan. Ntre ke ŋwan oro ɔnyɔŋ esiemɔ, onyuŋ adia ŋkpɔ, ndien iso ifuhɔke aba enye.

¹⁹ Ekem eyo esiere, mmɔ ebak edemere, etuak ibuot ke iso Jehovah, ndien efiak eka ke ufɔk mmɔ ke Ramah. Ndien Elkanah ɔfiɔk Hannah ŋwan esie; Jehovah onyuŋ eti enye;

²⁰ Edikem ke ukabare isua Hannah oyomo, onyuŋ aman eyen-eren, onyuŋ osio enye enyiŋ Samuel, ete, Koro ŋkebeŋede enye ke ubɔk Jehovah.

²¹ Ndien owo oro Elkanah ɔdɔk ye ofuri ufɔk esie, ndiwa uwa isua ye akaŋa esie nnɔ Jehovah.

²² Ndien Hannah idɔkke: edi enye ɔdɔhɔ ebe esie, ete, ŋkaha tutu eyen adaha ke eba, ndien nyeda enye ŋka, man ekut enye ke iso Jehovah, man enye onyuŋ adaŋ do ke nsinsi.

²³ Ndien Elkanah ebe esie ɔdɔhɔ enye, ete, Nam se afo amade; tie tutu anam enye adaha ke eba; edi yak Jehovah anam uyo esie ɔsɔŋɔ ada. Ndien ŋwan oro etie ɔnɔ eyen esie eba, tutu enam enye adaha ke eba.

²⁴ Ndien adaŋemi enye akanamde eyen adaha ke eba, enye ada enye ye enaŋ ita, ye eti ndom-uyo ke ephah kiet, ye wine ke ikpa, ɔdɔk, onyuŋ ada enye aka ke ufɔk Jehovah ke Shiloh; ndien eyen oro edi eyenɔwɔŋ.

²⁵ Ndien mmɔ ewot enaŋ, enyuŋ eda eyenɔwɔŋ esɔk Eli.

²⁶ Ndien eka ɔdɔhɔ ete, O ɔbɔŋ mi, ma uwem fo, ɔbɔŋ mi, ami ndi ŋwan oro akadade ekpere fi mi, ŋkpe Jehovah ubɔk.

²⁷ Ŋkekpe Jehovah ubɔk mbeŋe eyen emi, ndien Jehovah ɔmɔnɔ mi ebeŋe mi emi ŋkebeŋede enye:

²⁸ ndien ŋko ami nda enye mbuot Jehovah: adaŋa ini nte enye edidude uwem, enye edi ebuɔt Jehovah. Ndien enye ɔnuhɔ do ke iso Jehovah.