1 PETER 4 - Edisana ñwed Abasi Ibom

Enam se Uduak Abasi Edide Nte Mme Nti Asaŋa-Utom Esie, Ekukop But

¹ SIA Christ okokutde ukut ke obukidem, mbufo nde eda ekikere emi esine nte ŋkpɔ-ekɔŋ esɔŋɔ idem mbufo esit; koro enye emi okokutde ukut ke obukidem ama adianare ke idiɔk-ŋkpɔ ama;

² man mbufo ekuda aba ini eke ɔsuhɔde ɔnɔ mbufo ke obukidem esaŋa edu uwem ke mme idiɔk itɔŋ esit owo, edi esaŋa nte uduak Abasi edide.

³ Koro ini emi ama ebe ekem mbufo ndida nnam se idɔŋde mme Gentile itɔŋ, kpa ini emi mbufo esaŋade edu uwem ke use, ye idiɔk itɔŋ, ye eriyuhɔ mmin, ye otime-otime ido, ye eriŋwɔŋ mmin, ye obukpo erikpono ndem;

⁴ ndien idem akpa mmɔ oro, ke emi mbufo minyimeke aba ndisaŋa ye mmɔ nduk ke ɔkpɔsɔŋ otime uwem oro, mmɔ enyuŋ esuŋi mbufo.

⁵ Edi mmɔ eyenyene ndibɔrɔ mbaŋa ŋkpɔ emi nnɔ Enye emi etiede ebet ndikpe mme odu uwem ye mme akpa-mkpa.

⁶ Koro ekekwɔrɔ gospel enɔ kpa mme akpa-mkpa kabaŋa emi, man edikpe ikpe ye mmɔ nte mme owo eke ekodude ke obukidem edi ekpedu uwem ke spirit, nte Abasi ɔnɔde item.

⁷ Edi utit kpukpru ŋkpɔ ke ekpere. Mmɔdo mbufo enyene eti ibuot, enyuŋ efara ke idem, man ekeme ndibɔŋ akam.

⁸ Akan kpukpru ŋkpɔ, enyene ufiop-ufiop ima ke otu idem mbufo; koro ima ofukde ekese idiɔk-ŋkpɔ.

⁹ Eda kiet eken eduk ke ufɔk, ekusuk uyo.

¹⁰ Adaŋa nte mbufo kiet kiet ema ekebɔ enɔ ke ubɔk Abasi, eda enam ŋkpɔ enɔ kiet eken nte nti mme akama-ukpɔhɔre nsio-nsio ufɔn Abasi.

¹¹ Edieke owo etiŋde ikɔ, yak enye etiŋ nte etiŋ ikɔ Abasi: ŋko, edieke owo anamde ŋkpɔ ɔnɔ ekemmɔ owo yak enye anam nte ada odudu eke Abasi ɔnɔde anam; man ke kpukpru ŋkpɔ Abasi edinyene ubɔŋ oto ke Jesus Christ. Ubɔŋ ye erikara enyene Enye ke nsinsi-nsinsi. Amen.

¹² Ndima, ekuyik ikaŋ-ikaŋ idomo eke odude ke otu mbufo, eke etienede mbufo man edomo mbufo efiɔk, nte edide utibe ŋkpɔ ɔwɔrɔ mbufo.

¹³ Edi adaŋa nte mbufo ebuanade ke ndutuhɔ Christ, ekam edara; man mbufo ekpenyuŋ edat esit eti-eti ke adaŋemi ediyararede ubɔŋ Esie.

¹⁴ Edieke esuenede mbufo kabaŋa enyiŋ Christ, ɔfɔfɔn ɔnɔ mbufo; koro Spirit ubɔŋ ye Spirit Abasi odoro mbufo ke idem.

¹⁵ Edi owo mbufo baba kiet okubɔ ufen nte owot-owo, mme nte inɔ mme nte oburobut owo, mme nte andinɔhɔ ke mbubehe owo eŋwen;

¹⁶ edi edieke owo okutde ndutuhɔ nte owo Christ, yak enye okukop but, edi akam ɔnɔ Abasi ubɔŋ ye enyiŋ emi.

¹⁷ Koro ekem ini nte ikpe editɔŋɔde ke ufɔk Abasi; ndien edieke ikpe ɔtɔŋɔde ye nnyin, nso ididi utit mmɔ emi misukke ibuot inɔ gospel Abasi?

¹⁸ Ndien edieke ɔsɔŋde eti-eti ndinen owo ndibɔhɔ, ŋkpɔ editie didie ye mmɔ emi mibakke Abasi ye moburobut owo?

¹⁹ Ntem ke ɔfɔn mmɔ emi ekutde ndutuhɔ nte uduak Abasi edide eyak ukpɔŋ mmɔ ke erinam eti ŋkpɔ esin ke ubɔk Andibot, emi edide Abasi akpanikɔ.