1 PETER 1 - Edisana ñwed Abasi Ibom

Ata Idorenyin Uwem ye Edinyaŋa Ɔnɔ Ikɔt Abasi

¹ PETER, emi edide apostle Jesus Christ, ewet ŋwed emi ɔnɔ esɔk mmɔ emi esuanade eduŋɔ ke Pontus ye Galatia ye Cappadocia ye Asia ye Bithynia;

² emi Abasi Ete ekemekde mmɔ, nte asaŋade ekekem ye mbem-iso ifiɔk Esie, emi Spirit onyuŋ osuk ananam mmɔ esana, man mmɔ ekpesuk ibuot enɔ Jesus Christ, Enye okponyuŋ ada iyip Esie osime mmɔ ke idem. Mfɔn ye emem akpakam osim mbufo uwak-uwak.

³ Itoro enyene Abasi ye Ete Ɔbɔŋ nnyin Jesus Christ, emi, nte asaŋade ekekem ye akwa mbɔm Esie, okobonde nnyin obufa ada esin ke odu-uwem idori-enyin oto ke eriset Jesus Christ ke mkpa;

⁴ ete nnyin idida udeme eke mikemeke ndibiara, eke ŋkpɔ misabakere, eke minyuŋ ikemeke ndibe mfep, inyene.

⁵ Abasi okonyuŋ onim udeme oro ke heaven ɔnɔ mbufo, emi Enye adade odudu Esie ekpeme oto ke mbuɔtidem, ete, edisim erinyaŋa eke enimde ebet akpatre ini ndiwut idem.

⁶ Mbufo enyuŋ edadara ke ini oro eti-eti, okposuk edi nte akpanade nte nsio-nsio idomo enam mbufo edu ke mfuhɔ ke emi ke ekpri ini;

⁷ man mbuɔtidem mbufo emi ema edomo ewut, emi ɔsɔŋde urua akan mbiara gold eke edade ikaŋ edomo, ɔkpɔwɔrɔ edi ŋkpɔ itoro ye ubɔŋ ye ukpono ɔnɔ mbufo ke adaŋemi Jesus Christ ediyararede idem.

⁸ Akanam mbufo ikwe Enye, edi emama Enye. Okposuk edi nte mbufo mikwe Enye ke emi, mbufo ebuɔt idem ye Enye, enyuŋ esɔŋɔ edara ye idaresit eke ayaŋade owo nditiŋ onyuŋ ɔyɔhɔde ye ubɔŋ;

⁹ ke ebɔde se mbuɔtidem mbufo ɔsuŋɔde do, kpa erinyaŋa ukpɔŋ mbufo.

¹⁰ Edi erinyaŋa emi ke mme prophet ema etim eyom enyuŋ eduŋɔre, kpa mme prophet emi eketiŋde ebaŋa ufɔn eke edinɔde mbufo;

¹¹ mmɔ eduŋɔre eyom ndifiɔk ini mme oruk ini eke Spirit Christ emi odude mmɔ ke esit asiakde, ke ini Enye ebemde iso etiŋ abaŋa mme ndutuhɔ Christ, ye ubɔŋ eke editienede mmɔ ke edem.

¹² Ema enyuŋ eyarare ewut mmɔ ete, idige kabaŋa idem mmɔ, edi kabaŋa mbufo, ke mmɔ emen ikɔ oro etiŋ, kpa ikɔ oro ema etaŋa ke emi enɔ mbufo, ke inua mmɔ emi ekwɔrɔde gospel enɔ mbufo ke Edisana Spirit, emi ekɔdɔŋde oto ke heaven edi. Ɔdɔŋ mme angel ndinyuŋɔ ŋkpɔ emi mfiɔk.

¹³ Mmɔdo efak ɔfɔŋ esit mbufo, efara ke idem, enyuŋ edori enyin ɔyɔhɔ-ɔyɔhɔ ke ufɔn eke edidade esɔk mbufo ke eriyarare Jesus Christ.

¹⁴ Nte nditɔ nsuk-ibuot, ekukama aba idem ekekem ye mme idiɔk udɔŋ eke mbufo ekenyenede, ke adaŋemi enanade ifiɔk;

¹⁵ edi kpa nte Andikot mbufo edide Edisana, mbufo nde ekabare esana ke ofuri edu uwem mbufo;

¹⁶ koro ewet ntem ete, Mbufo edisana, koro Ami ndide edisana

¹⁷ Ndien edieke mbufo esemede ekot Enye nte Ete, emi miteŋeke owo enyin, edi ebierede ikɔ ɔnɔ owo nte erinam esie edide, edu uwem ke ndik ke ini ndaŋ mbufo mi;

¹⁸ sia efiɔkde ete, ikadaha mbiara ŋkpɔ, kpa silver ye gold, ifak mbufo isio ke ndisime edu uwem oro ekotode mme ete ebe osim mbufo;

¹⁹ edi ekada iyip eke ɔsɔŋde urua efak mbufo, nte iyip eyen-erɔŋ eke ananade ndo onyuŋ ananade ntɔi, kpa eke Christ:

²⁰ emi Abasi ekebemde iso onim ndien ediwuk adaha ererimbot emi; ema enyuŋ eyarare Enye ke ukperedem ini emi, man ɔfɔn ye mbufo.

²¹ Oto Enye ke mbufo ebuɔt idem ye Abasi, emi akanamde Enye eset ke mkpa, onyuŋ ɔnɔde Enye ubɔŋ, kpaŋ mbuɔtidem ye idori-enyin mbufo ekpodu ke Abasi.

²² Sia mbufo ema ekeda nsuk-ibuot enɔ akpanikɔ enam ukpɔŋ mbufo esana, ekeme ndinyene ata ima nditɔ-ete, esɔŋɔ ema kiet eken ke ofuri esit.

²³ Ema ebon mbufo obufa, idige ke ubon eke edikpade, edi ke ubon eke midikemeke ndikpa, oto ke ikɔ Abasi, emi odude uwem onyuŋ ebigide ke nsinsi.

²⁴ Koro, Ofuri obukidem etie nte mbiet, Ofuri ubɔŋ esie onyuŋ ebiet ediye ikɔŋ-ikɔt; Mbiet amasat, ediye ikɔŋ onyuŋ okibe;

²⁵ Edi ikɔ Abasi eyebigi ke nsinsi. Emi onyuŋ edi ikɔ gospel emi ekɔkwɔrɔde enɔ mbufo.