1 NDIDEM 8 - Edisana ñwed Abasi Ibom

Eyak Temple Enɔ Abasi Enyuŋ Emen Ekebe Ediomi Edisin do

¹ EKEM Solomon obon kpukpru mbiowo Israel, ye kpukpru mme etubom mme esien, kpa ikpɔ owo mme ete nditɔ Israel, ke ɔtɔ Solomon edidem ke Jerusalem, man eda ekebe ediomi Jehovah ke obio David, emi edide Zion, edɔk.

² Ndien kpukpru mbio Israel esop idem ke ɔtɔ edidem Solomon ke ɔfiɔŋ Ethanim ke ini usɔrɔ (enye edi ɔyɔhɔ ɔfiɔŋ itiaba).

³ Ndien adaŋoro kpukpru mbiowo Israel edide, mme oku emen ekebe.

⁴ Ndien mmɔ emen ekebe Jehovah, ye efe esop, ye kpukpru edisana ŋkpɔ oro edude ke efe, edɔk, mme oku ye mme Levite eda mmɔ edɔk.

⁵ Ndien edidem Solomon, ye ofuri esop Israel, emi esopde ye enye, edu ye enye ke iso ekebe, ke ewa ŋkpri ufene ye enaŋ emi uwak mmɔ miyakke owo asiak, minyuŋ iyakke owo abat.

⁶ Ndien mme oku emen ekebe ediomi Jehovah esin ke ebiet esie, ke ubet-etak ufɔk, kpa ata edisana ubet, ke idak mba mme cherubim.

⁷ Koro mme cherubim etatde mba mmɔ mbiba ke enyɔŋ ebiet ekebe, mme cherubim enyuŋ efuk ekebe ye esaŋ esie ke enyɔŋ.

⁸ Ndien mmɔ edudi mme esaŋ ebon, ndien owo etie ke edisana ebiet ke iso ubet-etak okut mbuot esaŋ, edi owo eke odude ke esien ikwe mmɔ: ndien mmɔ edu do tutu osim mfin emi.

⁹ Baba ŋkpɔ kiet iduhe ke ekebe, ke mibɔhɔke itiat ŋwed iba ikpɔŋ, emi Moses ekesinde ke esit ke Horeb, ke adaŋoro Jehovah akanamde ediomi ye nditɔ Israel, ke ini mmɔ etode ke isɔŋ Egypt.

¹⁰ Edikem adaŋemi mme oku etode ke edisana ubet ewɔŋɔ, obubit enyɔŋ ɔyɔhɔ ke ufɔk Jehovah;

¹¹ ndien obubit enyɔŋ oro iyakke mme oku eda enam ŋkpɔ: koro ubɔŋ Jehovah ɔyɔhɔde ke ufɔk Jehovah.

¹² Ndien Solomon ɔdɔhɔ ete, Jehovah ɔkɔdɔhɔ, ete, ke imɔ iduŋ ke ata ekim.

¹³ Mma mbɔp ufɔk iduŋ nnɔ fi, kpa ebiet eke afo editiede ke nsinsi.

¹⁴ Ndien edidem akabare iso esie, onyuŋ ɔdiɔŋ ofuri esop Israel: ndien ofuri esop Israel edaha eda.

¹⁵ Ndien enye ɔdɔhɔ, ete, Ekɔm Jehovah Abasi Israel, emi akadade inua esie etiŋ ɔnɔ David ete mi, okonyuŋ adade ubɔk esie anam osu, ete,

¹⁶ Toto ke usen oro ŋkosiode ikɔt mi Israel ke Egypt mfep, ŋkemekke baba obio kiet ke otu kpukpru mme esien Israel nte ebɔp ufɔk, man enyiŋ mi okpodu do; edi ŋkemek David nte enye akara ikɔt mi Israel.

¹⁷ Ndien okodu David ete mi ke esit ndibɔp ufɔk nnɔ enyiŋ Jehovah Abasi Israel.

¹⁸ Ndien Jehovah ɔdɔhɔ David ete mi, ete, “Koro odude fi ke esit ndibɔp ufɔk nnɔ enyiŋ mi, ɔfɔn nte okodude fi ke esit.

¹⁹ Edi idige afo edibɔp ufɔk oro; edi eyen fo emi editode fi ke idem, enye eyebɔp ufɔk oro ɔnɔ enyiŋ mi.”

²⁰ Jehovah ama onyuŋ anam uyo esie emi enye ɔkɔdɔhɔde ntre ɔsɔŋ ada, ndien ami mmadaha nda ke itie David ete mi, nnyuŋ ntie ke ebekpo Israel, kpa nte Jehovah ɔkɔdɔhɔde, mma nnyuŋ mbɔp ufɔk emi nnɔ enyiŋ Jehovah Abasi Israel.

²¹ Mma nnyuŋ nsin ebiet do nnɔ ekebe, emi ediomi Jehovah odude ke esit, emi enye akanamde ye mme ete nnyin, adaŋoro enye akadade mmɔ ke isɔŋ Egypt ɔwɔrɔ.

²² Ndien Solomon ada ke iso itie-uwa Jehovah, ke iso ofuri esop Israel, ndien emenere ubɔk esie ke enyɔŋ: onyuŋ ɔdɔhɔ ete,

²³ O Jehovah Abasi Israel, Abasi eke ebietde fi iduhe du ke enyɔŋ ke heaven, ye ke isɔŋ ke idak, eke onimde ediomi ye mfɔn ɔnɔ ikɔt fo eke esaŋade ke iso fo ke ofuri esit mmɔ:

²⁴ emi ama akada se afo ɔkɔdɔhɔde David ete mi, onim ɔnɔ enye: afo okonyuŋ ɔdɔhɔ ke inua fo, onyuŋ ada ubɔk fo anam osu, kpa nte edide mfin emi.

²⁵ O Jehovah Abasi Israel, da, ndien, se afo ɔkɔdɔhɔde David owo fo, ete mi, nnim nɔ enye, ete, “Owo fo iditreke nditie ke iso mi ke ebekpo Israel: edieke nditɔ fo edisuk ekpemede usuŋ mmɔ, enyuŋ esaŋade ke iso mi, kpa nte afo akasaŋade ke iso mi”.

²⁶ Nam, ndien, O Abasi Israel, mbɔk, yak uyo fo oro afo ɔkɔdɔhɔde ye owo fo David, ete mi, ɔwɔrɔ akpanikɔ.

²⁷ Nte Abasi eyeduŋ ke isɔŋ ndien ke akpanikɔ? Sese, enyɔŋ ye ata enyɔŋ ikemke fi, kpaŋ ɔfiɔk ufɔk emi ŋkɔbɔpde.

²⁸ Wɔŋɔre, ndien, se akam owo fo, ye mkpe-ubɔk esie, O Jehovah Abasi mi, nyuŋ kop uyo itoro, ye akam emi owo fo ɔbɔŋde ke iso fo mfin emi:

²⁹ yak enyin fo esuk ese ufɔk emi ke okoneyo ye ke uwemeyo, kpa ebiet emi afo ɔdɔhɔde ete, “Enyiŋ mi eyedu do:” nyuŋ kop akam eke owo fo edibɔŋde ese ebiet emi.

³⁰ Kop ndien mkpe-ubɔk owo fo, ye eke ikɔt fo Israel, eke mmɔ edinamde ese ebiet emi: afo nyuŋ tie ke ebiet iduŋ fo ke enyɔŋ kop: ndien ke ini afo okopde, dahado.

³¹ Adaŋemi owo ediduede mbɔhɔ-iduŋ esie, ndien edori enye akaŋa, man enam enye akaŋa akaŋa, ndien akaŋa oro edi ke iso itie-uwa fo ke ufɔk emi:

³² ndien afo tie ke enyɔŋ kop, nyuŋ nam, nyuŋ kpe ikpe ikɔt fo, nyuŋ bat idiɔk owo ke idiɔk, nyuŋ da ido esie dori enye ke ibuot; nyuŋ bat edinen ke edinen, nyuŋ nɔ enye nte edinen ido esie ekemde.

³³ Adaŋemi ikɔt fo Israel edisuanade ke iso mme asua mmɔ, koro mmɔ ediduede fi, ndien mmɔ ema ekabare etiene fi, enyuŋ esiak enyiŋ fo, enyuŋ ebɔŋ akam, enyuŋ ekpe fi ubɔk ke ufɔk emi:

³⁴ afo tie ndien ke enyɔŋ kop, nyuŋ dahado ke idiɔk-ŋkpɔ ikɔt fo Israel, nyuŋ da mmɔ fiak ke isɔŋ emi afo ɔkɔnɔde mme ete mmɔ.

³⁵ Adaŋemi enyɔŋ esirede, edim minyuŋ idepke, koro mmɔ edidue fi: ndien mmɔ ema ebɔŋ akam ese ebiet emi, enyuŋ etoro enyiŋ fo, enyuŋ ekpɔŋ mme idiɔk ido mmɔ efiak edem, koro afo ɔtuhɔde mmɔ:

³⁶ afo tie ndien ke enyɔŋ kop, nyuŋ dahado ke mme idiɔk ido ifin fo, ye eke ikɔt fo Israel, adaŋemi afo etemede mmɔ eti usuŋ eke edisaŋade ke esit; nyuŋ nam edim edep ke isɔŋ fo, emi afo ɔkɔnɔde ikɔt fo ke udeme.

³⁷ Ke ini akaŋ edidude ke isɔŋ, ke idiɔk udɔŋɔ edidude, ke ikaŋ ekpo, mme mfut, mme ŋkukuŋkpɔyɔriyɔ eke atade edidude; ke ini mme asua mmɔ edikande mmɔ ekuk ke isɔŋ obio mmɔ; ufen ekededi,

³⁸ udɔŋɔ ekededi; kpukpru akam, ye kpukpru mkpe ubɔk eke kpukpru owo, ye kpukpru ikɔt fo Israel edikpede, emi edifiɔkde ufen esit mmɔ, edinyuŋ emenerede ubɔk mmɔ ke enyɔŋ enɔ ufɔk emi:

³⁹ afo tie ndien ke enyɔŋ, ebiet iduŋ fo, kop, nyuŋ dahado, nyuŋ nam, nyuŋ nɔ owo emi afo ɔfiɔkde esit esie, nte kpukpru usuŋ esie edide: koro afo ikpɔŋ ɔfiɔkde esit kpukpru nditɔ Adam;

⁴⁰ kpaŋ mmɔ ekpebak fi kpukpru usen eke mmɔ edidude ke iso isɔŋ emi afo ɔkɔnɔde mme ete nnyin.

⁴¹ Ndien ŋko, ama edi esen owo emi midige ikɔt fo Israel, emi editode ke anyan idut edi, abaŋa enyiŋ fo;

⁴² (koro mmɔ edikopde ebaŋa akwa enyiŋ fo, ye ɔkpɔsɔŋ ita fo, ye edimenere ubɔk fo;) ndien edi edibɔŋ akam ke ufɔk emi;

⁴³ afo tie ke enyɔŋ, ebiet iduŋ fo, kop, nyuŋ nam kpukpru se esen owo oro edisemede ɔnɔ fi abaŋa: kpaŋ kpukpru mbio ererimbot emi ekpefiɔk enyiŋ fo, enyuŋ ebak fi, kpa nte ikɔt fo Israel enamde: man mmɔ enyuŋ efiɔk ete ke eda enyiŋ fo esio ufɔk emi ami mbɔpde.

⁴⁴ Adaŋemi ikɔt fo edikade ekɔŋ ye mme asua mmɔ, ke usuŋ eke afo edidɔŋde mmɔ utom, edinyuŋ ebɔŋde akam enɔ Jehovah ese usuŋ obio emi afo emekde, ese ufɔk emi mbɔpde nnɔ enyiŋ fo;

⁴⁵ tie, ndien, ke enyɔŋ kop akam mmɔ, ye mkpe-ubɔk mmɔ, nyuŋ nam ikpe asana mmɔ.

⁴⁶ Adaŋemi mmɔ ediduede fi, (koro owo baba kiet eke miduehe fi miduhe), ndien afo ama ayat esit ye mmɔ, onyuŋ ayak mmɔ ɔnɔ mme asua mmɔ, ndien mmɔ eke emumde mmɔ etaŋ mmɔ efep, enyɔŋ ke isɔŋ mme asua mmɔ, edide anyan usuŋ, onyuŋ edide mkpet-mkpet;

⁴⁷ edi mmɔ ema ekere ke esit mmɔ ke isɔŋ eke etaŋde mmɔ efep eka do, enyuŋ ekabarede, ekpe fi ubɔk ke isɔŋ mmɔ eke etaŋde mmɔ efep, ete, Nnyin imedue, imonyuŋ inam ukwaŋ - ŋkpɔ, imonyuŋ idiɔk;

⁴⁸ ndien efiak edem etiene fi ke ofuri esit mmɔ, ye ke ofuri ukpɔŋ, mmɔ ke isɔŋ mme asua mmɔ oro eketaŋde mmɔ efep, enyuŋ ebɔŋ akam enɔ fi ese usuŋ isɔŋ mmɔ, emi afo ɔkɔnɔde mme ete mmɔ, ye obio emi afo emekde, ye ufɔk emi mbɔpde nnɔ enyiŋ fo:

⁴⁹ tie ndien ke enyɔŋ, ebiet iduŋ fo, kop akam mmɔ, ye mkpe-ubɔk mmɔ, nyuŋ nam ikpe etebe mmɔ;

⁵⁰ nyuŋ dahado nɔ ikɔt fo eke eduede fi, ke kpukpru mme idiɔk ido eke mmɔ ekenamde ye afo, nyuŋ nim mmɔ ke ŋkpɔ mbɔm ke iso mmɔ eke eketaŋde mmɔ efep, man etua mmɔ mbɔm:

⁵¹ koro mmɔ edide ikɔt fo, ye udeme fo, emi afo akadade ke Egypt ɔwɔrɔ, ke ufɔt furnace ikaŋ:

⁵² man enyin fo esak ese mkpe-ubɔk owo fo, ye mkpe-ubɔk ikɔt fo Israel, man afo akpaŋ utɔŋ ɔnɔ mmɔ ke kpukpru eseme eke mmɔ esemede enɔ fi.

⁵³ Koro edi afo okosio mmɔ ke kpukpru mme idut ererimbot emi, adianare onim ke idemfo ke udeme, kpa nte afo akadade ubɔk Moses owo fo ɔdɔhɔ, ke ini afo osiode mme ete nnyin ke Egypt efep, O Ɔbɔŋ Jehovah.

⁵⁴ Edikem adaŋemi Solomon ama akama ofuri akam ye mkpe ubɔk emi ɔnɔ Jehovah, enye adaha ke enyɔŋ ke iso itie-uwa Jehovah, itɔŋɔke aba edɔŋ esie, onyuŋ odop ndimenere ubɔk esie ke enyɔŋ.

⁵⁵ Ndien enye adaha da emenere uyo ɔdiɔŋ ofuri Israel, ete,

⁵⁶ Ekɔm Jehovah emi ɔkɔnɔde ikɔt esie nduɔk-odudu, kpa nte kpukpru se enye ɔkɔdɔhɔde asaŋade: baba ikɔ kiet ke otu kpukpru nti ikɔ oro enye akadade ubɔk Moses owo esie ɔdɔhɔ, ikpuhu.

⁵⁷ Yak Jehovah Abasi nnyin akam odu ye nnyin, kpa nte enye okodude ye mme ete nnyin: yak enye okukpɔŋ nnyin,

⁵⁸ okonyuŋ emen nnyin ɔduɔk: yak enye onyuŋ akabare esit nnyin etiene enye onyuŋ asaŋa ke kpukpru usuŋ esie, onyuŋ onim mbet esie, ye mme ewuhɔ esie, ye mme item esie, emi enye eketemede mme ete nnyin.

⁵⁹ Ndien yak ikɔ mi emi ndade ŋkpe Jehovah ubɔk, ekpere Jehovah Abasi nnyin ke uwemeyo ye ke okoneyo, man enye anam ikɔ etebe owo esie, onyuŋ anam ikɔ etebe ikɔt esie Israel, nte ŋkpɔ ɔwɔrɔde ke usen:

⁶⁰ man kpukpru obio ke ererimbot efiɔk ete ke Jehovah edi Abasi; efen iduhe du.

⁶¹ Yak ofuri esit mbufo ndien edu ye Jehovah Abasi nnyin, man esaŋa ke mme ewuhɔ esie, enyuŋ enim mbet esie, kpa nte etiede mfin emi.

⁶² Ndien edidem ye ofuri Israel ŋko, ewa uwa ke iso Jehovah.

⁶³ Solomon onyuŋ awa uwa emem emi enye akawade ɔnɔ Jehovah, kpa tɔsin enaŋ edip ye iba, ye tɔsin ŋkpri ufene ke itie ikie ye edip. Ntem ke edidem ye kpukpru nditɔ Israel eberede ufɔk Jehovah

⁶⁴ Ke usen oro edidem ɔdiɔŋ ufɔt okure emi odude ke iso ufɔk Jehovah: koro do ke enye awa edifɔp uwa, ye inuak-udia, ye ikpɔŋ mme uwa emem: koro itie uwa okpoho emi odude ke iso Jehovah, ekpride akan nte adade edifɔp uwa, ye inuak-udia, ye ikpɔŋ mme uwa emem.

⁶⁵ Ndien ke ini oro Solomon ye ofuri Israel nde, kpa akwa esop, ɔtɔŋɔde ke ebiet emi edukde Hamath tutu osim ke akpa Egypt, enam usɔrɔ ke iso Jehovah Abasi nnyin, ke usen itiaba, ye usen itiaba, kpa usen duopenaŋ.

⁶⁶ Ke ɔyɔhɔ usen itiaita enye ayak mbon oro enyɔŋɔ: ndien mmɔ ekɔm edidem, enyuŋ enyɔŋɔ ke mme tent mmɔ, edat esit enyuŋ enem esit ebaŋa kpukpru mfɔn emi Jehovah ɔkɔfɔnde David owo esie, ye Israel ikɔt esie.