1 NDIDEM 6 - Edisana ñwed Abasi Ibom

Edidem Solomon Ɔbɔp Temple

¹ EDIKEM ke ɔyɔhɔ isua ikie inaŋ ye anaŋ, nte nditɔ Israel eketo ke isɔŋ Egypt, ke ɔyɔhɔ isua inaŋ, ke ɔfiɔŋ Ziv (oro edi udiana-akpa ɔfiɔŋ), nte Solomon akada ubɔŋ Israel, enye ɔtɔŋɔ ndibɔp ufɔk Jehovah.

² Ndien uniɔŋ ufɔk emi Solomon ɔbɔpde ɔnɔ Jehovah edi ibio idomo-okuk ata, ubom esie onyuŋ edi ibio idomo-okuk edip, idaha esie onyuŋ edi ibio idomo-okuk edip ye duop.

³ Ndien uniɔŋ etehe emi odude ke iso temple ufɔk edi ibio idomo-okuk edip, ekem ye ubom ufɔk; ubom esie onyuŋ edi ibio idomo-okuk duop ke iso ufɔk.

⁴ Enye onyuŋ anam window emi ibiɔŋ eto mmɔ emumde ibibene, esin ke ufɔk.

⁵ Enye onyuŋ ɔbɔp ufɔk enyɔŋ adian ye ibibene ufɔk akan ibibene ufɔk okuk, akan temple ye ubet-etak okuk: ntem ke enye anam ubet-ubet akan okuk.

⁶ Ndien ubom deck ke isɔŋ edi idomo-okuk ition, ubom eke ufɔt onyuŋ edi ibio-idomo-okuk itiokiet, ubom eke ɔyɔhɔ ita onyuŋ edi ibio-idomo-okuk itiaba: koro enye afarade ibibene ke edem esie akan okuk, man ekusin mme beam ke ibibene ufɔk.

⁷ Ndien adaŋemi ebɔpde ufɔk, mmɔ ebɔp ke itiat emi ema ekesɔi ema ke ebiet usɔi itiat; ndien ikopke baba hammer, ye ekudi, ye ŋkpɔ-ukwak ekededi, ke ufɔk adaŋemi ebɔpde enye.

⁸ Enyin-usuŋ esine-ufɔt ubet odu ke ŋkaŋ ufɔk nnasia: ndien mmɔ eduk ke udigukot emi akabarede esim deck emi esinede ke ufɔt, ndien eto ke esine-ufɔt deck edɔk ke ɔyɔhɔ ita.

⁹ Ntem ke enye ɔbɔp ufɔk oro, onyuŋ ama enye: ndien enye ada beam ye obubɔk cedar ɔkɔŋ ufɔk.

¹⁰ Enye onyuŋ ɔbɔp ufɔk enyɔŋ emi idaha esie edide ibio-idomo-okuk ition, adian ke ŋkaŋ ofuri ufɔk, ndien enye (ufɔk enyɔŋ) omum (ata) ufɔk ke eto cedar.

¹¹ Ekem uyo Jehovah osim Solomon, ete,

¹² Ama edi ufɔk emi afo ɔbɔpde, afo ama asaŋa ke mme ewuhɔ mi, onyuŋ anam mme item mi, onyuŋ onim ibet mi kpukpru, onyuŋ asaŋa ke esit; ndien nyenam uyo mi oro ŋkodɔhɔde David usɔ,

¹³ osu ɔnɔ fi; nyenyuŋ nduŋ ke otu nditɔ Israel; ndinyuŋ ŋkpɔŋke Israel ikɔt mi.

¹⁴ Ntem ke Solomon ɔbɔp ufɔk oro, onyuŋ ama enye.

¹⁵ Ndien enye ada obubɔk cedar ɔkɔŋ ibibene esit ufɔk, ɔkɔŋ obukpɔk ke esit, ɔtɔŋɔde ke isɔŋ ufɔk tutu osim ke deck ɔkɔm; enye onyuŋ ada obukpɔk cypress ɔkɔŋ isɔŋ ufɔk.

¹⁶ Enye onyuŋ osibe ibio-idomo-okuk edip ke etak ufɔk ada obukpɔk cedar ɔkɔŋ ke esit ufɔk ɔnɔ enye, ke eke ubetetak, man edi ata edisana ebiet.

¹⁷ Ndien ata ufɔk edi ibio-idomo-okuk aba; enye edi temple ke iso.

¹⁸ Mmɔ enyuŋ ekap cedar ke esit ufɔk enam ikpɔk-ekpo ye edisiaha ikɔŋ; ofuri-ofuri edi cedar: ikwe baba itiat

¹⁹ Ndien enye ɔdiɔŋ ubet-etak ke esit ufɔk, man eda ekebe ediomi Jehovah esin do.

²⁰ Ndien esit ubet-etak edi ibio idomo-okuk edip ke uniɔŋ, ye ibio-idomo-okuk edip ke ubom, ibio-idomo-okuk edip onyuŋ edi idaha esie: ndien enye ada ata eti gold adian ofuk enye. Enye onyuŋ ada cedar ofuk itie-uwa.

²¹ Solomon onyuŋ ada ata eti gold adian ofuk esit ufɔk; onyuŋ anam ŋkpɔkɔbi gold asaŋa ke iso ubet-etak: onyuŋ ada gold adian ofuk enye.

²² Enye onyuŋ ada gold adian ofuk ofuri ufɔk, tutu enye ama ofuri ufɔk: onyuŋ ada gold adian ofuk itie-uwa ubet-etak.

²³ Ndien enye ada eto olive anam cherubim iba onim ke esit ubet-etak, emi idaha mmɔ edide ibio idomo-okuk duop.

²⁴ Mba cherub kiet edi ibio-idomo-okuk ition; mba cherub eken onyuŋ edi ibio idomo-okuk ition: ɔtɔŋɔde ke uti mba kiet tutu osim ke utit mba eken edi ibio-idomo-okuk duop.

²⁵ Cherub eken onyuŋ edi ibio-idomo-okuk duop: mme cherubim mbiba esaŋa idomo kiet ye oruk kiet.

²⁶ Idaha cherub kiet edi ibio-idomo-okuk duop, cherub eken onyuŋ etie kpasuk ntre.

²⁷ Ndien enye onim mme cherubim ke ufɔt ufɔk eke odude ke esit; mmɔ enyuŋ etat mba mme cherubim, ndien mba kiet atuak ke ibibene kiet, mba cherub eken onyuŋ atuak ke ibibene eken; mba mmɔ enyuŋ esobo ke ufɔt ufɔk,

²⁸ mba eyi ye mba. Enye onyuŋ ada gold ofuk mme cherubim.

²⁹ Enye onyuŋ akap ofuri ibibene akan okuk, anam mbiet cherubim, ye eke eyop, ye eke edisiaha mfri, ke esit ye ke edem.

³⁰ Enye onyuŋ ada gold okubi isɔŋ ufɔk ke esit ye ke edem.

³¹ Ndien enye ada eto olive anam itim ɔnɔ usuŋ ubet-etak: lintel, ye obubɔk usuŋ ekem ye ɔyɔhɔ ubak ibibene ition.

³² Mmɔ enyuŋ eda eto olive enam itim iba; enyuŋ ekap cherubim, ye eyop, ye edisiaha mfri, esin ke esit, enyuŋ eda gold ekubi, enyuŋ efuk gold oro ke mme cherubim, ye ke eyop.

³³ Ndien kpasuk ntre enye ada eto olive anam obubɔk enyin-usuŋ temple ekem ye ɔyɔhɔ ubak ibibene inaŋ.

³⁴ Enyuŋ eda obubɔk cypress enam itim iba: ebahare itim kiet ke mbak iba, ebahare itim kiet eken ke mbak iba.

³⁵ Enye onyuŋ akap cherubim, ye eyop, ye edisiaha mfri, esin ke esit, onyuŋ ada gold otim okubi se ekapde.

³⁶ Ndien enye ɔbɔp okure esit-esit ke udim itiat emi ekediɔŋde, ita, ye udim eto cedar kiet.

³⁷ Mmɔ etɔŋɔ ndibɔp ufɔk Jehovah ke ɔyɔhɔ isua inaŋ, ke ɔfiɔŋ Ziv:

³⁸ ndien ke ɔyɔhɔ isua duope-kiet, ke ɔfiɔŋ Bul (enye edi ɔyɔhɔ ɔfiɔŋ itiaita) mmɔ ema ufɔk, nte kpukpru ŋkpɔ esie edide. Ntem ke enye ada isua itiaba ɔbɔp enye.