1 NDIDEM 4 - Edisana ñwed Abasi Ibom

Mme Mmɔ Emi Ekenamde Utom Ukara ye Edidem Solomon

¹ NTEM ke edidem Solomon edi edidem ofuri Israel. Ndien mme mmɔ emi edi ikpɔ owo esie;

² Azariah eyen Zadok akpan owo;

³ Elihoreph ye Ahiijah, nditɔ Shisha, edi mme ewet-ŋwed; Jehoshaphat eyen Ahilud edi andiwet ŋkpɔ obio.

⁴ Ndien Benaiah eyen Jedoiada edi etubom mbon-ekɔŋ: Zadok ye Abiathar enyuŋ edi mme oku.

⁵ Azariah eyen Nathan onyuŋ edi etubom mme andidaha: Zabud eyen Nathan ata akpan owo onyuŋ edi ufan edidem;

⁶ ndien Ahishar onyuŋ edi etubom ufɔk: Adoniram eyen Abda edi akama-utomo.

⁷ Solomon onyuŋ enyene ndidaha owo duopeba eke ekarade ofuri Israel, eke edepde udia enɔ edidem ye ufɔk esie: owo kiet kiet aŋwana udia ke ɔfiɔŋ kiet ke isua.

⁸ Ndien mme mmɔ emi edi enyiŋ mmɔ:

⁹ Ben-hur, ke obot Ephraim: Bendeker, ke Makaz, ye ke Shaalbim, ye Beth-shemesh, ye Elon-bethhanan:

¹⁰ Ben-hesed, ke Arubboth; mmɔ enim Socoh ye ofuri edem Hepher enɔ enye.

¹¹ Ben-abinadab ada ofuri obot Dor; ndien Taphat eyen Solomon aŋwan ekedi ŋwan esie:

¹² Baana eyen Ahilud ada Taanach ye Meggido, ye ofuri Beth-shean, emi ekperede Zarethan, ke idak Jezreel, ɔtɔŋɔde ke Beth-shean tutu osim ke Abel-meholah, ye ke edem Jokmean oko;

¹³ Bengeber ke Ramoth-gilead: enye ada mme obio Jair eyen Manasseh, emi edude ke Gilead; enye ada edem Argob emi odude ke Bashan, ikpɔ obio ata emi enyenede ibibene ye usin-usuŋ okpoho:

¹⁴ Ahinadab eyen Iddo ada Mahanaim:

¹⁵ Ahimaaz odu ke Naphtali: enye onyuŋ ada Basemath eyen Solomon aŋwan ɔdɔ:

¹⁶ Baana eyen Hushai odu ke Asher ye ke Bealoth:

¹⁷ Jehoshaphat eyen Paruah odu ke Issachar:

¹⁸ Shimei eyen Ela odu ke Benjamin.

¹⁹ Geber eyen Uri odu ke isɔŋ Gilead, ke isɔŋ Sihon ɔbɔŋ mme Amorite, ye eke Og ɔbɔŋ Bashan: enye onyuŋ edi adidaha kierakiet ke isɔŋ oro.

²⁰ Judah ye Israel ekewak, nte ntan emi odude ke mben inyaŋ ke uwak, ke edia ŋkpɔ, enyuŋ eŋwɔŋ, enyuŋ edaresit.

²¹ Solomon onyuŋ akara kpukpru mme idut, ɔtɔŋɔde ke Akpa ye idut mme Philistine, tutu osim ke adaŋa Egypt: mmɔ etomo utomo; enyuŋ edi ikɔt Solomon ofuri ini uwem esie.

²² Ndien udia Solomon ke usen kiet edi ndom-uyo ke cor edip ye duop, ye ndom-uyo (efen) ke cor ata;

²³ enaŋ eke ekuhɔde duop, ye enaŋ eke esaŋade eta mbiet edip ye duop, ye ŋkpri ufene ikie, ɔkɔrɔ ye ebet, ye okoyo, ye edop, ye edisehe unen.

²⁴ Koro enye akarade ofuri edem akpa emi, ɔtɔŋɔde ke Tiphsah tutu osim ke Gaza, onyuŋ akara kpukpru ndidem ke edem akpa emi; onyuŋ etie ke emem ke edem esie kpukpru.

²⁵ Ndien Judah ye Israel eduŋ ke ifure, kpukpru owo ke idak vine mmɔ ye eto fig mmɔ, ɔtɔŋɔde ke Dan tutu osim ke Beer-sheba, ke ofuri eyo Solomon.

²⁶ Solomon onyuŋ enyene itie horse chariot esie tɔsin aba, ye tɔsin mbio horse duopeba.

²⁷ Ndien mme adidaha oro ekedep udia enɔ edidem Solomon, ye kpukpru mmɔ eke etiede ke okpokoro edidem Solomon, owo kiet kiet ke ɔfiɔŋ esie: mmɔ iyakke baba ŋkpɔ kiet anana.

²⁸ Mmɔ enyuŋ eda barley ye nnyanyaŋa mme horse, ye eke mme dromedary, edi ke ebiet eke mmɔ edude do, owo kiet kiet ke ini esie.

²⁹ Ndien Abasi ɔnɔ Solomon eti ibuot ye asian eti-eti, ye ɔniɔŋ esit, nte ntan emi odude ke mben inyaŋ.

³⁰ Ifiɔk Solomon onyuŋ awak akan ifiɔk kpukpru nditɔ edem usiaha-utin, ye ofuri ifiɔk Egypt.

³¹ Enye onyuŋ ɔfiɔk ŋkpɔ akan kpukpru owo, akan Ethan Ezrahite, ye Heman, ye Calcol, ye Darda, nditɔ Mahol; ndien etop esie ɔwɔrɔ ke kpukpru mme idut eke ekande ekuk.

³² Enye onyuŋ eke tɔsin ŋke ita; ikwɔ esie enyuŋ edi tɔsin ye ition.

³³ Enye onyuŋ etiŋ abaŋa eto, ɔtɔŋɔde ke cedar emi odude ke Lebanon tutu osim ke hyssop emi otibede ke ibibene; onyuŋ etiŋ abaŋa unam,

³⁴ ye inuen, ye mme ɔnyɔni, ye iyak. Owo enyuŋ eto ke kpukpru mme idut edi ndikop ifiɔk Solomon, eto ke ɔtɔ kpukpru ndidem ererimbot eke ekekopde ebaŋa ifiɔk esie.