1 NDIDEM 21 - Edisana ñwed Abasi Ibom

Edidem Ahab ye Iŋwaŋ Naboth

¹ EDIKEM ke ŋkpɔ oro ema ekebe, Naboth a Jezreel enyene iŋwaŋ-vine emi odude ke Jezreel, ekpere akwa ufɔk Ahab edidem Samaria.

² Ndien Ahab eneme ye Naboth, ete, Nɔ mi iŋwaŋ vine fo, man nda enye nnim ke iŋwaŋ-ikɔŋ, koro enye ekperede mben ufɔk mi: ndien nyeda iŋwaŋ-vine eke ɔfɔnde akan enye, nnɔ fi ke ibuot esie; edi ama enem fi, nyenɔ fi okuk ke ekɔm-urua esie.

³ Ndien Naboth ɔbɔrɔ Ahab ete, Nsa mi O, Jehovah akpan mi ndida udeme mme ete mi nnɔ fi.

⁴ Ndien Ahab ɔnyɔŋ ke ufɔk esie ke mfuhɔ ye iyaresit, abaŋa ikɔ oro Naboth a Jezreel ɔkɔdɔhɔde enye: koro ɔkɔdɔhɔde, ete, Ndinɔŋɔ fi udeme mme ete mi. Ndien enye ɔsuhɔre ana ke bed esie, onyuŋ ɔwɔŋɔre iso esie, inyimeke ndidia ŋkpɔ.

⁵ Ekem, Jezebel ŋwan esie etiene enye, onyuŋ obup enye, ete, Nsinam esit ayatde fi, munyuŋ udiaha ŋkpɔ?

⁶ Ndien enye ete ŋwan, Koro ŋkɔdɔhɔde Naboth a Jezreel, nte enye, Nɔ mi iŋwaŋ-vine fo ke okuk; edi edieke afo amade, nyenɔ fi iŋwaŋ-vine efen ke ibuot esie: ndien enye ɔdɔhɔ ete, Ndinɔŋɔ fi ŋwaŋ-vine mi.

⁷ Ndien Jezebel ŋwan esie ɔdɔhɔ enye, ete, Nam naŋa nte edidem Israel: daha ke enyɔŋ, dia ŋkpɔ; yak esit onyuŋ enem fi: ami nyenɔ fi iŋwaŋ-vine Naboth a Jezreel.

⁸ Ndien enye ewet ŋwed esin ke enyiŋ Ahab, onyuŋ ada ufik-ŋwed esie efik, ndien ɔnɔ ŋwed oro ɔsɔk mbiowo ye ikpɔ owo emi edude ke obio mmɔ, eduŋ ye Naboth.

⁹ Ntem ke enye ewet ke ŋwed, ete, Mbufo ewuk utre-udia, enyuŋ emenere Naboth enim ke iso kpukpru owo:

¹⁰ enyuŋ eda owo iba, mme oburobut owo, enim enye ke iso, man etiŋ ikɔ ntiense ebaŋa enye, ete, Afo okosuŋi Abasi ye edidem. Ndien mbufo esio enye, enyuŋ etɔŋɔ enye ke itiat, ewot.

¹¹ Ndien mbio-obio mmɔ, idem mbiowo ye ikpɔ owo oro, eduŋde ke obio mmɔ, enam kpa nte Jezebel eketemede mmɔ, kpa nte enye ekewetde ke ŋwed oro enye ɔkɔnɔde esɔk mmɔ.

¹² Mmɔ ewuk utre-udia, enyuŋ eda Naboth enim ke iso kpukpru owo. Ndien owo iba,

¹³ ata mme oburobut owo, eduk eketie ke iso Naboth: ndien mme oburobut owo oro etiŋ ikɔ ntiense edian enye Naboth, ke iso mbio-obio, ete, Naboth okosuŋi Abasi ye edidem. Ndien mmɔ esio enye eka ke edem obio, eketɔŋɔ enye ke itiat, ewot.

¹⁴ Ndien mmɔ edɔŋ eketɔt Jezebel, ete, Ema etɔŋɔ Naboth ke itiat ewot.

¹⁵ Edikem adaŋemi Jezebel okopde ete ke ema eketɔŋɔ Naboth ke itiat ewot, Jezebel ɔdɔhɔ Ahab, ete, Daha ke enyɔŋ, ka da iŋwaŋ-vine Naboth a Jezreel oro enye ekesinde ndinɔ fi ke okuk: koro Naboth miduhe aba uwem, edi amakpa.

¹⁶ Edikem ke ini Ahab okopde ete ke Naboth amakpa, Ahab adaha ke enyɔŋ, ɔsuhɔre aka ke iŋwaŋ-vine Naboth a Jezreel, ndida enye nnyene.

¹⁷ Ndien uyo Jehovah osim Elijah Tishbite, ete,

¹⁸ Daha ke enyɔŋ, suhɔre kosobo ye Ahab edidem Israel, emi odude ke Samaria: sese, enye ke odu ke iŋwaŋ-vine Naboth, emi enye ɔsuhɔrede do aka ndida enye nnyene. Nyuŋ dɔhɔ enye, ete,

¹⁹ Ntem ke Jehovah ɔdɔhɔ ete, Nte afo omowot, omonyuŋ ada ŋko? Nyuŋ dɔhɔ enye, ete, Ntem ke Jehovah ɔdɔhɔ, ete, Ke ebiet emi mme ebua edeide iyip Naboth, ke mme ebua edinyuŋ edei iyip fo ŋko-ŋko.

²⁰ Ndien Ahab ɔdɔhɔ Elijah, ete, Nte afo omokut mi, O usua mi? Ndien enye ete, Mmokut: koro afo amanyam idem fo ndinam idiɔk ke iso Jehovah.

²¹ Sese, ami mmɔŋ nda idiɔk-ŋkpɔ ntiene fi, nnyuŋ mbine fi ndikpɔri fi mfep, nnyuŋ nsibe irenowo Ahab, ye ofin ye eyen-isɔŋ, mfep ke Israel;

²² nyenyuŋ nnam ufɔk fo etie nte ufɔk Jeroboam eyen Nebat, ye nte ufɔk Baasha eyen Ahijah, mbaŋa eriyat emi afo ayatde mi esit, onyuŋ anam Israel ediɔk.

²³ Jehovah onyuŋ ɔdɔhɔ ŋko abaŋa Jezebel, ete, Mme ebua eyeta Jezebel ke edem ibibene Jezreel.

²⁴ Mme ebua eyeta owo Ahab eke akpade ke obio; mme inuen enyɔŋ eyenyuŋ eta owo eke akpade ke iŋwaŋ.

²⁵ Edi oruk owo nte Ahab ikoduhe, emi akanyamde idem esie ndinam idiɔk ke iso Jehovah, emi Jezebel ŋwan esie esinde nsɔk.

²⁶ Enye onyuŋ anam mbubiam ŋkpɔ ke eritiene ndem, kpa nte mme Amorite emi Jehovah ekebinde mmɔ ke iso nditɔ Israel efep, ekenamde kpukpru ŋkpɔ,

²⁷ Edikem adaŋemi Ahab okopde ikɔ emi, enye awai ɔfɔŋ-idem esie, onyuŋ esine ɔfɔŋ ikpo ke idem, onyuŋ etre udia, onyuŋ ɔsuhɔre ana ke ɔfɔŋ-ikpo, ndien asaŋa suŋ-suŋ.

²⁸ Edikem uyo Jehovah osim Elijah Tishbite, ete,

²⁹ Ŋkɔm afo omokut nte Ahab osukde idem-esie ke iso mi? Koro enye osukde idem esie ke iso mi, ndidaha idiɔk-ŋkpɔ emi ndi ke eyo esie: edi ke eyo eyen esie nyeda idiɔk emi ntiene ufɔk esie.