1 JOHN 5 - Edisana ñwed Abasi Ibom

Nnyin Ikakan Ererimbot Oto ke Mbuɔridem Nnyin

¹ KPUKPRU owo eke enimde ete, Jesus edi Christ, edi Abasi okobon enye; ndien kpukpru owo eke emade Enye emi edide Andibon, ema enye emi Enye okobonde ŋko.

² Nnyin ida emi ifiɔk ite, nnyin imama nditɔ Abasi, sia nnyin imade Abasi, inyuŋ inimde mbet Esie.

³ Koro ndima Abasi edi emi, ete, nnyin inim mbet Esie; ndien mbet Esie ibiakke owo idem.

⁴ Koro kpukpru owo eke Abasi okobonde ekan ererimbot; ndien emi edi erikan eke akakande ererimbot, kpa mbuɔtidem nnyin.

⁵ Anie owo edi andikan ererimbot, ke mibɔhɔke enye emi onimde ke akpanikɔ ete, Jesus edi Eyen Abasi?

⁶ Emi edi Enye emi akasaŋade ye mmɔŋ ye iyip edi, kpa Jesus Christ; isaŋake ye mmɔŋ ikpɔŋ idi, edi asaŋa ye mmɔŋ ye iyip.

⁷ Ndien Spirit etie ntiense, koro Spirit edide akpanikɔ.

⁸ Koro mmɔ emi etiede ntiense edi ita, Spirit, ye mmɔŋ, ye iyip; mmɔ mbita enyuŋ ekem uyo.

⁹ Edieke nnyin ibɔde ikɔ-ntiense owo, ikɔ ntienese Abasi okpon akan; koro emi edi ikɔ-ntiense Abasi, ete, Imɔ iketie ntiense ibaŋa Eyen Imɔ.

¹⁰ Owo eke ɔbuɔtde idem ye Eyen Abasi enyene ikɔ-ntiense emi ke esit esie. Edi owo eke minimke Abasi ke akpanikɔ akanam Abasi ɔwɔrɔ osu-nsu, sia enye midaha ikɔ-ntiense emi Abasi ɔkɔnɔde nte akpanikɔ.

¹¹ Ndien emi edi ikɔ-ntiense, ete, Abasi ɔkɔnɔ nnyin nsinsi uwem, uwem emi onyuŋ odu ke Eyen Esie.

¹² Owo eke enyenede Eyen enyene uwem oro; owo eke minyeneke Eyen Abasi inyeneke uwem oro.

¹³ Mma ŋwetwet ŋkpɔ emi nnɔ mbufo, man mbufo efiɔk ete mme imɔ imenyene nsinsi uwem, kpa mbufo emi ebuɔtde idem ke enyiŋ Eyen Abasi.

¹⁴ Nnyin imonyuŋ ibure ifiɔk ibaŋa Enye, ite, edieke nnyin ibeŋede ŋkpɔ ekededi nte ekemde uduak Esie, Enye ɔbiɔŋ utɔŋ ke ebeŋe nnyin;

¹⁵ ndien edieke nnyin ifiɔkde ite, Enye ɔbiɔŋ utɔŋ ke ebeŋe nnyin, nnyin imonyuŋ ifiɔk ite, imɔbɔ se ikebeŋede Enye.

¹⁶ Edieke owo okutde eyen-ete esie anamde idiɔk-ŋkpɔ eke midaha mkpa idi, enye eyenam mkpe-ubɔk, ndien Abasi eyeda uwem ɔnɔ enye, kpa ɔnɔ mmɔ eke minamke idiɔk-ŋkpɔ mkpa. Idiɔk-ŋkpɔ emi adade mkpa edi odu; ndɔhɔke nte owo anam mkpe-ubɔk abaŋa utɔ idiɔk-ŋkpɔ emi.

¹⁷ Kpukpru ukwaŋkpɔ edi idiɔk-ŋkpɔ; idiɔk-ŋkpɔ eke midaha mkpa idi onyuŋ odu.

¹⁸ Nnyin imɔfiɔk ite, kpukpru owo emi Abasi okobonde inamke idiɔk. Eyen Abasi, emi Abasi okobonde, ekpeme enye, andidiɔk inyuŋ itukke enye ubɔk.

¹⁹ Nnyin imɔfiɔk ite, nnyin idi eke Abasi, ofuri ererimbot onyuŋ esine ke ubɔk andidiɔk.

²⁰ Nnyin imonyuŋ ifiɔk ite Eyen Abasi ama edi, ama onyuŋ ɔnɔ nnyin ikike, ete ifiɔk Enye emi edide ata Abasi: nnyin inyuŋ idu ke ata Abasi, kpa ke Eyen Esie Jesus Christ. Enye emi edi ata Abasi, onyuŋ edi nsinsi uwem.

²¹ Ŋkpri nditɔ mi, ekpeme idem ke ndem.