1 JOHN 4 - Edisana ñwed Abasi Ibom

Edomo Kpukpru Mme Spirit Ese

¹ NDIMA, ekunim kpukpru spirit ke akpanikɔ, edi edomo mme spirit ese mme mmɔ edi eke Abasi: koro ediwak prophet nsu ema ewɔŋɔ eduk edi ke ererimbot.

² Mbufo eda emi efiɔk Spirit Abasi: kpukpru spirit eke onyimede ete Jesus Christ ama edi ke obukidem oto Abasi;

³ ndien kpukpru spirit eke minyimeke Jesus itoho Abasi. Emi onyuŋ edi spirit andibiɔŋɔ Christ, emi mbufo ekekopde ete enye ɔmɔŋ edi; ndien enye odu ke ererimbot ke emi.

⁴ Mbufo enyene Abasi, ŋkpri nditɔ mi, emenyuŋ ekan mmɔ; koro Enye emi odude mbufo ke idem okpon akan enye emi odude ke ererimbot.

⁵ Mmɔ edi mbon ererimbot; ntre ke mmɔ etetiŋ ikɔ nte mbon ererimbot, ererimbot onyuŋ akpaŋ utɔŋ ɔnɔ mmɔ.

⁶ Nnyin idi nditɔ Abasi; owo eke ɔfiɔkde Abasi ɔbiɔŋ utɔŋ okop ikɔ nnyin; edi owo eke midige owo Abasi ikopke ikɔ nnyin. Nnyin ida emi ifiɔk spirit akpanikɔ ye spirit ndudue.

⁷ Ndima, eyak nnyin ima kiet eken; koro ima oto Abasi; kpukpru owo eke emade-ma, edi Abasi okobon mmɔ, mmɔ enyuŋ efiɔk Abasi.

⁸ Owo eke mimaŋa-ma ifiɔkke Abasi, koro Abasi edi ima.

⁹ Abasi akada emi ayarare ima emi Enye amade nnyin, ke emi Enye okosiode edibon Eyen Esie kierakiet ɔdɔŋ ke ererimbot, kpaŋ nnyin ikpodu uwem oto ke Enye.

¹⁰ Ima odu ke oruk usuŋ emi, itoho ke emi nnyin ikamade Abasi, edi oto ke Abasi emi akamade nnyin, onyuŋ osiode Eyen Esie ɔdɔŋ, ete, edidi usio-isop mme idiɔk-ŋkpɔ nnyin.

¹¹ Ndima, edieke Abasi akamade nnyin ntem, nnyin nde ikpama kiet eken.

¹² Akananam baba owo kiet ikwe Abasi; edieke nnyin imade kiet eken, Abasi ododuŋ ke esit nnyin, ema enyuŋ enam ima Esie ɔfɔn ama ke uwem nnyin.

¹³ Nnyin ida emi ifiɔk ite, nnyin idoduŋ ke Enye, Enye onyuŋ oduŋ nnyin ke idem, koro Enye ama ɔkɔnɔ nnyin udeme ke Spirit Esie.

¹⁴ Ndien nnyin ima ikut, inyuŋ idi ntiense, ite, Ete ɔkɔdɔŋ Eyen Esie edidi Andinyaŋa ererimbot.

¹⁵ Owo ekededi eke edinyimede ete, Jesus edi Eyen Abasi, Abasi ododuŋ enye ke esit, enye onyuŋ oduŋ ke Abasi.

¹⁶ Ndien nnyin imɔfiɔk, inyuŋ ibuɔt idem ke ima emi Abasi amade nnyin. Abasi edi ima; ndien owo emi oduŋde ke ima ododuŋ ke Abasi, Abasi onyuŋ ododuŋ enye ke idem.

¹⁷ Ima ɔwɔrɔ ɔfɔn ama ke esit nnyin ntem, ete nnyin inyene uko ke usen ikpe; koro nte Enye odude uwem ke ererimbot emi, kpa ntre ke nnyin inyuŋ idu.

¹⁸ Ndik isineke ke ima; edi ima eke ɔfɔnde ama ebin ndik efep; koro ndik asaŋa ye ufen; ndien owo eke efehede ndik, ke ikanamke enye ɔfɔn ama ke ima.

¹⁹ Nnyin ima ima, koro Enye ekebemde iso ama nnyin.

²⁰ Edieke owo ɔdɔhɔde ete, Mmama Abasi, ndien enye asua eyen-ete esie, enye edi osu-nsu; koro owo emi mimaŋa eyen-ete esie emi enye okokutde ke enyin ikemeke ndima Abasi emi enye mikekwe.

²¹ Ndien item emi ke nnyin ikɔbɔ ke ubɔk Esie, ete, owo emi amade Abasi edima eyen-ete esie ŋko.