1 JOHN 1 - Edisana ñwed Abasi Ibom

Ikɔ Emi Ɔnɔde Uwem; Ke Abasi Ekim Iduhɔ

¹ SE ikodude toto ke eritɔŋɔ, se nnyin ikokopde, se ikokutde ke enyin, se inyuŋ isede, inyuŋ idade ubɔk ituk, ibaŋa Ikɔ uwem

² (ndien uwem oro akayarare owut idem, nnyin ima inyuŋ ikut Enye, inyuŋ idi ntiense inɔ Enye, inyuŋ isian mbufo Uwem oro, kpa nsinsi Uwem, emi okodude ye Ete, ekenyuŋ eyararede enɔ nnyin);

³ se nnyin ikokutde inyuŋ ikopde, ke nnyin isian mbufo, man mbufo nde eduk nduk ye nnyin; ndien ke akpanikɔ nnyin iduk nduk ye Ete, ye Eyen Esie Jesus Christ;

⁴ nnyin inyuŋ iwet ŋkpɔ emi, man idaresit nnyin ɔyɔhɔ.

⁵ Ndien emi edi etop eke ikokopde ke inua Esie, inyuŋ isian mbufo, ite, Abasi edi uŋwana, ekim inyuŋ iduhe ke Enye.

⁶ Edieke idɔhɔde ite, iduk nduk ye Enye, ndien nnyin isaŋa ke ekim, nnyin isosu, inyuŋ inamke se idide akpanikɔ:

⁷ edi edieke nnyin isaŋade ke uŋwana, kpa nte Enye odude ke uŋwana, nnyin imoduk nduk ye kiet eken, ndien iyip Jesus Eyen Esie eyet nnyin isana ke kpukpru mme idiɔk-ŋkpɔ.

⁸ Edieke nnyin idɔhɔde ite, nnyin inyeneke idiɔk-ŋkpɔ, nnyin ibabiaŋa idem, akpanikɔ inyuŋ iduhe nnyin ke esit.

⁹ Edieke nnyin iyararede mme idiɔk-ŋkpɔ nnyin, Enye edi anam-akpanikɔ onyuŋ enen, ete ifen mme idiɔk-ŋkpɔ nnyin, inyuŋ iyet nnyin isana ke kpukpru mme ukwaŋkpɔ.

¹⁰ Edieke nnyin idɔhɔde ite akanam nnyin inamke idiɔk-ŋkpɔ, imakabare Enye inim ke osu-nsu, ikɔ Esie inyuŋ iduhe nnyin ke esit.