1ŊWED TIMOTHY 2 - Edisana ñwed Abasi Ibom

Nnɔ Item Kabaŋa Ntuakibuot: Esin Kpukpru Owo ke Akam

¹ KE akpa itie ndien, mmeteme nte enam mkpe-ubɔk, enyuŋ ebɔŋ akam, enyuŋ ebeŋe ebeŋe, enyuŋ enɔ ekɔm ebaŋa kpukpru owo;

² ebaŋa ndidem ye kpukpru mmɔ emi edude ke ikpɔ itie; man nnyin idu uwem ifure ye emem, ke kpukpru uteŋe ye eti ido.

³ Emi edi se ifɔnde inyuŋ inemde Abasi andinyaŋa nnyin esit;

⁴ emi oyomde kpukpru owo enyene erinyaŋa, enyuŋ esim ifiɔk akpanikɔ.

⁵ Koro Abasi kiet odu, Ekpe-emem kiet ke ufɔt Abasi ye owo onyuŋ odu, emi ke Idem Esie edide owo, kpa Christ Jesus;

⁶ emi ɔkɔnɔde Idem Esie, ete idi ufak kpukpru owo. Ekɔnɔ mbuk ebaŋa ŋkpɔ emi ke edikem ini;

⁷ ekenyuŋ enim mi ete ndi isuŋutom ye apostle mbaŋa ŋkpɔ emi (ntiŋ akpanikɔ, nsuhu nsu), ye andikpep mme Gentile ke mbuɔtidem ye akpanikɔ.

⁸ Nyom irenowo ndien ebɔŋ akam ke kpukpru ebiet, emenere ndisana ubɔk ke enyɔŋ, ekunyene iyaresit ye eneni.

⁹ Kpasuk ntre ŋko nyom iban esaŋa ke suŋ-suŋ ido, esine ŋkpɔ eke owude but ye eti ibuot: mmɔ ekubana idem ke edidɔk idet, ye gold ye pearl ye ɔsɔŋ-urua edisine-ŋkpɔ,

¹⁰ edi eda nti ubɔk-utom ebana idem; koro oro odot ye iban emi edɔhɔde ete imenyene uteŋe Abasi.

¹¹ Yak ŋwan ekpep ŋkpɔ ye ndop-uyo, enyene kpukpru nsuk-ibuot.

¹² Nnyimeke ŋwan edi andikpep, nnyuŋ nnyinmeke ŋwan akara erenowo; yak enye etie suŋ-ŋ.

¹³ Koro ekebem iso ebot Adam, ndien edibot Eve.

¹⁴ Inyuŋ idige Adam ke ekabiaŋa, edi ŋwan ke ekabiaŋa enam ɔduɔ abiat ibet:

¹⁵ edi eyenyaŋa enye ke ntak uman eke ŋwan akamande, edieke mmɔ etiede ke mbuɔtidem ye ima ye edisana ido ɔkɔrɔ ye eti ibuot.