टीटस 3 - पुर्वीय मगरविश्वासीकुङ चालचलन 1 सरकार र सरकारी अधिकारी भर्मीकुङ अढीनाङ ङुकी र डेच मन्डीकी डेयार होलुङ विश्वासीकोलाक आर्मीटाक्ङ यान्ही। होखुरीक पट्ट न सेछ काम जाट्कीयो लागी सधैँ टयार छान्न ङुख्यौ। 2 होखुरीकै सुओ बारेयाङ र दुष्ट कुरा माङाक्ख्यौ र योन्की-पुन्खी र मापाख्यौ। पट्ट न भर्मीकोखाटा खाट्न ङुख्यौ र सेछ बानी बेहोरा मट्टै टान्हाक्ख्यौ। 3 हीजैडेनाङ कान र पहीला होङ्च न मुर्ख, डेच मागन्डीच र बरालीस्च लेया। मासेछ बीचारकै र पट्ट खालुङ मोज मज्जाकै कानकी कमारा खास्नन्या। कानकी र फोको भर्मीकै झीर्नन्या र कान र होखुरीककी झीर्च जाट्नन्या। 4 टर जब कानुङ मुक्ति याछ परमेश्वरौ दया र माया कानै डाङा, 5 होसकै कानकी जीवाटाका। कानै लहे न जाट्च सेछ कामै जाट्न होइन, टर होसकै कानकी जाट्च कृपौ कारनै जीवाटाक्च हो। होसकै पवित्र आत्मा लकीङ कानुङ पापकोलाक हुरार नयाँ जीवन याहा। 6 परमेश्वरै मुक्ति याछ येशू ख्रीष्ट लकीङ कान मीटाक परसस्ट जाट्न पवित्र आत्मा याहा। 7 होटजाट्न होसकुङ अनुग्रहै कानकी धर्मी ठहरीया र कानै आशा डाच सेन्र मासीच जीवनौ हकडार छान्की य्होका। 8 इसे कुरा साँच्ची न हो। परमेश्वराङ विश्वास जाट्चकै जटी सेछ काम जाट्कीयो लागी ढ्यान याख्यौ डेयार नाकै जोड याछ ङा मीमन जाट्ले। इसे सेछ काम जाट्की पट्ट न भर्मीकोलाक पट्ट डेनाङ फाइडा छान्च कुरा हो। 9 टर मुर्ख वाद विवाद, पुर्खाकुङ बङ्सवलीको र मोशौ व्यवस्थौ बारेयाङ छान्च झैझगडा लकीङ नाखुरीक लोस ङुनी। हीजैडेनाङ होसे पट्ट न व्यार्थौ काम मालग्डीस्च कुराको हो। 10 फाटो राक्च भर्मीकी काखेप नीसखेप चेटावनी याखी, होट जाट्नाङ र माछाना डेनाङ होसेखाटा हीर सम्बन्ध माडाकी। 11 नाकोकी ठाहा न ले, याङ्च भर्मीको भ्रष्ट र पापी छान्ले र लहो पापै लाहाकी न दोषी ठहरीले। अन्टीम सल्लाह 12 जब अर्तीमास वा टुखीकसकी ङा नाको लेठाङ बीर्न्हकाले, टब नाको ङाकी डुप्की नीकोपोलीसाङ कुटजाट्न र रान्ही। हीजैडेनाङ हीउँडभरी ङै होला न ङुच मीमन जाट्न ने। 13 वकील जेनास र अपोल्लोसकी लामाङ चहडीस्च पट्ट न ठोक याहार सहायटा जाट्नी होटजाट्नाङ होखुरीककी हीर खाँचो मापर्ले। 14 काल्हौ विश्वासीकै आवश्यकताङ पर्च भर्मीकोलाक सहायता जाट्की सेछ काम जाट्की पर्ले। अनी होखुरीकुङ जीवन मीस्या मास्याटाक्च ल्याक्च माछान्ले। 15 इला ङाखाटा लेच पट्टकै नाकोकी झोर्ले डेम कामने। अनी होला केरेटाङ लेच कानकी माया जाट्च विश्वासी डाजे भाइकोलाक र झोर्ले डेम याखी। परमेश्वरौ अनुग्रह नाखुरीक पट्टको मीटाक ङुम ङुख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.